ໃນລະຫວ່າງວັນທີ 10-12 ກັນຍາ 2024 ສະມາຊິກສະພາປະຊາຊົນແຂວງ ນໍາພາໂດຍ ທ່ານ ຫຸມເພັງ ຈອມວິສານ ກໍາມະການພັກແຂວງ, ຮອງປະທານຄະນະປະຈໍາສະພາປະຊາຊົນແຂວງ ພ້ອມດ້ວຍບັນດາທ່ານ ສສຂ ມີ: ທ່ານ ສົມຈິດ ລາວຈຸ່ງ ປະທານຄະນະກຳມະການວັດທະນະທໍາ-ສັງຄົມ ແລະ ບັນດາເຜົ່າ, ທ່ານ ນາງ ພອນສະຫວັນ ສັກຕິຄຸນ ເລຂາທິການສະພາປະຊາຊົນແຂວງ ແລະ ທ່ານ ສຸວັນຟູ ລາວລີ ຮອງປະທານຄະນະກຳມະການເສດຖະກິດ, ແຜນການ ແລະ ການເງິນ ໄດ້ລົງເຄື່ອນໄຫວຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ທີ່ເທດສະບານ ເມືອງບຸນເໜືອ ລວມມີ 4 ຈຸດ: (1) ຈຸດໂຮງຮຽນທິດສະດີການເມືອງການປົກຄອງແຂວງ; (2) ຈຸດບັນດາພະແນກການ; (3) ຈຸດພະແນກສຶກສາທິການ ແລະ ກິລາແຂວງ; (4) ຈຸດ ປກສ ແຂວງ.

ການລົງເຄື່ອນໄຫວຄັ້ງນີ້, ເພື່ອຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ໃນນີ້, ວຽກງານສະພາແຫ່ງຊາດ ມີ 20 ສະບັບ ແລະ ວຽກງານສະພາປະຊາຊົນແຂວງ ມີ 4 ສະບັບ, ນອກຈາກນີ້, ຍັງໄດ້ຜັນຂະຫຍາຍຄໍາແນະນໍາຂອງຄະນະປະຈໍາສະພາແຫ່ງຊາດ ສະບັບເລກທີ 18/ຄປຈ, ລົງວັນທີ 23 ສິງຫາ 2024 ວ່າດ້ວຍ ການປຸກລະດົມໃຫ້ທົ່ວສັງຄົມເຫັນໄດ້ຄວາມສໍາຄັນຂອງການສຶກສາ ແລະ ນໍາເອົາລູກຫລານຂອງຕົນມາເຂົ້າຮຽນ ສົກຮຽນໃໝ່ 2024-2025 ໃຫ້ຫຼາຍຂື້ນ ອີກດ້ວຍ.

ຜ່ານການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່, ກອງປະຊຸມໄດ້ຕີລາຄາສູງ ເພາະຜູ້ເຂົ້າຮ່ວມກອງປະຊຸມ ໄດ້ໃຫ້ຄວາມສໍາຄັນ ແລະ ມີຄວາມເອົາໃຈໃສ່ໃນການເຊື່ອມຊຶມ, ຮັບຟັງຕໍ່ການບັນຍາຍ ຂອງບັນດາທ່ານ ສສຂ, ເຮັດໃຫ້ຜູ້ແທນກອງປະຊຸມຮັບຮູ້, ເຂົ້າໃຈ ຕໍ່ເນື້ອໃນຜົນສໍາເລັດກອງປະຊຸມສະໄໝສາມັນຄັ້ງນີ້ ໄດ້ຢ່າງເລິກເຊິ່ງ.

ການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ໃນຄັ້ງນີ້ ໄດ້ສໍາເລັດຕາມຄາດໝາຍທີ່ວາງໄວ້.

ພາບ-ຂ່າວ: ພຸດສະດີ