(ສພຊ) – ລະຫວ່າງທ້າຍເດືອນກໍລະກົດຫາຕົ້ນເດືອນສິງຫາ 2024 ທ່ານ ສີສູນທອນ ສ.ຜາບມີໄຊຍ໌ ຮອງປະທານກໍາມາທິການຍຸຕິທໍາ ພ້ອມດ້ວຍຄະນະ ໄດ້ເຄື່ອນເຮັດວຽກຢູ່ແຂວງຜົ້ງສາລີ ແລະ ແຂວງວຽງຈັນ ເພື່ອດໍາເນີນກອງປະຊຸມເຜີຍແຜ່ກົດໝາຍວ່າດ້ວຍການແກ້ໄຂຄໍາຮ້ອງທຸກ ສະບັບປັບປຸງປີ 2022 ໂດຍມີທ່ານຮອງເຈົ້າແຂວງ, ຮອງປະທານສະພາປະຊາຊົນແຂວງ, ເຈົ້າເມືອງ-ຮອງເຈົ້າເມືອງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງປະຈໍາເມືອງ, ບັນດາພະແນກການ ແລະ ອົງການທີ່ກ່ຽວຂ້ອງຂອງ 2 ແຂວງດັ່ງກ່າວ ເຂົ້າຮ່ວມ.

ຈຸດປະສົງຂອງກອງປະຊຸມ ເພື່ອຮັບປະກັນເຮັດໃຫ້ການຈັດຕັ້ງປະຕິບັດກົດໝາຍວ່າດ້ວຍການແກ້ໄຂຄໍາຮ້ອງທຸກ ຂອງບັນດາອົງການ ແລະ ຂະແໜງການຕ່າງໆຢູ່ຂັ້ນແຂວງ ແລະ ເມືອງ ໄດ້ຈັດຕັ້ງປະຕິບັດເອກະພາບກັນ ແລະ ເຂັ້ມງວດຕາມກົດໝາຍ; ແລກປ່ຽນຄໍາຄິດຄໍາເຫັນ ແລະ ຖອດຖອນບົດຮຽນ ໃນການຈັດຕັ້ງປະຕິບັດກົດໝາຍ ແລະ ການເຜີຍແຜ່ກົດໝາຍອື່ນໆໃນຕໍ່ໜ້າ.

ໃນກອງປະຊຸມ ທັງ 2 ແຂວງ, ທ່ານ ສີສູນທອນ ສ.ຜາບມີໄຊຍ໌ ໄດ້ກ່າວວ່າ: ການເຜີຍແຜ່ກົດໝາຍວ່າດ້ວຍການແກ້ໄຂຄໍາຮ້ອງທຸກ ໄດ້ດໍາເນີນໄປໃນຂອບເຂດທົ່ວປະເທດ ໃຫ້ແກ່ກະຊວງ, ອົງການ ແລະ ຂະແໜງການຂັ້ນທ້ອງຖິ່ນ ໂດຍສະເພາະແມ່ນອົງການຈັດຕັ້ງລັດ ແລະ ພະນັກງານ-ລັດຖະກອນ ທີ່ຮັບຜິດຊອບວຽກງານການແກ້ໄຂຄໍາຮ້ອງທຸກ ແລະ ເປັນການເຜີຍແຜ່ໃຫ້ພໍ່ແມ່ປະຊາຊົນບັນດາເຜົ່າ ໄດ້ຮັບຮູ້ ແລະ ເຂົ້າໃຈຕໍ່ເນື້ອໃນກົດໝາຍດັ່ງກ່າວ ເປັນຕົ້ນ: ຄວາມໝາຍ ແລະ ປະເພດຂອງຄໍາຮ້ອງທຸກ, ສິດ ແລະ ໜ້າທີ່, ຂັ້ນຕອນ ແລະ ວິທີການໃນການແກ້ໄຂ, ຄວາມຮັບຜິດຊອບຂອງອົງການທີ່ແກ້ໄຂຄໍາຮ້ອງທຸກໃນແຕ່ລະປະເພດ ຄື: ຄໍາສະເໜີ, ຄໍາຮ້ອງຟ້ອງ ແລະ ຄໍາຮ້ອງຂໍຄວາມເປັນທໍາ ແນໃສ່ເຮັດໃຫ້ອົງການຈັດຕັ້ງລັດ ແລະ ພາກສ່ວນຕ່າງໆໃນສັງຄົມ ມີຄວາມຮັບຮູ້ເຂົ້າໃຈເປັນເອກະພາບກັນໃນການນຳໃຊ້ ແລະ ຈັດຕັ້ງປະຕິບັດກົດໝາຍສະບັບນີ້ ໃຫ້ຖືກຕ້ອງ ແລະ ເຂັ້ມງວດ.

ຜ່ານການຈັດຕັ້ງປະຕິບັດກົດໝາຍວ່າດ້ວຍການແກ້ໄຂຄຳຮ້ອງທຸກໃນໄລຍະຜ່ານມາ, ກົດໝາຍດັ່ງກ່າວໄດ້ກາຍເປັນເຄື່ອງ ມືສຳຄັນໃຫ້ແກ່ອົງການຈັດຕັ້ງລັດທີ່ຮັບຜິດຊອບແກ້ໄຂຄໍາຮ້ອງທຸກ ສາມາດປະຕິບັດພາລະບົດບາດ, ສິດ ແລະ ໜ້າທີ່ ຕາມຂອບເຂດຄວາມຮັບຜິດຊອບຂອງຕົນໄດ້ເປັນຢ່າງດີ ທັງເປັນການສ້າງເງື່ອນໄຂໃຫ້ປະຊາຊົນ ສາມາດເຂົ້າເຖິງຂະບວນການຍຸຕິທໍາຫຼາຍຂຶ້ນ; ສິດ ແລະ ຜົນປະໂຫຍດຂອງບຸກຄົນ, ນິຕິບຸກຄົນ ແລະ ການຈັດຕັ້ງ ໄດ້ຮັບການປົກປ້ອງຕາມລັດຖະທໍາມະນູນ ແລະ ກົດໝາຍ ອັນເປັນການປະກອບສ່ວນເຮັດໃຫ້ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍໂດຍພື້ນຖານ.

ນອກຈາກນັ້ນ, ກໍາມາທິການຍຸຕິທໍາ ຍັງໄດ້ມອບປຶ້ມກົດໝາຍວ່າດ້ວຍການແກ້ໄຂຄໍາຮ້ອງທຸກ, ແຜ່ນພັບ ແລະ ໂປສເຕີ ກ່ຽວກັບການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ ຈໍານວນໜຶ່ງ ໃຫ້ແກ່ສະພາປະຊາຊົນແຂວງ, ເມືອງ ແລະ ບ້ານ ເພື່ອເອົາໄປນໍາໃຊ້ເປັນບ່ອນອີງໃນການປະຕິບັດວຽກງານ ແລະ ເຜີຍແຜ່ຕໍ່ໃຫ້ແກ່ພາກສ່ວນກ່ຽວຂ້ອງໄດ້ຮັບຮູ້.

ໂອກາດເຄື່ອນໄຫວວຽກງານຢູ່ແຂວງວຽງຈັນ, ທ່ານຮອງປະທານກໍາມາທິການຍຸຕິທໍາ ພ້ອມດ້ວຍຄະນະ ໄດ້ເຂົ້າລາຍງານຈຸດປະສົງຂອງການເຄື່ອນໄຫວຄັ້ງນີ້ ໃຫ້ທ່ານເຈົ້າແຂວງໄດ້ຮັບຊາບ ແລະ ຮັບຟັງສະພາບຈຸດພິເສດການແກ້ໄຂຄໍາຮ້ອງທຸກຂອງປະຊາຊົນພາຍໃນແຂວງໂດຍຫຍໍ້ ແລະ ຂໍ້ສະເໜີຕ່າງໆທີ່ກ່ຽວຂ້ອງຈໍານວນໜຶ່ງ.

ການເຄື່ອນໄຫວເຜີຍແຜ່ກົດໝາຍຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບ​ກັບງົບປະມານ​ຂອງ​ຄະນະ​ເລຂາທິການ​ສະພາ​ແຫ່ງ​ຊາດ.

(ນາງ ກົງໃຈ ແສງອໍາພັນ)