(ສພຊ) – ກອງປະຊຸມໃຫຍ່ ຄັ້ງທີ I ຂອງໜ່ວຍແມ່ຍິງຮາກຖານສະຖາບັນຄົ້ນຄວ້ານິຕິກໍາສະພາແຫ່ງຊາດ (ສນສ) ໄດ້ເປີດຂຶ້ນ ແລະ ປິດລົງດ້ວຍຜົນສໍາເລັດຢ່າງຈົບງາມ ໃນຕອນບ່າຍວັນສຸກທີ 30 ສິງຫາຜ່ານມາ ໂດຍການເປັນປະທານຮ່ວມຂອງສະຫາຍ ຄໍາແທ່ນ ວິລະກຸນ ຄະນະໜ່ວຍພັກຮາກຖານສະຖາບັນຄົ້ນຄວ້ານິຕິກຳ, ສະຫາຍ ນາງ ຄໍາຫຼ້າ ສິດທະຈອນ ຄະນະບໍລິຫານງານສະຫະພັນແມ່ຍິງສະພາແຫ່ງຊາດ, ສະຫາຍ ນາງ ພິດສະໄໝ ວົງພະນະຄອນ ຫົວໜ້າໜ່ວຍແມ່ຍິງຮາກຖານສະຖາບັນຄົ້ນຄວ້ານິຕິກໍາ; ເຂົ້າຮ່ວມມີບັນດາໜ່ວຍແມ່ຍິງອ້ອມຂ້າງສະພາແຫ່ງຊາດ ພ້ອມດ້ວຍອົງການຈັດຕັ້ງມະຫາຊົນ ແລະ ສະມາຊິກໜ່ວຍແມ່ຍິງຮາກຖານສະຖາບັນດັ່ງກ່າວ.

ກອງປະຊຸມໃຫຍ່ ໄດ້ຄົ້ນຄວ້າ, ພິຈາລະນາ ແລະ ຮັບຮອງເອົາບົດລາຍງານການເມືອງ, ທິດທາງຄາດໝາຍສູ້ຊົນແຕ່ລະດ້ານ ແລະ ບົດສຳຫຼວດການນຳພາລວມຂອງໜ່ວຍແມ່ຍິງຮາກຖານສະຖາບັນຄົ້ນຄວ້ານິຕິກໍາຊຸດເກົ່າ ເຊິ່ງໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບາງບົດຮຽນທີ່ຖອດຖອນໄດ້ ໃນການນໍາພາ-ຊີ້ນໍາ ແລະ ຈັດຕັ້ງປະຕິບັດວຽກງານໃນໄລຍະຜ່ານມາ (2018-2024) ເພື່ອຮັບປະກັນໃຫ້ການເຄື່ອນໄຫວວຽກງານຂອງຄະ ນະໜ່ວຍແມ່ຍິງຮາກຖານຊຸດໃໝ່ ດີຂຶ້ນກວ່າເກົ່າ; ພ້ອມນີ້, ຍັງໄດ້ຮັບຮອງເອົາທິດທາງແຜນການນັບແຕ່ປີ 2024-2030 ແລະ ມາດຕະການຈັດຕັ້ງປະຕິບັດໃນຕໍ່ໜ້າ.

ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະໜ່ວຍແມ່ຍິງຮາກຖານຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຕະຖານ ແລະ ເງື່ອນໄຂທີ່ກຳນົດໄວ້ ເຊິ່ງມີຜູ້ອອກສະໝັກ 5 ສະຫາຍ, ເລືອກເອົາ 3 ສະຫາຍ; ກອງປະຊຸມຄັ້ງປະຖົມມະລືກຂອງໜ່ວຍແມ່ຍິງຮາກຖານສະຖາບັນຄົ້ນຄວ້ານິຕິກໍາ ສະໄໝທີ I ໄດ້ເປັນເອກະພາບເລືອກເອົາສະຫາຍ ນາງ ຕຸກຕາວັນ ອາລຸນສະຫວັດ ເປັນຫົວໜ້າ, ສະຫາຍ ນາງ ດວງພອນ ວົງທະສິດ ເປັນຮອງຫົວໜ້າ, ສະຫາຍ ນາງ ຫວ່າງທໍ່ ເຍຍປາວເຮີ ເປັນຄະນະ.

ສະຫາຍ ຄໍາແທ່ນ ວິລະກຸນ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານການເຄື່ອນໄຫວ ແລະ ການສ້າງຂະບວນການຕ່າງໆທີ່ບັນດາສະຫາຍສະມາຊິກແມ່ຍິງ ໄດ້ຕັ້ງໜ້າປະກອບສ່ວນເຂົ້າໃນການປະຕິບັດໜ້າທີ່ວຽກງານໃນໄລຍະຜ່ານມາ ພ້ອມທັງເນັ້ນໜັກໃຫ້ສືບຕໍ່ເອົາໃຈໃສ່ປະຕິບັດພາລະບົດບາດຂອງຕົນທີ່ໄດ້ກໍານົດໄວ້ໃນກົດໝາຍ ແລະ ກົດລະບຽບຂອງສະຫະພັນແມ່ຍິງລາວ; ນໍາພາສຶກສາອົບຮົມວຽກງານການເມືອງ-ແນວຄິດ ແກ່ສະມາຊິກແມ່ຍິງໃຫ້ເລິກເຊິ່ງ ດ້ວຍຫຼາຍວິທີ ໃຫ້ມີຄຸນສົມບັດສິນທໍາປະຕິວັດ, ມີຄວາມອ່ອນນ້ອມຖ່ອມຕົນ, ເຄົາລົບ ແລະ ໃຫ້ກຽດເຊິ່ງກັນແລະກັນ, ຮັກສາກຽດສັກສີ ແລະ ວັດທະນະທໍາທີ່ເປັນເອກະລັກຂອງແມ່ຍິງລາວ; ເສີມຂະ ຫຍາຍທ່າແຮງຄວາມຮູ້ຄວາມສາມາດ ກ້າຄິດ, ກ້າເຮັດ, ກ້າຮັບຜິດຊອບ; ຊຸກຍູ້ ແລະ ສ້າງເງື່ອນໄຂໃນການສຶກສາຄົ້ນ ຄວ້າ, ສະແຫວງຫາຄວາມກ້າວໜ້າ, ຊອກຮູ້ຮ່ຳຮຽນເອົາສິ່ງໃໝ່ໆ, ມີຫົວຄິດປະດິດສ້າງ, ມີຄວາມສະດຸ້ງໄວ, ດຸໝັ່ນຫ້າວຫັນ; ປະສານສົມທົບກັບຄະນະໜ່ວຍພັກຮາກຖານ ສ້າງພະນັກງານເພດຍິງໃຫ້ມີຄວາມເຂັ້ມແຂງ, ກ້າວໜ້າໃນທຸກດ້ານ ເພື່ອໃຫ້ສະມາຊິກແມ່ຍິງມີມາດຕະຖານຄົບຖ້ວນໄດ້ບັນຈຸສັບ ຊ້ອນເຂົ້າໃນຕໍາແໜ່ງພະນັກງານນໍາພາ-ຄຸ້ມຄອງໃຫ້ຫຼາຍຂຶ້ນ.
(ນາງ ໄຊໂສພາພອນ ມິ່ງມຸງຄຸນ)