ໃນວັນທີ 03 ກັນຍາ 2024, ຢູ່ທີ່ຫ້ອງປະຊຸມໃຫຍ່ ຂອງ ສະພາປະຊາຊົນແຂວງ ທ່ານ ສິງຕັນ ໄຊລືຊົ່ງ ຮອງປະທານສະພາປະຊາຊົນແຂວງໄດ້ເຂົ້າຮ່ວມກອງປະຊຸມປຶກສາຫາລື ການຈັດຕັ້ງປະຕິບັດຍຸດທະສາດ, ການປະຕິຮູບລະບົບການສຶກສາ ແລະ ການພັດທະນາຊັບພະຍາກອນມະນຸດແຫ່ງຊາດ ພາຍໃຕ້ການເປັນປະທານ ຂອງ ທ່ານ ນາງ ວິໄຊ ສຣິດທິຣາດ ຮອງປະທານກຳມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ, ຮອງຫົວໜ້າຄະນະຕິດຕາມກວດກາ ການຈັດຕັ້ງປະຕິບັດຍຸດທະສາດ ການປະຕິຮູບລະບົບການສຶກສາ ແລະ ການພັດທະນາຊັບພະຍາກອນມະນຸດແຫ່ງຊາດ ໃຫ້ກຽດເຂົ້າຮ່ວມມີທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ, ທ່ານ ນາງ ແກ້ວລາ ມະນີຈິດ ຄະນະປະຈຳ, ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ທ່ານ ປອ ອາຄົມ ປຣະເສີດ ຮອງເລຂາທິການສະພາແຫ່ງຊາດ ຕະຫຼອດຮອດ ຫົວໜ້າ-ຮອງຫົວໜ້າພະແນກ, ຫົວໜ້າ-ຮອງຫົວໜ້າຫ້ອງການນະຄອນ, ຄະນະບ້ານ ພາຍໃນເທດສະບານ ນະຄອນ-ຫຼວງພະບາງ ທີ່ກ່ຽວຂ້ອງ ເຂົ້າຮ່ວມລວມມີ 63​ ທ່ານ, ຍິງ 15 ທ່ານ.

ເພື່ອຮັບປະກັນ ການຈັດຕັ້ງປະຕິບັດຍຸດທະສາດ ການປະຕິຮູບລະບົບການສຶກສາ ແລະ ພັດທະນາຊັບພະຍາກອນມະນຸດແຫ່ງຊາດ ຍາມໃດສູນກາງພັກ ກໍ່ໄດ້ຖືເອົາການພັດທະນາຊັບພະຍາກອນມະນຸດ ເປັນປັດໃຈສຳຄັນ ໃນການພັດທະນາເສດຖະກິດ-ສັງຄົມ ຖືເອົາວຽກງານກາສຶກສາ ໄປກ່ອນວຽກງານອື່ນບາດກ້າວໜຶ່ງ, ຖືເອົາວຽກງານການສຶກສາເປັນໃຈກາງ ໃນການປະຕິວັດທາງດ້ານແນວຄິດ, ເພື່ອໃຫ້ປະຊາຊົນບັນດາເຜົ່າ ກໍ່ຄືພົນລະເມືອງລາວທຸກຄົນ ສາມາດເຂົ້າເຖິງການສຶກສາ ແລະ ກິລາກາຍະກຳທີ່ມີຄຸນນະພາບ, ເທົ່າທຽມ, ທົ່ວເຖິງ ແລະ ສົ່ງເສີມການຮຽນຮູ້ຕະຫຼອດຊີວິດ ສຳລັບທຸກຄົນ, ເພື່ອໃຫ້ບັນລຸເປົ້າໝາຍການພັດທະນາແບບຍືນຍົງ ໃນປີ 2030 ສະນັ້ນ ຈຶ່ງໄດ້ນຳມາປຶກສາຫາລື, ແລກປ່ຽນບົດຮຽນ, ຄຳຄິດເຫັນ ຮ່ວມກັບທ້ອງຖິ່ນຮາກຖານ ເພື່ອຊອກຫາຊ່ອງທາງ, ວິທີການແກ້ໄຂ ກ່ຽວກັບການປະລະການຮຽນ, ອັດຕາການເຂົ້າຮຽນຫຼຸດລົງ, ການສຳເລັດການສຶກສາແລ້ວຍັງບໍ່ສາມາດປະກອບອາຊີບໄດ້ ເຊິ່ງໄດ້ສົ່ງຜົນກະທົບໂດຍກົງຕໍ່ການສຶກສາ ຖ້າພວກເຮົາບໍ່ຮີບຮ້ອນແກ້ໄຂ ຈະກະທົບຕໍ່ການພັດທະນາຊັບພະຍາກອນມະນຸດແຫ່ງຊາດ ໃນໄລຍະຍາວ ໂດຍສະເພາະເດັກໄວໜູ່ມ, ແລະ ຊາວໜຸ່ມ ທີ່ຈະເປັນຜູ້ສືບທອດອານາຄົດຂອງປະເທດຊາດ.

ດ້ວຍເຫດຜົນດັ່ງກ່າວ ສະພາແຫ່ງຊາດ ແລະ ສະພາປະຊາຊົນແຂວງ ໃນຖານະເປັນອົງການຕົວແທນແຫ່ງສິດ ແລະ ຜົນປະໂຫຍດ ຂອງ ປະຊາຊົນບັນດາເຜົ່າ ຈຶ່ງມີຄວາມຈຳເປັນຕ້ອງດຳເນີນການຕິດຕາມກວດກາ ເພື່ອໃຫ້ເຫັນຜົນສຳເລັດດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ທິດທາງແຫ້ໄຂໃນຕໍ່ໜ້າ ເພື່ອຊຸກຍູ້ວຽກງານການພັດທະນາຊັບພະຍາກອນມະນຸດ ກໍ່ຄືວຽກງານການສຶກສາ ແລະ ກິລາ ໃຫ້ມີປະສິດທິພາບ ປະສິດທິຜົນສູງກວ່າເກົ່າ ທຸກຄົນໄດ້ຮັບການສຶກສາທີ່ມີຄຸນນະພາບ ແລະ ເທົ່າທຽມກັນ.

ຂ່າວ: ວິລິຍະ ວັນນະສີ