(ສພຊ) – ເພື່ອຮັບປະກັນໃຫ້ບັນດາຮ່າງກົດໝາຍທີ່ຜ່ານການພິຈາລະນາຮັບຮອງໃນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ (ສພຊ) ຊຸດທີ IX ມີເນື້ອໃນຄົບຖ້ວນ ແລະ ຮັບກຸມ, ກໍາມາທິການກົດໝາຍ ຈຶ່ງໄດ້ສົມທົບ ກັບບັນດາກະຊວງ-ອົງການທີ່ກ່ຽວຂ້ອງ ຈັດກອງປະຊຸມຮຽບຮຽງເນື້ອໃນບັນດາຮ່າງກົດໝາຍ ເຊິ່ງໃນວັນທີ 1 ສິງຫານີ້ ໄດ້ ຈັດກອງປະຊຸມຮຽບຮຽງເນື້ອໃນກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພ (ສະບັບປັບປຸງ) ທີ່ຫ້ອງປະຊຸມສະ ໂມສອນໄຟຟ້າ ເມືອງແກ້ວອຸດົມ ແຂວງວຽງຈັນ, ໂດຍການເປັນປະທານຂອງທ່ານ ພົທ. ສຸວອນ ເລືອງບຸນມີ ຮອງປະທານ ສະພາແຫ່ງຊາດ, ມີທ່ານ ພົຕ. ປອ. ວົງສັກ ພັນທະວົງ ປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ, ທ່ານ ພົຕ. ສົມວັນ ສາຍລ້ອງພານ ຮອງລັດຖະມົນຕີກະຊວງປ້ອງກັນຄວາມສະຫງົບ, ບັນດາທ່ານຮອງປະທານກຳມາທິການພາຍໃນ ສພຊ, ຄະນະທີ່ປຶກສາທາງດ້ານກົດໝາຍຂອງຄະນະປະຈໍາສະພາແຫ່ງຊາດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ພົທ. ສຸວອນ ເລືອງບຸນມີ ໄດ້ມີຄໍາເຫັນກ່າວໄຂກອງປະຊຸມຢ່າງເປັນທາງການ ເຊິ່ງມີເນື້ອໃນບາງຕອນວ່າ: “ພວກເຮົາຈະພ້ອມກັນຄົ້ນຄວ້າ ແລະ ຮຽບຮຽງເນື້ອໃນຂອງກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພ (ສະບັບ ປັບປຸງ) ຕາມການປະກອບຄໍາເຫັນຂອງບັນດາທ່ານສະມາຊິກສະພາແຫ່ງຊາດ (ສສຊ) ໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX ໃນຕອນບ່າຍຂອງວັນທີ 25 ມິຖຸນາ 2024 ຈຳນວນ 10 ທ່ານ ກວມເອົາ 36 ມາດຕາ 68 ເນື້ອໃນ ເຊິ່ງຄະນະຮັບຜິດຊອບກໍໄດ້ຄົ້ນຄວ້າພິຈາລະນາປັບປຸງສຳເລັດໂດຍພື້ນຖານແລ້ວ ໃນນີ້ ປັບປຸງ 17 ມາດຕາ 34 ເນື້ອໃນ ແລະ ຮັກສາໄວ້ 19 ມາດຕາ 34 ເນື້ອໃນ.”
ກອງປະຊຸມຮຽບຮຽງເນື້ອໃນຮ່າງກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພ ດຳເນີນເປັນເວລາ 2 ວັນ ເຊິ່ງບັນດາຜູ້ເຂົ້າຮ່ວມໄດ້ພ້ອມກັນຄົ້ນຄວ້າຄືນບັນດາຄຳເຫັນຂອງ ສສຊ ທີ່ເຫັນວ່າມີເຫດມີຜົນ ເພື່ອປັບປຸງໃສ່ກົດໝາຍ; ນອກ ຈາກນັ້ນ, ຍັງໄດ້ເບິ່ງຄືນເນື້ອໃນແຕ່ລະມາດຕາຢ່າງລະອຽດ ແນໃສ່ເຮັດໃຫ້ກົດໝາຍສະບັບນີ້ ມີເນື້ອໃນຄົບຖ້ວນ, ຮັດກຸມ ແລະ ສາມາດຈັດຕັ້ງປະຕິບັດໄດ້ຢ່າງມີປະສິດທິພາບ ແລະ ປະສິດທິຜົນ.
(ບຸນເກີດ ວົງໄຊຍາ)