(ສພຊ) – ກອງປະຊຸມຮຽບຮຽງເນື້ອໃນກົດໝາຍ 3 ສະບັບ ຂົງເຂດສະພາແຫ່ງຊາດ (ສພຊ) ໄດ້ຈັດຂຶ້ນໃນວັນທີ 19-21 ສິງຫາ 2024 ທີ່ແຂວງວຽງຈັນ ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ; ມີບັນດາທ່ານຮອງປະທານ ແລະ ກຳມະການຄະ ນະປະຈຳສະພາແຫ່ງຊາດ, ຮອງປະທານກຳມາທິການພາຍໃນ ສພຊ, ບັນດາຮອງຫົວໜ້າ, ຮອງລັດ ຖະມົນຕີຈາກກະຊວງ ແລະ ອົງການຈັດຕັ້ງພັກ-ລັດຂັ້ນສູນກາງທີ່ກ່ຽວຂ້ອງ, ຄະນະທີ່ປຶກສາທາງດ້ານກົດໝາຍ ພ້ອມດ້ວຍພະນັກງານຈາກພາກສ່ວນກ່ຽວຂ້ອງ ເຂົ້າຮ່ວມຢ່າງພ້ອມພຽງ.

ຈຸດປະສົງຕົ້ນຕໍແມ່ນການຮຽບຮຽງເນື້ອໃນຂອງກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ ແລະ ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ພາຍຫຼັງທີ່ໄດ້ຖືກຮັບຮອງເອົາໃນກອງປະຊຸມສະໄໝສາມັນເທື່ອທີ 7 ຂອງ ສພຊ ຊຸດທີ IX ເພື່ອໃຫ້ມີຄວາມຈະແຈ້ງ, ຮັດກຸມ, ສອດຄ່ອງກັບລັດຖະທຳມະນູນ ແລະ ກົດ ໝາຍອື່ນ ກ່ອນນຳສະເໜີກອງປະຊຸມຄະນະປະຈຳສະພາແຫ່ງຊາດ ພິຈາລະນາ ແລະ ນຳສະເໜີປະ ກາດໃຊ້ຕາມກົດໝາຍ.

ທ່ານ ປອ. ນາງ ສູນທອນ ໄຊຍະຈັກ ໄດ້ມີຄຳເຫັນກ່າວເປີດກອງປະຊຸມ ໂດຍໄດ້ເນັ້ນໜັກເຖິງຄວາມສຳຄັນຂອງການຮຽບຮຽງເນື້ອໃນ 3 ກົດໝາຍຂົງເຂດສະພາແຫ່ງຊາດ (ສະບັບປັບປຸງ) ຕາມການປະກອບຄໍາເຫັນຂອງບັນດາທ່ານສະມາຊິກສະພາແຫ່ງຊາດ ໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊຸດທີ IX ຄັ້ງວັນທີ 24 ມິຖຸນາ 2024 ເຊິ່ງຄະນະຮັບຜິດຊອບປັບປຸງ 3 ກົດໝາຍດັ່ງກ່າວ ກໍໄດ້ຄົ້ນຄວ້າພິຈາລະນາປັບປຸງສຳເລັດໂດຍພື້ນຖານ ແລະ ໃນວັນທີ 28 ມິຖຸນາ 2024 ກອງປະຊຸມສະໄໝສາມັນເທື່ອທີ 7 ໄດ້ພິຈາລະນາຮັບຮອງເອົາດ້ວຍຄະແນນສຽງເຫັນດີເປັນສ່ວນຫຼາຍແລ້ວ.

ໃນການຮຽບຮຽງທັງ 3 ກົດໝາຍນັ້ນ, ບັນດາຜູ້ແທນທີ່ເຂົ້າຮ່ວມໄດ້ຍົກສູງຄວາມຮັບຜິດຊອບຂອງຕົນໃນການຮຽບຮຽງ ເຮັດໃຫ້ເນື້ອໃນມີຄວາມຈະແຈ້ງ, ຊັນເຈນຂຶ້ນກວ່າເກົ່າ ເຊິ່ງສາມາດນຳລາຍງານຕໍ່ຄະນະປະຈຳສະພາແຫ່ງຊາດ ແລະ ກ້າວໄປເຖິງການປະກາດໃຊ້ໃນຕໍ່ໜ້າ.

(ນາງ ກຸກກິກ ບຸດດາໄຊ)