ໃນຕອນແລງຂອງ ວັນທີ 23 ສິງຫາ 2024 ຜ່ານມານີ້ ສະພາປະຊາຊົນແຂວງຫຼວງພະບາງ ໄດ້ເປີດກອງປະຊຸມ ສະໄໝວິສາມັນເທື່ອທີ 2 ຂອງສະພາປະຊາຊົນແຂວງ ຊຸດທີ II ຂຶ້ນ, ເພື່ອພິຈາລະນາ ແລະ ຮັບຮອງເອົາຮ່າງຂໍ້ຕົກລົງຂັ້ນແຂວງ ແລະ ຕົກລົງບັນຫາພື້ນຖານຂອງແຂວງ, ພາຍໃຕ້ການເປັນປະທານຂອງ ທ່ານ ວົງສະຫວັນ ເທບພະຈັນ ປະທານ ຄະນະປະຈໍາສະພາປະຊາຊົນແຂວງ, ເຂົ້າຮ່ວມກອງປະຊຸມມີບັນດາທ່ານຮອງປະທານ, ຮອງເຈົ້າແຂວງ, ຄະນະກໍາມະການ, ເລຂາທິການ, ສະມາຊິກສະພາປະຊາຊົນແຂວງ, ພາກສ່ວນທີ່ກ່ຽວຂ້ອງຂອງແຂວງ, ແຂກຖືກເຊີນ ພ້ອມດ້ວຍພະນັກງານ-ລັດຖະກອນເຂົ້າຮ່ວມ.

ກອງປະຊຸມໄດ້ຮັບຟັງການໜັງສືສະເໜີ ຮັບຮອງການຍົກຍ້າຍ ແລະແຕ່ງຕັ້ງຫົວໜ້າ ອົງການໄອຍະການປະຊາຊົນ ເຂດ IV ແຂວງຫຼວງພະບາງເຊຶ່ງໄດ້ເຫັນດີ ຮັບຮອງເອົາການສະເໜີການຍົກຍ້າຍ ແລະ ແຕ່ງຕັ້ງ ທ່ານ ບຸນມີ ສີດາພອນ ຮອງຫົວໜ້າອົງການໄອຍະການປະຊາຊົນ ເຂດ II ເປັນຫົວໜ້າອົງການໄອຍະການປະຊາຊົນເຂດ IV ແຂວງຫຼວງພະບາງ, ຈາກນັ້ນກອງປະຊຸມ ໄດ້ພິຈາລະນາຮັບຮອງເອົາ ການສະເໜີ ຮ່າງຂໍ້ຕົກລົງຂອງ ທ່ານເຈົ້າແຂວງຫຼວງພະບາງ, ວ່າດ້ວຍການກຳນົດສິດທິ ແລະ ນະໂຍບາຍ ຕໍ່ຜູ້ທີ່ໄດ້ຮັບຜົນກະທົບ ຈາກໂຄງການຂຸດຄົ້ນ ແລະ ປຸງແຕ່ງແຮ່ທອງ ຢູ່ເມືອງຈອມເພັດ ຂອງບໍລິສັດ ຫຼວງພະບາງ ຂຸດຄົ້ນແຮ່ທອງ (ລາວ) ຈຳກັດຜູ້ດຽວ ແລະ ການຮັບຮອງເອົາການກຳນົດລາຄາຫົວໜ່ວຍຊົດເຊີຍ ຜົນກະທົບຈາກໂຄງການຂຸດຄົ້ນ ແລະ ປຸງແຕ່ງແຮ່ທອງຢູ່ເມືອງ ຈອມເພັດ ແຂວງຫຼວງພະບາງຕື່ມອີກ.

                          ຂ່າວໂດຍ: ຄໍາຫຼ້າ ພອນພິລາ