(ສພຊ) ວັນອັງຄານທີ 29 ພຶດສະພາຜ່ານມາ ທີ່ສະພາແຫ່ງຊາດ ສະຫາຍ ບຸນປອນ ບຸດຕະນະວົງ ກຳມະການສູນກາງພັກ ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງຄະນະຜູ້ແທນຂັ້ນສູງແນວໂຮມປະເທດຊາດຫວຽດນາມ ນຳໂດຍສະຫາຍ ເຫົ່າ ອາ ເລັ່ງ ກຳມະການສູນກາງພັກກອມມູນິດຫວຽດນາມ ຮອງປະທານແນວໂຮມປະເທດຊາດຫວຽດນາມ, ເລຂາທິການໃຫຍ່ແນວໂຮມປະເທດຊາດຫວຽດນາມ ໃນໂອກາດທີ່ມາຢ້ຽມຢາມ ສປປລາວ ລະຫວ່າງວັນທີ 28-31 ພຶດສະພາ 2018 ເພື່ອພົບປະສອງຝ່າຍ ກັບສູນກາງແນວລາວສ້າງຊາດ ໃນການແລກປ່ຽນຂໍ້ມູນຂ່າວສານ, ແລກປ່ຽນປະສົບການກ່ຽວກັບວຽກງານແນວໂຮມ, ຕີລາຄາຜັນຂະຫຍາຍປະຕິບັດບັນດາເນື້ອໃນ ຕາມຜົນກອງປະຊຸມສາກົນວ່າດ້ວຍການສ້າງເສັ້ນຊາຍແດນສັນຕິພາບ, ມິດຕະພາບລາວ-ຫວຽດນາມ ທີ່ໄດ້ເຊັນກັນຢູ່ແຂວງກວ່າງບິ່ງໃນເດືອນກໍລະກົດ 2017 ຜ່ານມາ.
ໂອກາດນີ້, ສະຫາຍ ບຸນປອນ ບຸດຕະນະວົງ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ໝາກຜົນການເຮັດວຽກຮ່ວມກັນ ລະຫວ່າງສອງອົງການແນວໂຮມປະເທດຊາດຫວຽດນາມ ແລະແນວລາວສ້າງຊາດ ສປປລາວ ທ່ານໄດ້ກ່າວວ່າ: ການພົບປະເຮັດວຽກໃນຄັ້ງນີ້ໄດ້ສ້າງເງື່ອນໄຂອັນດີໃຫ້ແກ່ສູນກາງແນວລາວສ້າງຊາດໃນການສຶກສາຄົ້ນຄວ້າ ແລະ ສືບຕໍ່ປັບປຸງວຽກງານຂອງຕົນເອງໃຫ້ເຂັ້ມແຂງຂຶ້ນກວ່າເກົ່າ ເພາະວ່າແນວລາວສ້າງຊາດເປັນຕົວແທນໃຫ້ແກ່ທຸກຊັ້ນຄົນໃນທົ່ວສັງຄົມ ໃນການສ້າງສາພັດທະນາປະເທດຊາດ ເປັນກະບອກສຽງສຳຄັນໃຫ້ແກ່ປະຊາຊົນຕໍ່ກັບບັນຫາຕ່າງໆທີ່ເກີດຂຶ້ນຢູ່ໃນສັງຄົມ ເພື່ອນຳສະເໜີແກ່ສະພາແຫ່ງຊາດ ກໍຄືລັດຖະບານ ພ້ອມທັງເຊື່ອໝັ້ນວ່າການພົບປະເຮັດວຽກໃນຄັ້ງນີ້ຈະເປັນສ່ວນສຳຄັນໃນການປະກອບສ່ວນເຂົ້າໃນສາຍພົວພັນມິດຕະພາບໃຫ້ແໜ້ນແຟ້ນ ຂຶ້ນຕື່ມ; ພ້ອມທັງສະເໜີໃຫ້ມີການແລກປ່ຽນຂໍ້ມູນຂ່າວສານ ແລະ ບົດຮຽນຕ່າງໆເພື່ອມາເຜີຍແຜ່ໃຫ້ແກ່ແນວລາວສ້າງຊາດ ກໍຄືສະພາແຫ່ງຊາດຕື່ມອີກ.
ສະຫາຍ ເຫົ່າ ອາ ເລັ່ງ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງທ່ານຮອງປະທານສະພາແຫ່ງຊາດ ພ້ອມທັງລາຍງານຜົນຂອງການພົບປະສອງຝ່າຍ ກັບແນວລາວສ້າງຊາດ ເຊິ່ງທ່ານລາຍງານໃຫ້ຮູ້ວ່າ: ຄະນະກຳມະການສູນກາງແນວໂຮມປະເທດຊາດຫວຽດນາມໃນໄລຍະ 5 ເດືອນຜ່ານມາສາມາດລົງນາມເອກະສານສຳຄັນຕ່າງໆທີ່ກ່ຽວຂ້ອງກັບການປະສານງານທີ່ສຳຄັນ ເປັນຕົ້ນແມ່ນລົງນາມຮ່ວມໃນເອກະສານກົນໄກການປະສານງານລະຫວ່າງແນວໂຮມປະເທດຊາດຫວຽດນາມກັບຄະນະປະຈຳສະພາແຫ່ງຊາດ, ປະທານປະເທດ ແລະ ລັດຖະບານ ກໍຄືນາຍົກລັດຖະມົນຕີ ບັນດາເອກະສານດັ່ງກ່າວນັ້ນລ້ວນແຕ່ມີຄວາມໝາຍຄວາມສຳຄັນເປັນຢ່າງຍິ່ງໃນການປະສານງານ ກໍຄືການນຳພາລວມໃຫ້ແກ່ການເຄື່ອນໄຫວຂອງແນວໂຮມປະເທດຊາດຫວຽດນາມ ກັບການເຄື່ອນໄຫວຂອງນາຍົກລັດຖະມົນຕີ, ປະທານປະເທດ ກໍຄືປະທານສະພາແຫ່ງຊາດ; ພ້ອມກັນນັ້ນກໍໄດ້ກຳນົດຢ່າງຈະແຈ້ງກ່ຽວກັບພາລະບົດບາດຂອງແນວໂຮມປະເທດຊາດຫວຽດນາມໃນວຽກງານກໍ່ສ້າງພັກກໍ່ສ້າງລັດຖະບານ; ສຳລັບການຮ່ວມມືລະຫວ່າງແນວໂຮມປະເທດຊາດຫວຽດນາມກັບແນວລາວສ້າງຊາດ ສປປລາວ ນັ້ນ ໄດ້ມີການຜັນເນື້ອໃນເປັນອັນລະອຽດຂອງຂະແຫນງການຮ່ວມ ລະຫວ່າງແນວລາວສ້າງຊາດ ກັບແນວໂຮມປະເທດຊາດຫວຽດນາມ ກ່ຽວກັບການສ້າງສາຍພົວພັນມິດຕະພາບໃຫ້ກາຍເປັນສາຍພົວພັນສັນຕິພາບ ມິດຕະພາບ ແລະ ການຮ່ວມມືເພື່ອການພັດທະນາ; ພ້ອມທັງສະເໜີໃຫ້ສືບຕໍ່ອຳນວຍຄວາມສະດວກໃຫ້ແກ່ການເຄື່ອນໄຫວຂອງແນວລາວສ້າງຊາດ, ສືບຕໍ່ໃຫ້ການສະໜັບສະໜູນ, ຊຸກຍູ້ແນວລາວສ້າງຊາດ, ແລກປ່ຽນການພົວພັນ, ແລກປ່ຽນບົດຮຽນໃນລະດັບຕ່າງໆ ກັບແນວໂຮມປະເທດຊາດຫວຽດນາມ.