(ສພຊ) – ເພື່ອຍົກສູງຂີດຄວາມສາມາດໃຫ້ແກ່ພະນັກງານສະຖາບັນຄົ້ນຄວ້ານິຕິກຳສະພາແຫ່ງຊາດ (ສນສ) ແລະ ສະພາປະຊາຊົນແຂວງ (ສພຂ) ແນໃສ່ເຮັດໃຫ້ສາມາດປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ມີປະສິດທິຜົນ ທັງເຮັດໃຫ້ພະນັກງານມີຄວາມຮັບຮູ້, ເຂົ້າໃຈບາງທັກສະພາວະການເປັນຜູ້ນໍາ, ການຄຸ້ມຄອງ-ສໍາເນົາເອກະ ສານ, ການຮ່າງເອກະສານທາງລັດຖະການ ແລະ ມາລະຍາດທາງສັງຄົມ-ມາລະຍາດສາກົນ ທີ່ມີຄວາມຈຳເປັນໃນການປະຕິບັດວຽກງານຕົວຈິງໃຫ້ມີຜົນສໍາເລັດດີຂຶ້ນ ແລະ ເພື່ອແລກປ່ຽນ, ສົນທະນາກ່ຽວກັບບາງບົດຮຽນລະຫວ່າງວິທະ ຍາກອນ, ພະນັກງານ ສນສ ແລະ ສພຂ ທີ່ເປັນເສນາທິການ ແນໃສ່ຍົກລະດັບຄວາມຮັບຮູ້ ແລະ ຄວາມສາມາດໃນການປະຕິບັດໜ້າທີ່ການເມືອງໃຫ້ມີປະສິດທິຜົນດີ. ໃນວັນທີ 19-21 ສິງຫາ 2024 ທີ່ເມືອງວັງວຽງ ແຂວງວຽງຈັນ ໄດ້ມີກອງປະຊຸມເຝິກອົບຮົມສ້າງຄວາມເຂັ້ມແຂງດ້ານພາວະການເປັນຜູ້ນຳ, ການຄຸ້ມຄອງ-ສຳເນົາເອກະສານ, ການຮ່າງເອ ກະສານທາງລັດຖະການ ແລະ ມາລະຍາດທາງສັງຄົມ-ມາລະຍາດສາກົນ ໃຫ້ແກ່ພະນັກງານສະຖາບັນຄົ້ນຄວ້ານິຕິກຳແລະ ສະພາປະຊາຊົນແຂວງ ໂດຍການເປັນປະທານຂອງທ່ານ ສິນທະລາ ຫຼ້າສຸກສະໄໝ ຫົວໜ້າສະຖາບັນຄົ້ນຄວ້ານິຕິກຳ; ເຂົ້າຮ່ວມມີບັນດາທ່ານຮອງຫົວໜ້າສະຖາບັນ, ວິທະຍາກອນຮັບເຊີນ, ສຳມະນາກອນຈາກ ສນສ ແລະ ສພຂ 9 ແຂວງ ຄື: ຜົ້ງສາລີ, ຫຼວງນໍ້າທາ, ອຸດົມໄຊ, ຫຼວງພະບາງ, ໄຊຍະບູລີ, ຄຳມ່ວນ, ສະຫວັນນະເຂດ, ສາລະວັນ ແລະ ໄຊສົມບູນ.

ທ່ານ ສິນທະລາ ຫຼ້າສຸກສະໄໝ ມີຄຳເຫັນວ່າ: ການເຝິກອົບຮົມຄັ້ງນີ້ ເປັນກອງປະຊຸມວິຊາການທີ່ມີຄວາມໝາ ຍສໍາຄັນ ແລະ ຈໍາເປັນຢ່າງພາວະວິໄສ ຕໍ່ພະນັກງານສະຖາບັນຄົ້ນຄວ້ານິຕິກໍາ ແລະ ສະພາປະຊາຊົນແຂວງ ແນໃສ່ຍົກສູງຂີດຄວາມສາມາດໃຫ້ແກ່ສໍາມະນາກອນທີ່ປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ໃຫ້ມີປະສິດທິຜົນ ເພື່ອເປັນເສນາທິການມີຄວາມຊໍານານງານ-ຊ່ຽວຊານ ແລະ ເປັນມືອາຊີບ. ຕະຫຼອດໄລຍະການເຄື່ອນໄຫວໜ້າທີ່ວຽກງານຕົວຈິງ ເຊື່ອວ່າບັນດາທ່ານລ້ວນແຕ່ມີບົດຮຽນ, ປະສົບປະການ ບໍ່ວ່າຈະເປັນການເຂົ້າຮ່ວມເຝິກອົບຮົມ, ຍົກລະດັບໃນແຕ່ລະຂັ້ນ; ແຕ່ການເຂົ້າຮ່ວມຍົກລະດັບຄວາມຮັບຮູ້ ກໍຄືການສ້າງຄວາມເຂັ້ມແຂງຄັ້ງນີ້ ຖືວ່າເປັນການຮຽນຮູ້ເອົາບົດຮຽນ, ຫຼັກການອັນໃໝ່ໆ ຈາກວິທະຍາກອນຜູ້ທີ່ມີບົດຮຽນ, ປະສົບການໃນການສິດສອນ ກໍຄືການລົງເລິກວຽກງານອັນສະເພາະຢ່າງຫຼາກຫຼາຍ ແລະ ເປັນໂອກາດດີທີ່ຈະໄດ້ແລກປ່ຽນຄວາມເຫັນ, ຖອດຖອນບົດຮຽນ ແລະ ປະສົບການເຊິ່ງກັນແລະກັນ, ທັງນີ້ ກໍເພື່ອຖ່າຍທອດໃຫ້ແກ່ພະນັກງານເສນາທິການ ກໍຄືພະນັກງານຜູ້ສືບທອດ ເພື່ອສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ກໍຄືສະຖາບັນຄົ້ນຄວ້ານິຕິກໍາ ແລະ ສະພາປະຊາຊົນແຂວງ ໃນປັດຈຸບັນ ແລະ ຕໍ່ໜ້າ.

ຜູ້ເຂົ້າຮ່ວມໄດ້ຮັບຟັງບົດຮຽນ: ທັກສະພາວະການເປັນຜູ້ນຳທີ່ດີ ສະເໜີໂດຍທ່ານ ຮສ. ປອ. ບົວດຳ ແສງຄຳຄຸດລາວົງ ອະດີດຫົວໜ້າຫ້ອງການມະຫາວິທະຍາໄລແຫ່ງຊາດ; ການຄຸ້ມຄອງ-ສຳເນົາເອກະສານ ແລະ ການຮ່າງເອກະ ສານທາງລັດຖະການ ສະເໜີໂດຍທ່ານ ແສງດາວເດດ ກັດຕິຍະສັກ ຮອງຫົວໜ້າກົມເອກະສານແຫ່ງຊາດ, ກະຊວງພາຍໃນ; ມາລະຍາດທາງສັງຄົມ-ມາລະຍາດສາກົນ ສະເໜີໂດຍທ່ານ ຈັນໄຊ ສຸລິພົນ ຫົວໜ້າພະແນກ, ກົມພິທີການທູດ, ກະຊວງການຕ່າງປະເທດ. ຈາກນັ້ນ, ກໍໄດ້ສົນທະນາແລກປ່ຽນຄຳຄິດຄຳເຫັນຢ່າງຈິງຈັງ ແລະ ກົງໄປກົງມາຕໍ່ເນື້ອໃນແຕ່ລະຫົວຂໍ້ ເຮັດໃຫ້ການເຝິກອົບຮົມບັນລຸຜົນສຳເລັດຕາມແຜນການທີ່ວາງໄວ້.

ກອງປະຊຸມຄັ້ງນີ້ ນຳໃຊ້ງົບປະມານສົມທົບຂອງມູນນິທິເອເຊຍ (The Asia Foundation – TAF) ແລະ ຄະ ນະເລຂາທິການສະພາແຫ່ງຊາດ.

(ນາງ ສຸພາວັນ ຫອມສະນິດ)