(ສພຊ) – ກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ໄດ້ຈັດກອງປະຊຸມເຝິກ ອົບຮົມສ້າງຄວາມເຂັ້ມແຂງໃຫ້ບຸກຄະລາກອນທີ່ເປັນເສນາທິການໃຫ້ແກ່ ກສຕສ, ຄະນະກໍາມະການເສດຖະກິດ, ແຜນການ ແລະ ການເງິນ ຂອງສະພາປະຊາຊົນຂັ້ນແຂວງທົ່ວປະເທດ ປະຈໍາປີ 2024 ໂດຍການເປັນປະທານຂອງທ່ານ ມະນີໂສ ຊາມຸນຕີ ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ.

ຜູ້ເຂົ້າຮ່ວມໄດ້ຮັບຟັງການສະເໜີບົດຮຽນຄວາມຮັບຮູ້ ແລະ ຄວາມເຂົ້າໃຈກ່ຽວກັບວຽກງານຫັນເປັນດິຈິຕອນ ຂອງ ສປປລາວ, ການຕິດຕາມກວດກາການຄຸ້ມຄອງສິ່ງແວດລ້ອມຂອງໂຄງການລົງທຶນ ແລະ ຂັ້ນຕອນການຄົ້ນຄວ້າໜັງສືສະເໜີຂອງລັດຖະບານ ຕໍ່ຄະນະປະຈໍາສະພາແຫ່ງຊາດ ກ່ຽວກັບໂຄງການລົງທຶນຂອງລັດຂົງເຂດເສດຖະກິດ; ພ້ອມກັນນັ້ນ, ຍັງໄດ້ຕິດຕາມ, ເກັບກຳຂໍ້ມູນ, ຮຽນຮູ້, ຄົ້ນຄວ້າ, ທົດສອບວິທີການຄົ້ນຄວ້າ, ຂີດຂຽນ ແລະ ສົນທະນາແລກປ່ຽນບົດຮຽນເຊິ່ງກັນແລະກັນ ເພື່ອຮັບປະກັນໃຫ້ການນຳເອົາບົດຮຽນທີ່ໄດ້ຄົ້ນຄວ້າຮ່ຳຮຽນ ສາມາດນຳໄປໝູນໃຊ້ເຂົ້າໃນວຽກງານຕົວຈິງ ໃຫ້ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ.

ທ່ານ ມະນິໂສ ຊາມຸນຕີ ກ່າວວ່າ: ຜ່ານການເຝິກອົບຮົມຄັ້ງນີ້ ສາມາດຕີລາຄາໄດ້ວ່າ ບັນດາສຳມະນາກອນສາ ມາດເຂົ້າໃຈເນື້ອໃນຂອງບັນຫາຕ່າງໆຢ່າງເລິກເຊິ່ງ ແລະ ຈະສາມາດນໍາໄປຈັດຕັ້ງປະຕິບັດເຂົ້າໃນວຽກງານຕົວຈິງໄດ້ດີພໍສົມຄວນ ໃນການເປັນເສນາທິການໃຫ້ແກ່ກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ແລະ ຄະນະກໍາມະການເສດຖະກິດ, ແຜນການ ແລະ ການເງິນ; ພ້ອມນັ້ນ, ກໍສຸມສະຕິປັນຍາ, ຄົ້ນຄວ້າ ແລະ ມີຄວາມຮັບຜິດຊອບສູງ ສຸມໃສ່ສົນທະນາແລກປ່ຽນຄໍາຄິດຄໍາເຫັນຢ່າງກົງໄປກົງມາ ໂດຍຍົກໃຫ້ເຫັນເຖິງສະພາບການທີ່ເກີດຂຶ້ນຕົວຈິງໃນທ້ອງ ຖິ່ນຕົນເອງ ແລະ ບາງບັນຫາທີ່ພົບຄວາມຫຍຸ້ງຍາກ ກໍໄດ້ສະເໜີຂໍທິດຊີ້ນໍາ. ຫວັງວ່າບັນດາສຳມະນາກອນຈະນໍາເອົາບົດຮຽນຄັ້ງນີ້ ໄປຈັດຕັ້ງຜັນຂະຫຍາຍເຂົ້າໃນການປະຕິບັດໜ້າທີ່ວຽກງານໃຫ້ມີປະສິດທິຜົນດີຂຶ້ນກວ່າເກົ່າ ແລະ ນໍາເອົາບົດຮຽນນີ້ ໄປເຝິກອົບຮົມໃຫ້ແກ່ພະນັກງານຢູ່ສະພາປະຊາຊົນຂັ້ນແຂວງຕົນ ຮັບຮູ້ຕໍ່ວຽກງານດັ່ງກ່າວນໍາກັນ.

ກອງປະຊຸມດັ່ງກ່າວ ຈັດຂຶ້ນໃນວັນທີ 6-7 ກັນຍານີ້ ທີ່ເມືອງວັງວຽງ ແຂວງວຽງຈັນ, ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs) ແລະ ມູນນິທິເວດມິນເທີ ເພື່ອປະຊາທິປະໄຕ (WFD) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະ​ເລຂາທິການ​ສະພາ​ແຫ່ງ​ຊາດ.

(ນາງ ອາລິນ ສຸພິມມະປະດິດ)