ຫ້ອງການສຶກສາທິການ ແລະ ກິລາເມືອງວາປີ ຈັດກອງປະຊຸມສໍາມະນາ ວຽກງານກະກຽມຄວາມພ້ອມໃຫ້ແກ່ການໄຂສົກຮຽນໃໝ່ ປະຈໍາປີ 2024, ໃນວັນທີ 1 ສິງຫາ 2024 ທີ່ຜ່ານມາ, ຢູ່ທີ່ຫ້ອງປະຊຸມສະໂມສອນເມືອງວາປີ, ໂດຍການເປັນປະທານຂອງ ທ່ານ ນາງ ຄໍາບາງ ໃສຍະມາ ຫົວໜ້າຫ້ອງການສຶກສາທິການ ແລະ ກິລາເມືອງ, ເຂົ້າຮ່ວມມີ ທ່ານ ສຸນີ ນາມມະບົວລີ ຮັກສາການຫົວໜ້າພະແນກສຶກສາທິການ ແລະ ກິລາແຂວງ, ທ່ານ ກິແກ້ວ ໄຊຍະລາດ ຮອງເລຂາພັກເມືອງ ປະທານກວດກາພັກລັດເມືອງ ວາປີ ແລະ ທ່ານ ນາງ ທອງໃບ ໄຊຍະສານ ສະມາຊິກສະພາແຫ່ງຊາດ ເຂດເລືອກຕັ້ງທີ 14, ປະທານຄະນະກຳມະການວັດທະນະທຳ-ສັງຄົມ ແລະ ມີບັນດາລັດຖະກອນບໍລິຫານ ແລະ ຄູ-ອາຈານ ເຂົ້າຮ່ວມທັງໝົດ 200 ກວ່າທ່ານ;
ຈຸດປະສົງ ເພື່ອເອກະພາບກັນຄົ້ນຄວ້າປຶກສາຫາລືແກ້ໄຂ ບັນຫາປະກົດການຕ່າງໆກ່ຽວກັບການສຶກສາ, ສຸມໃສ່ປັບປຸງການສິດສອນຂອງຄູ-ອາຈານໃຫ້ໄດ້ຄຸນນະພາບ ແລະ ປະລິມານ, ພ້ອມທັງເປັນການພັດທະນາໃຫ້ມີຄວາມຮູ້ຄວາມສາມາດໃນການບໍລິຫານຈັດການວຽກງານຕ່າງໆໃຫ້ມີການຂະຫຍາຍຕົວຢ່າງຕໍ່ເນື່ອງ, ໄດ້ຮັບຮູ້ເຂົ້າໃຈແຈ້ງຕໍ່ກັບພາລະບາດບົດບາດຂອງຄູ-ອາຈານ, ຈັນຍາບັນ-ຈັນຍາທໍາຂອງຄູ, ສຶກສາອົບຮົມ, ຖ່າຍທອດວິຊາຄວາມຮູ້ໃຫ້ແກ່ນ້ອງນັກຮຽນໃຫ້ເຂົາເຈົ້າໄດ້ກາຍເປັນນັກຮຽນດີ-ຮຽນເກັ່ງ, ມີລະບຽບວິໃນດີ ແລະ ເປັນຄົນດີຂອງສັງຄົມ;
ຫົວຂໍ້ເນື້ອໃນທີ່ສໍາມະນາໃນຄັ້ງນີ້ມີ: ບົດສະຫຼຸບຫຍໍ້ ກ່ຽວກັບການຈັດຕັ້ງປະຕິບັດວຽກງານການສຶກ ແລະ ກິລາ ປະຈຳສົກຮຽນ 2023-2024; ຂໍ້ຕົກລົງ ວ່າດ້ວຍ ກອງທຶນສະຫວັດດີການຄູແຫ່ງຊາດ ສະບັບເລກທີ 5000/ສສກ ນະຄອນຫຼວງວຽງຈັນ, ລົງວັນທີ 15 ກໍລະກົດ 2024; ບົດສະຫຼຸບ ກ່ຽວກັບວຽກງານໂພສະນາການ ສົກຮຽນ 2023-2024 ແລະ ທິດທາງແຜນການໃນຕໍ່ໜ້າ; ປະຫວັດຄວາມເປັນມາຂອງວັນກໍາເນີດກິລາກາຍຍະກໍາແຫ່ງຊາດລາວ; ເອກະສານ ນາມມະຍົດຄູ; ດໍາລັດ ວ່າດ້ວຍລັດຖະກອນຄູ ເລກທີ 202/ລບ, ລົງວັນທີ 12 ພຶດສະພາ 2024; ມະຕິ ເລກທີ 206/ກມສພ, ວັນທີ 7 ທັນວາ 2020 ວ່າດ້ວຍການຍົກສູງຄຸນນະພາບວຽກງານການເມືອງແນວຄິດໃນໄລນະໃໝ່; ຂໍ້ຕົກລົງ ວ່າດ້ວຍການສັບຊ້ອນພະນັກງານຄູ ປະຈຳສົກຮຽນ 2024-2025 ສະບັບເລທີ 259/ຈມ.ວປ ລົງວັນທີ 31 ກໍລະກົດ 2024.
ໂອກາດດັ່ງກ່າວ, ທ່ານ ນາງ ທອງໃບ ໄຊຍະສານ ສະມາຊິກສະພາແຫ່ງຊາດ ເຂດເລືອກຕັ້ງທີ 14, ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ທີ່ໄດ້ເຂົ້າຮ່ວມກອງປະຊຸມດັ່ງກ່າວ ທ່ານໄດ້ຂຶ້ນໂຄສະນາ ພາລະບົດບາດ, ສິດ ແລະ ໜ້າທີ່ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ທີ່ກໍານົດໄວໃນກົດໝາຍ ແລະ ເຜີຍແຜ່ມະຕິກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງສາລະວັນ ຊຸດທີ II ໄດ້ເຊື່ອມຊຶມຮັບຮູ້ ແລະ ເຂົ້າໃນຕໍ່ກັບບັນດາມະຕິຂອງກອງປະຊຸມສະພາແຫ່ງຊາດ ແລະ ສະພາປະຊາຊົນແຂວງ ໂດຍສະເພາະທ່ານໄດ້ເນັ້ນສະເໜີເນື້ອໃນ ກ່ຽວກັບ ວຽກງານວັດທະນະທໍາ-ສັງຄົມ ຂົງເຂດການສຶກສາຕື່ມອີກ;
ພາບ-ຂ່າວ: ດີລໍາພົນ ພົມມະຈັນ