(ສພຊ) – ວັນທີ 23 ກັນຍາຜ່ານມາ ທີ່ສະພາແຫ່ງຊາດ ໄດ້ມີພິທີມອບ-ຮັບເງິນຈຳນວນ 50 ລ້ານກີບ ເພື່ອນຳໄປມອບຕໍ່ໃຫ້ແກ່ປະຊາຊົນທີ່ຖືກຜົນກະທົບຈາກອຸທົກກະໄພຢູ່ບັນດາແຂວງພາກເໜືອ ແລະ ພາກໃຕ້; ຕາງໜ້າມອບໂດຍທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່, ຕາງໜ້າຮັບໂດຍທ່ານ ບຸນຕາ ເທບພະວົງ ປະທານກຳມາທິການວັດທະນະທຳ-ສັງຄົມ ເຊິ່ງມີທ່ານ ຄຳໃບ ດຳລັດ ຮອງປະທານສະພາແຫ່ງຊາດ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.

ໃນພິທີ, ທ່ານ ຄຳໃບ ດຳລັດ ໄດ້ແຈ້ງໃຫ້ຊາບກ່ຽວກັບການຊ່ວຍເຫຼືອຂອງສະພາແຫ່ງຊາດຕໍ່ປະຊາຊົນທີ່ປະ ສົບອຸທົກກະໄພໃນໄລຍະຜ່ານມາ ທັງສະແດງຄວາມຊົມເຊີຍຕໍ່ການຊ່ວຍເຫຼືອຄັ້ງນີ້ ແລະ ໃຫ້ຄຳໝັ້ນສັນຍາວ່າ ຈະນຳເອົາການຊ່ວຍເຫຼືອໄປຮອດພໍ່ແມ່ປະຊາຊົນຜູ້ປະສົບໄພຢ່າງທົ່ວເຖິງ.

ທ່ານ ໂພໄຊ ໄຊຍະສອນ ລາຍງານໃຫ້ຮູ້ວ່າ: ຕະຫຼອດໄລຍະຜ່ານມາ, ກະຊວງພະລັງງານ ແລະ ບໍ່ແຮ່ ໄດ້ເອົາ ໃຈໃສ່ຊ່ວຍເຫຼືອສັງຄົມ ກໍຄືຜູ້ປະສົບອຸທົກກະໄພ ພ້ອມກັນນັ້ນ, ກໍຍັງໄດ້ຫ້າງຫາກະກຽມແຜນງານ, ແຜນການຕ່າງໆເພື່ອປະກອບສ່ວນຊ່ວຍເຫຼືອຟື້ນຟູພື້ນຖານໂຄງລ່າງຂອງບັນດາແຂວງທີ່ປະສົບອຸທົກກະໄພ ເປັນຕົ້ນແມ່ນລະບົບນ້ຳປະ ປາ, ໄຟຟ້າ, ອາຄານຮຽນ, ຖະໜົນຫົນທາງ.

(ນາງ ອາລິນ ສຸພິມມະປະດິດ)