ສະຖານເອກອັກຄະລັດຖະທູດ ແຫ່ງ ສປປລາວ ປະຈຳ ສສ.ຫວຽດນາມ ຮ່ວມກັບສະພາແຫ່ງຊາດລາວ ໄດ້ຈັດພິທີເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ (ສພຊ) ຊຸດທີ IX ເມື່ອວັນທີ 13 ສິງຫາຜ່ານມາ ໂດຍການເຜີຍແຜ່ຂອງທ່ານ ພົຕ. ປອ. ວົງສັກ ພັນທະວົງ ຄະນະປະຈຳສະພາແຫ່ງຊາດ, ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ (ກປຊສ), ມີທ່ານ ນາງ ຄຳເພົາ ເອີນທະວັນ ເອກອັກຄະລັດຖະທູດວິສາ ມັນຜູ້ມີອຳນາດເຕັມແຫ່ງ ສປປລາວ ປະຈຳ ສສ.ຫວຽດນາມ ພ້ອມດ້ວຍຄະນະນຳ, ພະນັກງານສະຖານທູດ, ການບິນລາວ ແລະ ບັນດາຜູ້ຕາງໜ້ານັກສຶກສາລາວທີ່ກຳລັງສຶກສາຮ່ຳຮຽນຢູ່ສະຖາບັນການສຶກສາໃນນະຄອນຫຼວງຮ່າໂນ້ຍ ເຂົ້າຮ່ວມຢ່າງພ້ອມພຽງ.

ທ່ານ ພົຕ. ປອ. ວົງສັກ ພັນທະວົງ ໄດ້ຍົກໃຫ້ເຫັນຫຼາຍບັນຫາສຳຄັນຂອງປະເທດຊາດທີ່ກອງປະຊຸມໄດ້ພິຈາ ລະນາ ແລະ ຮັບຮອງເອົາເຊັ່ນ: ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2024; ບົດລາຍງານຂອງອົງການກວດສອບແຫ່ງລັດກ່ຽວກັບການແກ້ໄຂຜົນການກວດສອບປະຈຳປີ 2022; ບົດລາຍງານການເຄື່ອນໄຫວວຽກງານແຕ່ກອງປະຊຸມສະໄໝສາມັນເທື່ອທີ 6 ຫາເທື່ອທີ 7 ແລະ ແຜນການຮອດກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ IX; ການພິຈາລະນາ ແລະ ຮັບຮອງເອົາການສ້າງ ແລະ ປັບປຸງກົດໝາຍ 13 ສະບັບ (ສ້າງໃໝ່ 2 ສະບັບ, ປັບປຸງ 11 ສະບັບ). ທ່ານປະທານ ກປຊສ ກ່າວອີກວ່າ: ຜົນສຳເລັດຂອງກອງປະຊຸມເທື່ອນີ້ ເປັນການຜັນຂະ ຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX ເຂົ້າສູ່ຊີ ວິດຕົວຈິງ; ແມ່ນໝາກຜົນແຫ່ງການລວມສູນສະຕິປັນຍາ, ສິດປະຊາທິປະໄຕ ກໍຄືການຍົກສູງຄວາມຮັບຜິດຊອບທາງການເມືອງຂອງບັນດາທ່ານສະມາຊິກສະພາແຫ່ງຊາດ, ການຕັດສິນໃຈສູງຂອງລັດຖະບານ ແລະ ອົງການທີ່ກ່ຽວຂ້ອງ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໃຫ້ຕົກໄປເທື່ອລະກ້າວ ເພື່ອພັດທະນາປະເທດຊາດໃຫ້ມີຄວາມໜັກແໜ້ນຂຶ້ນໄປເລື້ອຍໆ. ທ່ານຍັງໄດ້ຮຽກຮ້ອງຄະນະພັກ-ຄະນະນຳ, ພະນັກງານສະຖານທູດ, ນັກສຶກສາ ລາວທີ່ກຳລັງປະຕິບັດໜ້າທີ່ ແລະ ສຶກສາຮ່ຳຮຽນຢູ່ ສສ.ຫວຽດນາມ ຈົ່ງນຳເອົາມະຕິກອງປະຊຸມສະພາແຫ່ງຊາດໃນຄັ້ງນີ້ ໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງໃນຂອບເຂດຄວາມຮັບຜິດຊອບຂອງຕົນ ໃຫ້ເປັນຮູບປະທຳ ແລະ ໄດ້ຮັບຜົນສຳເລັດເປັນຢ່າງດີ.

(ຂ່າວ-ພາບ: ສະຖານທູດລາວທີ່ຮ່າໂນ້ຍ)