ໃນວັນທີ 11 ກັນຍາ 2024. ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 17 ແລະ ສະມາຊິກສະພາປະຊາຊົນແຂວງ ເຂດເລືອກຕັ້ງເມືອງສະໜາມໄຊ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງຢູ່ບ້ານໜອງມ່ວງ ເມືອງສະໜາມໄຊ ແຂວງອັດຕະປື ເຊິ່ງນໍາໂດຍທ່ານ ນາງ ມີນາພອນ ໄຊສົມພູ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17 ປະທານສະພາປະຊາຊົນແຂວງ ພ້ອມດ້ວຍຄະນະ ເພື່ອຢ້ຽມຢາມຖາມຂ່າວ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງອັດຕະປື ຊຸດທີ II, ເຂົ້າຮ່ວມມີ ຄະນະສະເພາະກິດປະຈໍາເມືອງ, ບໍລິສັດຮົງກົງທຽນຊື, ອໍານາດການປົກຄອງບ້ານໜອງມ່ວງ, ບ້ານມັດກາ ແລະ ປະຊາຊົນຜູ້ມີສິດເລືອກຕັ້ງທັງສອງບ້ານເຂົ້າຮ່ວມຮັບຟັງຫຼາຍກວ່າ 150 ຄົນ.
ໂອກາດນີ້, ທ່ານ ຄໍາພັດ ແກ້ວມື່ນຕ່າງ ນາຍບ້ານໜອງມ່ວງ ໄດ້ລາຍງານສະພາບການໂດຍຫຍໍ້ຂອງບ້ານ ເຊິ່ງປະກອບມີພົນລະເມືອງທັງໝົດ 408 ຄົນ 152 ຫຼັງຄາເຮືອນ, 196 ຄອບຄົວ, ປະຊາຊົນສ່ວນຫຼາຍຍຶດຖືອາຊີບທໍາການຜະລິດ (ປູກມັນຕົ້ນ) ພ້ອມທັງໄດ້ສະເໜີຕໍ່ຄະນະທີ່ມາເຄື່ອນໄຫວໃນຄັ້ງນີ້ເພື່ອປັບປຸງຊີວີດການເປັນຢູ່ທີ່ດີຂື້ນ ແລະ ຄວາມຂັດຂ້ອງໝອງໃຈ ຂອງປະຊາຊົນເປັນຕົ້ນ: ການຈັດສັດເນື້ອທີ່ດີນ, ປັບປຸງສ້າງທາງແຕ່ບ້ານໄປຫາຫ້ວຍລີງ ແລະ ຊ່ວຍດ້ານງົບປະມານເພື່ອເປັນກອງທຶນໝູນວຽນຂອງບ້ານ ແລະ ບັນຫາອື່ນໆ.
ຈາກນັ້ນ, ທ່ານ ນາງ ມີນາພອນ ໄຊສົມພູ ໄດ້ຍົກໃຫ້ເຫັນກ່ຽວກັບຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX, ສະພາປະຊາຊົນແຂວງ ຊຸດທີ II ແລະ ສະພາບການຂອງໂລກ ລວມທັງ ສປປລາວໂດຍສະເພາະແຂວງອັດຕະປື ພວມມີການຜັນແປ ຢ່າງສະຫຼັບຊັບຊ້ອນ ແລະ ມີຄວາມຫຍຸ້ງຍາກທາງດ້ານເສດຖະກິດ-ການເງິນ, ການເໜັງຕີງຂອງລາຄານໍ້າມັນ, ສິນຄ້າອຸປະໂພກ-ບໍລິໂພກ, ອັດຕາແລກປ່ຽນ ແລະ ອັດຕາເງິນເຟີ້ສູງ ເຊິ່ງສົ່ງຜົນກະທົບຕໍ່ການພັດທະນາ, ການດໍາລົງຊີວິດຂອງພະນັກງານ-ລັດຖະກອນ, ທະຫານ, ຕໍາຫຼວດ ແລະ ປະຊາຊົນລາວບັນດາເຜົ່າ, ພ້ອມທັງນີ້ຍັງສະເໜີໃຫ້ອຳນາດການປົກຄອງບ້ານ ແລະ ປະຊາຊົນ ສືບຕໍ່ຍຶດໝັ້ນຕໍ່ການນຳພາຂອງພັກ-ລັດ, ຮັກສາມູນເຊື້ອທີ່ຍາດມາໄດ້ໃນທ່າມກາງສະພາບການຫຍຸ້ງຍາກທາງດ້ານເສດຖະກິດ ໃຫ້ສ້າງເງື່ອນໄຂຄອບຄົວ ປູກຝັງ, ລ່ຽງສັດ, ຜະລິດເອງ ກຸ້ມຕົນເອງ ເປັນເຈົ້າຕົນເອງ, ເອົາໃຈໃສ່ປຸກລະດົມປູກຝັງຈິດສຳນຶກ, ສາມັກຄີປອງດອງເປັນປືກແຜ່ນແໜ້ນໜາ ແລະ ສົ່ງເສີມໃຫ້ລູກຫຼານໄດ້ຮ່ຳຮຽນ ແລະ ຄໍາສະເໜີຂອງອໍານາດການປົກຄອງບ້ານ ແລະ ປະຊາຊົນ ບາງບັນຫາຈະນໍາໄປຄົ້ນຄວ້າພິຈະລະນາກັບພາກສ່ວນທີ່ກ່ຽວຂ້ອງຢ່າງສົມເຫດສົມຜົນ ຕາມລະບຽບກົດໝາຍ.
(ວິນັດ ສີສຸລາດ)