(ສພຊ) – ຕອນບ່າຍວັນທີ 5 ກັນຍາຜ່ານມາ ທີ່ສະພາແຫ່ງຊາດ, ທ່ານ ສັນຍາ ປຣະເສີດ ປະທານກໍາມາທິການ ການຕ່າງປະເທດ (ກຕທ) ໄດ້ພົບປະເຮັດວຽກຮ່ວມກັບທ່ານ ນາງ ແອນນາ ເອສເທີວຽນວັນເດສ ເອກອັກຄະລັດຖະທູດ ແຫ່ງ ສາທາລະນະລັດກູບາ ປະຈໍາ ສປປລາວ ເພື່ອປຶກສາຫາລືກ່ຽວກັບແຜນການຕ້ອນຮັບຄະນະຜູ້ແທນຂັ້ນສູງ ຂອງກູບາ ທີ່ຈະມາຢ້ຽມຢາມ, ເຮັດວຽກ ແລະ ເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ຢູ່ ສປປລາວ.

 

ທ່ານ ສັນຍາ ປຣະເສີດ ໄດ້ສະແດງຄວາມຍິນດີຕ້ອນຮັບ ທັງແຈ້ງໃຫ້ຊາບໂດຍຫຍໍ້ກ່ຽວກັບການກະກຽມຄວາມພ້ອມໃນການເປັນເຈົ້າພາບກອງປະຊຸມໄອປາຄັ້ງທີ 45; ພ້ອມກັນນັ້ນ, ກໍສະແດງຄວາມຂອບໃຈຕໍ່ການມາພົບປະ ແລະ ເຮັດວຽກໃນຄັ້ງນີ້ ເຊິ່ງເປັນການປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອລະຫວ່າງ ສປປລາວ-ສ.ກູບາ ຢ່າງສະເໝີຕົ້ນສະເໝີປາຍ.

ທ່ານ ນາງ ແອນນາ ເອສເທີວຽນວັນເດສ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ພ້ອມທັງແຈ້ງໃຫ້ຊາບໂດຍຫຍໍ້ຈຸດປະສົງການມາເຮັດວຽກຮ່ວມໃນຄັ້ງນີ້ ພ້ອມທັງປຶກສາຫາລືກ່ຽວກັບການກະກຽມການຕ້ອນຮັບຄະນະຜູ້ແທນຂັ້ນສູງຂອງກູບາ ທີ່ຈະເດີນທາງມາຢ້ຽມຢາມ ສປປລາວ ໃນອະນາຄົດອັນໃກ້ນີ້.

(ສອນສັກ ວັນວິໄຊ)