(ສພຊ) – ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານນັບແຕ່ປີ 2018 ເຖິງປັດຈຸບັນ ຂອງໜ່ວຍແມ່ຍິງຮາກຖານກຳມາທິການວຽກງານສະມາຊິກສະພາແຫ່ງຊາດ (ກວສຊ) ໄດ້ຈັດຂຶ້ນໃນຕອນເຊົ້າວັນທີ 22 ສິງຫາຜ່ານມາ ໂດຍມີສະຫາຍ ສຸບັນ ສະວະບຸດ ຄະນະບໍລິຫານງານພັກສະພາແຫ່ງຊາດ, ເລຂາໜ່ວຍພັກຮາກຖານ ກວສຊ, ສະຫາຍ ນາງ ອຸດນາລີ ໄຊຍະສັກ ຄະນະບໍລິຫານງານສະຫະພັນແມ່ຍິງສະພາແຫ່ງຊາດ, ຄະນະໜ່ວຍພັກຮາກຖານ, ຕາງໜ້າອົງການຈັດຕັ້ງມະຫາຊົນພາຍໃນຮາກຖານ ແລະ ບັນດາສະມາຊິກແມ່ຍິງຮາກຖານກຳມາທິການດັ່ງກ່າວ ເຂົ້າຮ່ວມທັງໝົດ 13 ສະຫາຍ ຍິງ 7 ສະຫາຍ.
ກອງປະຊຸມໄດ້ຜ່ານບົດສະຫຼຸບການເຄື່ອນໄຫວວຽກງານນັບແຕ່ປີ 2018-2024 ແລະ ທິດທາງແຜນການ 5 ປີໃນຕໍ່ໜ້າ (2025-2029); ຜ່ານຂໍ້ຕົກລົງຂອງຄະນະບໍລິຫານງານສະຫະພັນແມ່ຍິງສະພາແຫ່ງຊາດ ວ່າດ້ວຍການຮັບຮອງເອົາຄະນະໜ່ວຍແມ່ຍິງຮາກຖານກໍາມາທິການວຽກງານສະມາຊິກສະພາແຫ່ງຊາດຊຸດໃໝ່ ເຊິ່ງປະ ກອບມີສະຫາຍ ນາງ ເສົາວະພາ ພົນຈັນເຮືອງ ເປັນຫົວໜ້າ, ສະຫາຍ ນາງ ລັດດາພອນ ອຸ່ນນະລາດ ເປັນຮອງຫົວໜ້າ, ສະຫາຍ ນາງ ພັດສະລີ ປາທິລາດ ເປັນຄະນະ.
ສະຫາຍ ສຸບັນ ສະວະບຸດ ໄດ້ມີຄໍາເຫັນໂອ້ລົມ-ຊີ້ນໍາ ເຊິ່ງເນັ້ນໃຫ້ຄະນະໜ່ວຍແມ່ຍິງຮາກຖານຊຸດໃໝ່ ພ້ອມກັບສະມາຊິກພາຍໃນໜ່ວຍ ເອົາໃຈໃສ່ບາງບັນຫາທີ່ສຳຄັນເປັນຕົ້ນ: ຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃຫ້ເລິກເຊິ່ງ ໂດຍສະເພາະການປະຕິບັດຂໍ້ແຂ່ງຂັນ “ແມ່ຍິງ 3 ດີ” ຕິດພັນກັບຂະບວນການແຂ່ງຂັນ “ ຮັກຊາດ ແລະ ພັດທະນາ” ແລະ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນຂອງໜ່ວຍພັກ, ສະມາຊິກພັກ ໃຫ້ມີປະສິດທິພາບ ແລະ ປະສິດທິຜົນສູງ; ປັບປຸງແບບແຜນການນໍາພາໃນຂອບເຂດຄວາມຮັບຜິດ ຊອບຂອງຕົນ ໃຫ້ມີຄວາມໜັກແໜ້ນ, ເຂັ້ມແຂງ ໂດຍຢຶດໝັ້ນຫຼັກການນຳພາເປັນໝູ່ຄະນະ, ມີການແບ່ງງານ, ແບ່ງຄວາມຮັບຜິດຊອບໃຫ້ສະມາຊິກພາຍໃນໜ່ວຍຢ່າງຈະແຈ້ງ, ນໍາພາ-ຊີ້ນໍາ ພ້ອມທັງຕິດຕາມ ແລະ ຊຸກຍູ້ສະມາຊິກ ປະຕິບັດວຽກງານໃຫ້ໄດ້ທາງດ້ານປະລິມານ ແລະ ຄຸນນະພາບ; ເພີ່ມທະວີການຊຸກຍູ້ ແລະ ສ້າງເງື່ອນໄຂໃຫ້ສະມາ ຊິກ ໄດ້ເຂົ້າຮ່ວມຂະບວນການຕ່າງໆທີ່ການຈັດຕັ້ງຈັດຂຶ້ນໃຫ້ຫຼາຍ, ໃຫ້ມີຂະບວນຟົດຟື້ນ, ຫ້າວຫັນ ແລະ ມີເນື້ອໃນ ຕິດພັນກັບການຈັດຕັ້ງປະຕິບັດວຽກວິຊາສະເພາະທີ່ຢູ່ໃນຄວາມຮັບຜິດຊອບຂອງຕົນ ໃຫ້ມີຜົນສໍາເລັດ ແລະ ທັນຕາມກໍານົດເວລາ; ເພີ່ມທະວີກົນໄກການປະສານສົມທົບລະຫວ່າງໜ່ວຍແມ່ຍິງຮາກຖານກຳມາທິການສະມາ ຊິກສະພາແຫ່ງຊາດ ກັບ ໜ່ວຍພັກຮາກຖານ, ໜ່ວຍແມ່ຍິງອ້ອມຂ້າງ ແລະ ຄະນະບໍລິຫານງານສະຫະພັນແມ່ຍິງສະພາແຫ່ງຊາດ ໃຫ້ມີຄວາມແໜ້ນແຟ້ນ, ເປັນລະບົບ ແລະ ຕໍ່ເນື່ອງ.
(ອານຸສອນ ພູມມີທອນ)