ໃນຕອນເຊົ້າຂອງວັນທີ 28 ສິງຫາ 2024, ທ່ານ ນາງ ບັງອອນ ໄຊຍະສິດ ຮອງປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ (ຄສຊຂ 12) ແລະ ທ່ານ ບຸນທະວີ ພິລາວັນ ປະທານກວດກາພັກ-ລັດເມືອງ ທັງເປັນຫົວໜ້າຄະນະສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງໄຊບົວທອງ ແຂວງຄໍາມ່ວນ ພ້ອມດ້ວຍຄະນະ ໄດ້ສືບຕໍ່ເຄື່ອນໄຫວພົບປະຜູ້ມີສິດເລືອກຕັ້ງ ເພື່ອເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II, ທີ່ບ້ານນາພ້າວ ເມືອງໄຊບົວທອງ ແຂວງຄໍາມ່ວນ ໂດຍໄດ້ຮັບການຕ້ອນຮັບ ແລະ ເຂົ້າຮ່ວມ ມີຄະນະພັກເມືອງຜູ້ຊີ້ນຳເຂດ, ກຳລັງປກຊ-ປກສ, ອຳນາດການປົກຄອງບ້ານ ແລະ ຕະຫຼອດຮອດພໍ່ແມ່ປະຊາຊົນເຂົ້າຮວ່ມ.
![](https://na.gov.la/wp-content/uploads/2024/08/1-9-1-scaled.jpg)
ທ່ານ ບຸນລ້ອມ ສີຊຽງໃໝ່ ນາຍບ້ານນາພ້າວ ເມືອງໄຊບົວທອງ ໄດ້ລາຍງານໂດຍສັງເຂບຂອງນາຍບ້ານ, ກ່ຽວກັບສະພາບທີ່ຕັ້ງ ແລະ ຈຸດພິເສດ, ມີດ້ານການເມືອງ-ແນວຄິດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການພັດທະນາເສດຖະກິດ-ສັງຄົມ ແລະ ທິດທາງແຜນການຈັດຕັ້ງປະຕິບັດວຽກງານໃນຕໍ່ໜ້າ: ບ້ານນາພ້າວແມ່ນບ້ານໜຶ່ງທີ່ຫ່າງຈາກສຳນັກງານປົກຄອງເມືອງໄຊບົວທອງ 18 ກິໂລແມັດ ແລະ ມີເນື້ອໃນທີ່ທັງໝົດ 12,000 ຕາແມັດ, ເປັນເຂດທົ່ງພຽງເໝາະສົມກັບການປູກຝັງລ້ຽງສັດ, ທີ່ຕັ້ງບ້ານທິດເໝືອຕິດກັບບ້ານໂພນນາດີ, ທິດໃຕ້ຕິດກັບບ້ານໜອງຜື, ທິດຕາເວັນອອກຕິດກັບບ້ານຜາຂາດ ແລະ ທິດຕາເວັນຕົກຕິດກັບບ້ານໂພນສະຫວັນ; ພາຍໃນບ້ານມີ 11 ຄຸ້ມ, ເຊິ່ງມີຈໍານວນຄອບຄົວທັງໝົດມີ 228 ຄອບຄົວ, ມີ 189 ຫຼັງຄາເຮືອນ, ມີພົນລະເມືອງ 1,086 ຄົນ, ຍິງ 525 ຄົນ ,ຊົນເຜົ່າຜູ້ໄທ, ມີພຶ້ນຖານໂຄງລ່າງຖະໜົນຫົນທາງທຽວໄດ້ສອງລະດູສະດວກໄດ້ຕະຫຼອດປີ, ປະຊາຊົນສ່ວນໃຫ່ຍຢຶດຖືອາຊີບປູກຟັງ-ລ້ຽງສັດເປັນຕົ້ນຕໍເຊັ່ນ: ປູກເຂົ້າ, ລ້ຽງສັດ, ປູກພືດຜັກ ແລະ ການປູກສວນເພື່ອສ້າງລາຍຮັບເຂົ້າສູ່ຄອບຄົວ; ວຽກງານຜ່ານການຈັດຕັ້ງເຜີຍແຜ່ເຊື່ອມຊຶມ, ຜັນຂະຫຍາຍແນວທາງ, ແຜນນະໂຍບາຍ, ມະຕິ, ຄໍາສັ່ງ, ກົດລະບຽບຂອງພັກ ແລະ ກົດໝາຍຂອງລັດໃນໄລຍະຜ່ານມາ ສາມາດເຫັນໄດ້ຄະນະພັກ, ອຳນາດການປົກຄອງບ້ານຕະຫຼອດຮອດພໍ່ແມ່ປະຊາຊົນ ມີແນວຄິດອຸ່ນອ່ຽນທຸ່ນທ່ຽງເຊື່ອໝັ້ນ ຕໍ່ການຊີ້ນຳໆພາຂອງພັກ ແລະ ການຄຸ້ມຄອງຂອງລັດ, ມີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ເຄົາລົບ ແລະ ປະຕິບັດຕາມລະບຽບ ແລະ ກົດໝາຍຕ່າງໆທີ່ຂັ້ນເທິງວາງອອກແຕ່ລະໄລຍະຢ່າງເຂັ້ມງວດ, ປະກອບສ່ວນເຫື່ອແຮງສະຕິປັນຍາເຂົ້າໃນການພັດທະນາບ້ານເມືອງຢ່າງຕັ້ງໜ້າ; ຄະນະພັກ, ອຳນາດການປົກຄອງບ້ານນາພ້າວ ຕະຫຼອດຮອດພໍ່ແມ່ປະຊາຊົນໄດ້ມີຄວາມສາມັກຄີເປັນປຶກແຜນ; ຈາກນັ້ນ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ໄດ້ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 7 ຂອງ ສພຊ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II, ໃນນັ້ນມີບັນດາມະຕິ, ກົດໝາຍ ແລະ ນິຕິກໍາໃຕ້ກົດໝາຍ, ແລະ ບັນດາເນື້ອໃນເອກະສານບົດລາຍງານຕ່າງໆທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມ; ພ້ອມນັ້ນ, ຄະນະຜູ້ແທນໄດ້ຮັບຟັງຄໍາຄິດຄໍາເຫັນ ແລະ ຂໍ້ສະເໜີຕ່າງໆ ຈາກອຳນາດການປົກຄອງບ້ານ ແລະ ພໍ່ແມ່ປະຊາຊົນຂອງບ້ານດັ່ງກ່າວ; ບາງຄໍາເໜີ ຄະນະຜູ້ແທນຍັງໄດ້ຜັດປ່ຽນກັນອະບາຍຊີ້ແຈງບາງບັນຫາ ແລະ ບາງຂໍ້ສະເໜີ ພ້ອມທັງຈະນໍາເອົາບາງຂໍ້ສະເໜີ ໄປສະເໜີຕໍ່ອົງການປົກຄອງແຂວງ ແລະ ພາກສ່ວນທີ່ກ່ຽວຂ້ອງ ເພື່ອແກ້ໄຂຕາມສິດ ແລະ ພາລະບົດບາດຂອງຕົນ.
![](https://na.gov.la/wp-content/uploads/2024/08/IMG_3667_edit.webp)
ໃນໂອກາດດັ່ງກ່າວ, ທ່ານ ນາງ ບັງອອນ ໄຊຍະສິດ ຮອງປະທານ (ຄສຊຂ 12) ໄດ້ໂອ້ລົມ ແລະ ໃຫ້ທິດຊີ້ນຳ ກ່ອນອຶ່ນທ່ານໄດ້ສະແດງຄວາມຍ້ອງຍໍຊົມເຊີຍ ມາຍັງຄະນະພັກເມືອງຜູ້ຊີ້ນຳເຂດ, ອຳນາດການປົກຄອງບ້ານ ແລະ ຕະຫຼອດຮອດພໍ່ແມ່ປະຊາຊົນທີ່ມີຄວາມສາມັນຄີເປັນປຶກແຜນ, ໃນການສ້າງສາພັດທະນາບ້ານ, ພ້ອມນັ້ນ, ທ່ານຍັງໄດ້ເໜັ້ນໜັກໃຫ້ອຳນາດການປົກຄອງບ້ານ ແລະ ພໍ່ແມ່ປະຊາຊົນຮັກມູນເຊື່ອວັດທະນະທຳຊົນເຜົ່າ, ເປັນແບບຢ່າງໃນການພັດທະນາບ້ານ ເອົາໃຈ ໃສ່ສຶກສາອົບຮົມພໍ່ແມ່ປະຊາຊົນໃຫ້ເຊື່ອມຊືມເຂົ້າໃຈແຈ້ງ ແລະ ກຳແໜ້ນຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ແລະ ບັນດານິຕິກຳຕ່າງໆໃຫ້ເລິກເຊິ່ງ, ຊຸກຍູ້ສົ່ງເສີມໃຫ້ລູກຫຼານໄດ້ເຂົ້າສຶກສາຮ່ຳຮຽນຢ່າງເປັນປົກກະຕິ, ເພີ່ມທະວີເອົາໃຈໃສ່ຕໍ່ວຽກງານ ປກຊ – ປກສ ໃນທົ່ວບ້ານໃຫ້ຮັບ ປະກັນຄວາມສະຫງົບ ມີຄວາມເປັນລະບຽບຮຽບຮ້ອຍດີຂຶ້ນກວ່າເກົ່າເພື່ອເຮັດໃຫ້ຄອບຄົວ ແລະ ບ້ານມີຄວາມສະຫງົບປອດໄພ.
ຈາກນັ້ນ, ໃນຕອນບ່າຍຂອງວັນດຽວກັນ, ທ່ານ ຮອງປະທານ (ຄສຊຂ 12) ພ້ອມດ້ວຍຄະນະຈະໄດ້ສືບຕໍ່ເຄື່ອນໄຫວຢ້ຽມຢາມ ແລະ ເຮັດວຽກຢູ່ບ້ານໂພນສະຫວັນ ຕື່ມອີກ.