(ສພຊ) – ວັນທີ 12-18 ກັນຍາຜ່ານມາ, ທ່ານ ພົຈວ. ສົມວັນ ທຳມາໄຊ ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ (ກປຊສ) ພ້ອມດ້ວຍຄະນະ ໄດ້ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ (ສພຊ) ຊຸດທີ IX ແລະ ສະພາປະຊາຊົນນະຄອນຫຼວງ-ແຂວງວຽງຈັນ ຊຸດທີ II ຢູ່ອົງການ, ກົມກອງ ທີ່ຂຶ້ນກັບກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບ ໂດຍໄດ້ເຄື່ອນໄຫວຢູ່ 3 ຈຸດຄື: ກອງພັນໃຫຍ່ 279, ກອງພັນໃຫຍ່ 641 ແລະ ກອງພັນໃຫຍ່ 497 (ແຂວງວຽງຈັນ) ເຊິ່ງມີບັນດາຄະ ນະພັກ-ຄະນະບັນຊາ, ພະນັກງານ, ນາຍ ແລະ ພົນທະຫານ-ຕຳຫຼວດ ເຂົ້າຮ່ວມທັງໝົດ 363 ສະຫາຍ.
ໃນການເຜີຍແຜ່ແຕ່ລະຈຸດ, ໄດ້ຮັບຟັງການລາຍງານສະພາບການເຄື່ອນໄຫວຂອງກົມກອງໂດຍຫຍໍ້ ໂດຍ ສະເພາະແມ່ນຈຸດທີ່ຕັ້ງຂອງກົມກອງ, ຜົນສຳເລັດໃນການຈັດຕັ້ງປະຕິບັດແຕ່ລະຂົງເຂດວຽກງານ ເປັນຕົ້ນວຽກງານ ການເມືອງ, ການທະຫານ ແລະ ພະລາທິການ. ຈາກນັ້ນ, ຄະນະສະມາຊິກສະພາແຫ່ງຊາດ (ສສຊ) ໄດ້ຜັດປ່ຽນກັນເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງ ສພຊ ຊຸດທີ IX ແລະ ສະພາປະຊາຊົນນະຄອນ ຫຼວງ-ແຂວງວຽງຈັນ ຊຸດທີ II; ພ້ອມທັງໄດ້ໃຫ້ຮູ້ເຖິງພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ແນວທາງນະໂຍບາຍຂອງພັກ, ກົດໝາຍ, ແຜນພັດທະນາເສດຖະກິດ-ສັງຄົມ, ເນື້ອໃນຂອງ 2 ວາລະແຫ່ງຊາດ ຄື: ການແກ້ໄຂບັນຫາຂໍ້ຫຍຸ້ງຍາກທາງດ້ານເສດຖະກິດ-ການເງິນ, ການສະກັດກັ້ນ ແລະ ແກ້ໄຂບັນຫາຢາເສບຕິດ.
ທ່ານ ພົຈວ. ສົມວັນ ທຳມາໄຊ ໄດ້ມີຄຳເຫັນປຸກລະດົມນາຍ ແລະ ພົນທະຫານ-ຕຳຫຼວດ ເອົາໃຈໃສ່ຈັດຕັ້ງປະຕິບັດແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ, ການຄຸ້ມຄອງທັບ-ຄຸ້ມຄອງລັດ-ຄຸ້ມຄອງເສດຖະກິດ-ສັງຄົມ ດ້ວຍລັດຖະທຳມະນູນ ແລະ ກົດໝາຍ ໃນຂົງເຂດປ້ອງກັນຊາດ-ປ້ອງກັນຄວາມສະຫງົບ ເພື່ອປະກອບສ່ວນເຮັດໃຫ້ບັນຫາທີ່ຍັງພົບຄວາມຫຍຸ້ງຍາກໄດ້ຮັບການແກ້ໄຂດີຂຶ້ນເທື່ອລະກ້າວ.
ພ້ອມດຽວກັນນັ້ນ, ຍັງໄດ້ຮັບຟັງຄຳຄິດຄຳເຫັນ, ຄຳສະເໜີຈຳນວນໜຶ່ງ ເຊິ່ງມີບາງຄໍາສະເໜີ ກໍໄດ້ຮັບການອະທິບາຍ, ຊີ້ແຈງກັບທີ່ ສ່ວນບັນຫາທີ່ກ່ຽວຂ້ອງກັບຫຼາຍພາກສ່ວນ ກໍຈະນຳໄປສະເໜີຕໍ່ພາກສ່ວນກ່ຽວຂ້ອງແກ້ໄຂ.