(ສພຊ) – ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານຂອງໜ່ວຍແມ່ຍິງຮາກຖານກໍາມາທິການການຕ່າງປະເທດ (ກຕທ) ໄດ້ຈັດຂຶ້ນໃນວັນທີ 31 ກໍລະກົດ 2024 ໂດຍການຮ່ວມເປັນຄະນະປະທານຂອງສະຫາຍ ເພັດລາ ທັນທະວົງສາ ປະທານກວດກາໜ່ວຍພັກຮາກຖານກໍາມາທິການການຕ່າງປະເທດ, ສະຫາຍ ນາງ ດາວເພັດ ສີຫາວົງ ຮອງປະທານສະຫະພັນແມ່ຍິງສະພາແຫ່ງຊາດ ແລະ ສະຫາຍ ນາງ ນິດແກ້ວ ຄໍາມີ ຫົວໜ້າໜ່ວຍແມ່ຍິງຮາກຖານກໍາມາ ທິການການຕ່າງປະເທດ, ມີຜູ້ຕາງໜ້າຈາກໜ່ວຍກໍາມະບານຮາກຖານ ແລະ ໜ່ວຍຊາວໜຸ່ມຮາກຖານ ກຕທ ເຂົ້າຮ່ວມ; ຜູ້ແທນກອງປະຊຸມ 9 ສະຫາຍ ໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນໃສ່ເນື້ອໃນບົດສະຫຼຸບການຈັດຕັ້ງປະຕິບັດວຽກງານຂອງໜ່ວຍແມ່ຍິງຮາກຖານກໍາມາທິການການຕ່າງປະເທດ ແລະ ທິດທາງແຜນການເຄື່ອນໄຫວວຽກງານໃນຕໍ່ໜ້າ ໂດຍເປັນເອກະພາບກັນຮັບຮອງເອົາເນື້ອໃນບົດສະຫຼຸບ ເປັນຕົ້ນແມ່ນການຕີລາຄາຜົນງານດ້ານຕັ້ງໜ້າ, ດ້ານອ່ອນ-ຂໍ້ຄົງຄ້າງ ໃນການເຄື່ອນໄຫວວຽກງານໄລຍະ 5 ປີຜ່ານມາ, ພ້ອມທັງວາງທິດທາງແຜນການທີ່ຈະຕ້ອງຈັດຕັ້ງປະຕິບັດໃນ 5 ປີຕໍ່ໜ້າ.

ກອງປະຊຸມຍັງໄດ້ຜ່ານການຮັບຮອງເອົາມະຕິແຕ່ງຕັ້ງຄະນະໜ່ວຍແມ່ຍິງຮາກຖານກໍາມາທິການການຕ່າງປະເທດຊຸດໃໝ່ ໂດຍອີງໃສ່ຜົນການທາບທາມພາຍໃນໜ່ວຍ ເຊິ່ງຮັບຮອງເອົາສະຫາຍ ນາງ ນິດແກ້ວ ຄໍາມີ ເປັນຫົວໜ້າ, ສະ ຫາຍ ນາງ ສາລິພອນ ອຸດທະຈັກ ເປັນຮອງຫົວໜ້າ ແລະ ປະທານກວດກາ, ສະຫາຍ ນາງ ວິໄລພອນ ຄໍາວົງສາ ເປັນຄະນະ.

ກອງປະຊຸມໄດ້ຮັບຟັງການໂອ້ລົມຈາກສະຫາຍ ເພັດລາ ທັນທະວົງສາ ເຊິ່ງໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງຄະນະໜ່ວຍແມ່ຍິງຮາກຖານກໍາມາທິການການຕ່າງປະເທດຊຸດຜ່ານມາ ແລະ ສະມາຊິກແມ່ຍິງທັງໝົດພາຍໃນໜ່ວຍ ທີ່ຍາດໄດ້ຜົນງານຫຼາຍໆດ້ານ, ສະແດງຄວາມເປັນຫ່ວງເປັນໄຍຕໍ່ດ້ານອ່ອນ-ຂໍ້ຄົງຄ້າງ ໂດຍຮຽກຮ້ອງຄະນະໜ່ວຍຊຸດໃໝ່ ຈະຕ້ອງສຸມໃສ່ປັບປຸງແກ້ໄຂໃຫ້ມີທິດທາງທີ່ຕັ້ງໜ້າກວ່າເກົ່າ; ພ້ອມທັງເຊື່ອໝັ້ນວ່າໃນຕໍ່ໜ້າ ຄະນະໜ່ວຍຈະສືບຕໍ່ຊີ້ນຳ-ນຳພາສະມາຊິກພາຍໃນໜ່ວຍ ຈັດຕັ້ງປະຕິບັດໜ້າທີ່ການເມືອງຂອງຕົນຕາມມະຕິກອງປະຊຸມຄັ້ງນີ້ ໃຫ້ຍາດໄດ້ຜົນງານ ແລະ ຜົນສຳເລັດໃໝ່ທີ່ຍິ່ງໃຫຍ່ກວ່າເກົ່າ.

ກອງປະຊຸມຮຽກຮ້ອງມາຍັງສະມາຊິກແມ່ຍິງພາຍໃນໜ່ວຍ ຈົ່ງເຊີດຊູສະຕິປັນຍາ ແລະ ຄວາມຮັບຜິດຊອບ ເພື່ອພ້ອມກັນກັບຄະນະໜ່ວຍ ເຮັດຫຼ້ອນໜ້າທີ່ການເມືອງຂອງຕົນໃຫ້ສູງຂຶ້ນຢ່າງບໍ່ຢຸດຢັ້ງ.

(ນາງ ອາລິນ ສຸພິມມະປະດິດ)