(ສພຊ) – ວັນທີ 5 ສິງຫາ 2024 ທີ່ສະພາແຫ່ງຊາດ, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ຊິຕິ ໂຣໄຊເມຣິຢັນຕີ ດາໂຕະ ຮາຈິ ອັບດຸນ ຣາມັນ (Siti Rozaimeriyanty Dato Haji Abdul Rahman) ເລຂາທິການໃຫຍ່ໄອປາ (AIPA) ໃນໂອກາດເດີນທາງມາເຂົ້າຮ່ວມກອງປະຊຸມປຶກສາຫາລືຂອງຄະນະສະມາຊິກລັດຖະສະພາໜຸ່ມໄອປາ (Young Parliamentarians of AIPA – YPA) ຄັ້ງທີ 1 ແລະ ກອງປະຊຸມສະພາທີ່ປຶກສາໄອປາ ກ່ຽວກັບໄພອັນຕະລາຍຂອງຢາເສບຕິດ (AIPA Advisory Council on Dangerous Drugs – AIPACODD) ຄັ້ງທີ 7 ຢູ່ ສປປລາວ.
ທ່ານ ປອ. ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາເຮັດວຽກໃນຄັ້ງນີ້ ເຊິ່ງເປັນການປະກອບສ່ວນອັນສຳຄັນໃນການເປັນເຈົ້າພາບຈັດກອງປະຊຸມປຶກສາຫາລືຂອງຄະນະສະມາ ຊິກລັດຖະສະພາໜຸ່ມໄອປາ ຄັ້ງທີ 1 ໃນຮູບແບບທາງໄກ ທີ່ຫາກໍສຳເລັດ ແລະ ການເປັນເຈົ້າພາບຈັດກອງປະຊຸມ ສະພາທີ່ປຶກສາໄອປາ ກ່ຽວກັບໄພອັນຕະລາຍຂອງຢາເສບຕິດ ຄັ້ງທີ 7 ທີ່ຈະໄຂຂຶ້ນທີ່ແຂວງຫຼວງພະບາງ ໃນວັນທີ 7 ສິງຫານີ້ ທັງເຊື່ອໝັ້ນວ່າການພົບປະເຮັດວຽກກັບບັນດາປະທານກອງປະຊຸມກຳມາທິການປະຈຳວຽກງານຕ່າງໆຂອງໄອປາ ຈະເປັນການກະກຽມທີ່ດີໃຫ້ແກ່ການເປັນເຈົ້າພາບຈັດກອງປະຊຸມໃຫຍ່ໄອປາ ຄັ້ງທີ 45 ເຊິ່ງຈະຈັດຂຶ້ນທີ່ນະ ຄອນຫຼວງວຽງຈັນ ໃນລະຫວ່າງວັນທີ 17-23 ຕຸລາ 2024, ສະແດງຄວາມຊົມເຊີຍຕໍ່ທ່ານເລຂາທິການໃຫຍ່ໄອປາ ທີ່ໄດ້ເອົາໃຈໃສ່ເສີມຂະຫຍາຍການຮ່ວມມືກັບລັດຖະສະພາສັງເກດການ ແລະ ຄູ່ຮ່ວມພັດທະນາອື່ນໆ ເພື່ອຍາດແຍ່ງເອົາທຶນຮອນ ແລະ ຄວາມຮູ້ປະສົບການທີ່ດີມາຖ່າຍທອດໃຫ້ແກ່ສະມາຊິກລັດຖະສະພາໄອປາ ໂດຍຜ່ານການເຝິກອົບຮົມສຳມະນາໃນຮູບແບບຕ່າງໆຢ່າງຕໍ່ເນື່ອງ ເຊິ່ງສະພາແຫ່ງຊາດລາວກໍໄດ້ຮັບຜົນປະໂຫຍດຢ່າງຫຼວງຫຼາຍໃນການຍົກລະ ດັບຂີດຄວາມສາມາດໃຫ້ແກ່ສະມາຊິກສະພາແຫ່ງຊາດ ແລະ ພະນັກງານວິຊາການຂອງສະພາແຫ່ງຊາດ; ພ້ອມນັ້ນ, ທ່ານຍັງໄດ້ລາຍງານໃຫ້ເລຂາທິການໃຫຍ່ໄອປາ ຮັບຊາບກ່ຽວກັບການກະກຽມຢ່າງຂຸ້ນຂ້ຽວໃນການຮ່າງຕາຕະລາງການດຳເນີນການ ແລະ ບັດເຊີນກອງປະຊຸມ, ຮ່າງມະຕິ ແລະ ເນື້ອໃນເອກະສານກ່ຽວຂ້ອງອື່ນໆໃນກອງປະຊຸມໄອປາຄັ້ງທີ 45 ເຊິ່ງຄາດວ່າຈະໃຫ້ສໍາເລັດໃນທ້າຍອາທິດທີໜຶ່ງຂອງເດືອນສິງຫານີ້.
ທ່ານ ນາງ ຊິຕິ ໂຣໄຊເມຣິຢັນຕີ ດາໂຕະ ຮາຈິ ອັບດຸນ ຣາມັນ ໄດ້ລາຍງານຜົນສຳເລັດກອງປະຊຸມປຶກສາຫາລືຂອງຄະນະສະມາຊິກລັດຖະສະພາໜຸ່ມໄອປາ ຄັ້ງທີ 1 ທີ່ຈັດຂຶ້ນໃນຕອນເຊົ້າທີ່ຜ່ານມາ ພາຍໃຕ້ຫົວຂໍ້ “ສ້າງຄວາມເຂັ້ມ ແຂງໃຫ້ແກ່ຊາວໜຸ່ມໃນການສ້າງປະຊາຄົມອາຊຽນທີ່ປອດໄພ, ເຂັ້ມແຂງ ແລະ ກວມລວມ” ເຊິ່ງເປັນການສົ່ງເສີມໃຫ້ຊາວໜຸ່ມ ໄດ້ມີສ່ວນຮ່ວມໃນການສ້າງປະຊາຄົມອາຊຽນໃຫ້ຫຼາຍຂຶ້ນ ແລະ ແຈ້ງໃຫ້ຊາບກ່ຽວກັບກອງປະຊຸມສະພາທີ່ປຶກສາໄອປາ ກ່ຽວກັບໄພອັນຕະລາຍຂອງຢາເສບຕິດ ຄັ້ງທີ 7 ທີ່ແຂວງຫຼວງພະບາງ ໃນວັນທີ 7-9 ສິງຫານີ້ ພາຍໃຕ້ຫົວຂໍ້: “ເພີ່ມທະວີບົດບາດຂອງລັດຖະສະພາ ໃນການຮ່ວມມືເພື່ອແກ້ໄຂບັນຫາຢາເສບຕິດ ເຮັດໃຫ້ອາຊຽນປອດຢາເສບຕິດຢ່າງເປັນຮູບປະທຳ”.
(ນາງ ອາລິນ ສຸພິມມະປະດິດ)