ທ່ານ ສີເຮັງ ຫອມສົມບັດ ຮອງເລຂາພັກແຂວງ, ປະທານສະພາປະຊາຊົນແຂວງສາລະວັນ ກ່າວໄຂກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງສາລະວັນ ຊຸດທີ II ຂຶ້ນຢ່າງເປັນທາງການ ໃນຕອນເຊົ້າຂອງວັນທີ 30 ກໍລະກົດ 2024 ນີ້ ທີ່ສະໂມສອນແຂວງສາລະວັນ; ທ່ານໄດ້ກ່າວວ່າ: ໂດຍປະຕິບັດຕາມ ມາດຕາ 60 ຂອງກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍ ວ່າດ້ວຍ ສະພາແຫ່ງຊາດ ແລະ ກົດໝາຍ ວ່າດ້ວຍ ສະພາປະຊາຊົນຂັ້ນແຂວງ ກ່ຽວກັບ ກອງປະຊຸມສະໄໝສາມັນ ປະຈໍາຫົກເດືອນຕົ້ນປີ ຂອງສະພາປະຊາຊົນຂັ້ນແຂວງ ແລະ ຕາມການຕົກລົງ ຂອງຄະນະປະຈໍາສະພາປະຊາຊົນແຂວງ, ມື້ນີ້ ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງສາລະວັນ ຊຸດທີ II ໄດ້ໄຂຂຶ້ນຢ່າງເປັນທາງການ ໃນທ່າມກາງບັນຍາກາດທີ່ທົ່ວພັກ-ລັດ ແລະ ທົ່ວປວງຊົນລາວທັງຊາດເວົ້າລວມ, ເວົ້າສະເພາະ ກໍຄືແຂວງສາລະວັນພວກເຮົາ ພວມສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ກອງປະຊຸມໃຫຍ່ຄັ້ງທີ IX ຂອງແຂວງ; ບັນດາມະຕິກອງປະຊຸມ ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງສະລະວັນ ຊຸດທີ II, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2024 ຂອງແຂວງ ຕິດພັນກັບການຈັດຕັ້ງປະຕິບັດສອງວາລະແຫ່ງຊາດ ຢ່າງເປັນຂະບວນຟົດຟື້ນ, ແຂງແຮງ ແລະ ມີຜົນສໍາເລັດຢ່າງຈົບງາມ.
ໃນໂອກາດ ທີ່ມີຄວາມໝາຍສໍາຄັນນີ້, ກອງປະຊຸມມີຄວາມພາກພູມໃຈ ແລະ ສະແດງຄວາມຍີນດີຢ່າງສູງ ທີ່ໄດ້ຕ້ອນຮັບທ່ານ ປອ ດາວວົງ ພອນແກ້ວ ກໍາມະການສູນກາງພັກ, ເລຂາພັກແຂວງ, ເຈົ້າແຂວງສາລະວັນ; ທ່ານ ສຸບັນ ສະວະບຸດ ຄະນະປະຈໍາສະພາແຫ່ງຊາດ, ປະທານກໍາມາທິການວຽກງານສະມາຊິກສະພາແຫ່ງຊາດ ທີ່ໄດ້ໃຫ້ກຽດເຂົ້າຮ່ວມກອງປະຊຸມຄັ້ງນີ້; ຂໍສະແດງຄວາມຂໍ່ານັບຊົມເຊີຍ ບັນດາທ່ານການນໍາພັກ-ລັດຂັ້ນສູງຂອງແຂວງ, ບັນດາທ່ານອາດີດການນໍາຂັ້ນສູງຂອງແຂວງ, ບັນດາທ່ານຄະນະນໍາພະແນກການ, ອົງການລັດທຽບເທົ່າຂັ້ນແຂວງ, ເຈົ້າເມືອງ ແລະ ຜູ້ຕາງໜ້າຈາກພາກສ່ວນຕ່າງໆ; ບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງ 14, ສະມາຊິກສະພາປະຊາຊົນແຂວງ ໃນນາມຕົວແທນແຫ່ງສິດ ແລະ ຜົນປະໂຫຍດ ຂອງປະຊາຊົນລາວບັນດາເຜົ່າພາຍໃນແຂວງ ທີ່ໄດ້ໃຫ້ກຽດເຂົ້າຮ່ວມກອງປະຊຸມ ຄັ້ງນີ້ຢ່າງພ້ອມພຽງ.
ການເຄື່ອນໄຫວຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນແຂວງສາລະວັນ ໃນໄລຍະຫົກເດືອນຕົ້ນປີ 2024 ຊຶ່ງຢູ່ໃນສະພາບພາກພື້ນ ແລະ ສາກົນ ຍັງສືບຕໍ່ຜັນແປໄປຢ່າງສະຫຼັບຊັບຊ້ອນ, ເຄັ່ງຮ້ອນ ແລະ ຫຍຸ້ງຍາກຫຼາຍດ້ານ ເຊິ່ງໄດ້ສົ່ງຜົນກະທົບຕໍ່ ສປປ ລາວ ເວົ້າລວມ, ເວົ້າສະເພາະກໍຄືແຂວງສາລະວັນພວກເຮົາ ໂດຍສະເພາະສະພາບເງິນເຟີ້, ອັດຕາການແລກປ່ຽນ, ບັນຫາລາຄາສິນຄ້າເພີ່ມຂຶ້ນ, ລາຄານໍ້າມັນເຊື້ອໄຟ ແລະ ອື່ນໆ ໄດ້ສົ່ງຜົນກະທົບໂດຍກົງຕໍ່ຊີວິດການເປັນຢູ່ຂອງພະນັກງານ-ລັດຖະກອນ ແລະ ປະຊາຊົນບັນດາເຜົ່າພາຍໃນແຂວງ ໃນປະຈຸບັນ, ແຕ່ດ້ວຍຄວາມເອົາໃຈໃສ່ຊີ້ນໍາ-ນໍາພາ ຄະນະບໍລິຫານງານສູນກາງພັກ, ສະພາແຫ່ງຊາດ ແລະ ຄະນະບໍລິຫານງານພັກແຂວງ, ການປະສານສົມທົບ, ປຶກສາຫາລືເຮັດວຽກກັນ ຢ່າງເປັນປົກກະຕິ-ຕໍ່ເນື່ອງ ແລະ ເປັນເອກະພາບ ລະຫວ່າງສະພາປະຊາຊົນແຂວງສາລະວັນ ແລະ ອົງການປົກຄອງແຂວງ, ການປະກອບສ່ວນຂອງພາກສ່ວນຕ່າງໆໃນສັງຄົມ, ປະຊາຊົນລາວບັນດາເຜົ່າພາຍໃນແຂວງ ເຮັດໃຫ້ບັນຫາເສດຖະກິດພາຍໃນແຂວງ ໄດ້ຮັບການແກ້ໄຂ ສາມາດສືບຕໍ່ພັດທະນາ, ເຮັດໃຫ້ບາງບັນດາຄາດໝາຍ ທາງດ້ານເສດຖະກິດ-ສັງຄົມ, ການປະຕິບັດແຜນງົບປະມານຂອງແຂວງ ສາມາດບັນລຸຕາມແຜນ ແລະ ເກີນແຜນການກໍານົດໄວ້; ການຈັດຕັ້ງປະຕິບັດ 2 ວາລະແຫ່ງຊາດ ກໍມີຄວາມຄືບໜ້າເປັນຢ່າງດີ ເຮັດໃຫ້ແຂວງສາລະວັນ ສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍໂດຍພື້ນຖານ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນເທື່ອລະກ້າວ.
ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງສາລະວັນ ຊຸດທີ II ຄັ້ງນີ້ ຈະໄດ້ຄົ້ນຄວ້າພິຈາລະນາ ແລະ ຮັບຮອງບັນດາເນື້ອໃນສໍາຄັນ ດັ່ງນີ້:
1. ຮັບຟັງການລາຍງານ ໂດຍສັງເຂບຂອງທ່ານເຈົ້າແຂວງ ກ່ຽວກັບການເຄື່ອນໄຫວວຽກງານພົ້ນເດັ່ນຂອງອົງການປົກຄອງແຂວງ ໄລຍະ 6 ເດືອນຕົ້ນປີ 2024 ແລະ ແຜນການ 6 ເດືອນທ້າຍ ປີ 2024;
2. ພິຈາລະນາ, ຮັບຮອງເອົາ ບົດລາຍງານ ຂອງອົງການປົກຄອງແຂວງ ກ່ຽວກັບ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ໄລຍະ 6 ເດືອນຕົ້ນປີ 2024 ແລະ ແຜນການ 6 ເດືອນທ້າຍ ປີ 2024;
3. ພິຈາລະນາ, ຮັບຮອງເອົາ ບົດລາຍງານ ຂອງອົງການປົກຄອງແຂວງ ກ່ຽວການ ຈັດຕັ້ງປະຕິບັດແຜນ ງົບປະມານແຫ່ງລັດ ຂອງແຂວງ ໄລຍະ 6 ເດືອນຕົ້ນປີ 2024 ແລະ ແຜນການ 6 ເດືອນທ້າຍປີ 2024;
4. ພິຈາລະນາ, ຮັບຮອງເອົາ ບົດລາຍງານ ຂອງອົງການປົກຄອງແຂວງ ກ່ຽວກັບ ການຈັດຕັ້ງປະຕິບັດ ບັນດາຄາດໝາຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງ ໃນໄລຍະຜ່ານມາ ແລະ ຄາດໝາຍສູ້ຊົນໃນປີ 2024;
5. ຮັບຟັງການລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໄລຍະຜ່ານມາ;
6. ພິຈາລະນາ, ຮັບຮອງເອົາ ບົດລາຍງານ ການຈັດຕັ້ງປະຕິບັດແຜນການເຄື່ອນໄຫວວຽກງານ ແຕ່ກອງປະຊຸມສະໄໝສາມັນ ເທື່ອທີ 6 ຫາ ເທື່ອທີ 7 ແລະ ທິດທາງແຜນການຮອດກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງ;
7. ພິຈາລະນາ, ຮັບຮອງເອົາການສ້າງນິຕິກໍາທີ່ສໍາຄັນຂອງແຂວງ ຈໍານວນ 2 ສະບັບ ຄື:
– ຮ່າງຂໍ້ຕົກລົງ ວ່າດ້ວຍ ການຄຸ້ມຄອງອາຫານປອດໄພ ຕາມຮ້ານອາຫານ ພາຍໃນແຂວງສາລະວັນ (ສ້າງໃໝ່);
– ຮ່າງຂໍ້ຕົກລົງ ວ່າດ້ວຍ ການຄຸ້ມຄອງຢາປາບສັດຕູພືດ ຢູ່ແຂວງສາລະວັນ (ປັບປຸງ).
ນອກຈາກນັ້ນ, ຍັງຈະໄດ້ຮັບຟັງການຊີ້ແຈງ ຂອງພາກສ່ວນກ່ຽວຂ້ອງຈໍານວນໜຶ່ງ ຕໍ່ຄໍາຊັກຖາມຂອງບັນດາທ່ານສະມາຊິກສະພາປະຊາຊົນແຂວງ ແລະ ການປະກອບຄໍາເຫັນ ຂອງຄະນະປະຈໍາສະພາປະຊາຊົນແຂວງ, ເພື່ອພິຈາລະນາຮັບຮອງເອົາບັນຫາສໍາຄັນພຶ້ນຖານຂອງແຂວງ ທີ່ມີຈໍານວນຫຼາຍຄືດັ່ງກ່າວນີ້ໃຫ້ມີຄຸນນະພາບ, ມີປະສິດທິຜົນ ແລະ ບັນລຸຜົນຕາມແຜນການທີ່ວາງໄວ້, ໃນນາມປະທານກອງປະຊຸມ ຂ້າພະເຈົ້າຂໍຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງ ຈົ່ງສືບຕໍ່ໃຫ້ການຮ່ວມມື ແລະ ສະໜອງຂໍ້ມູນ ຕໍ່ບັນດາເນື້ອໃນທີ່ຈະນໍາເຂົ້າພິຈາລະນາ ແລະ ຮັບຮອງໃນກອງປະຊຸມຄັ້ງນີ້, ຮຽກຮ້ອງມາຍັງບັນດາທ່ານສະມາຊິກສະພາປະຊາຊົນແຂວງ ຈົ່ງນໍາໃຊ້ສິດປະຊາທິປະໄຕ ແລະ ເຊີດຊູຄວາມຮັບຜິດຊອບການເມືອງຂອງຕົນ ໃນການຄົ້ນຄວ້າ, ປະກອບຄໍາເຫັນຕໍ່ທຸກບັນຫາຢ່າງຖີ່ຖ້ວນ, ສ້າງສັນ, ພາວະວິໄສ, ມີເຫດມີຜົນ, ຮັດກຸມ ບົນພື້ນຖານແນວທາງນະໂຍບາຍຂອງພັກ, ກົດໝາຍຂອງລັດ ແລະ ສະພາບຄວາມເປັນຈິງທາງດ້ານເສດຖະກິດ-ສັງຄົມຂອງແຂວງເຮົາ ເພື່ອເຮັດໃຫ້ເນື້ອໃນທີ່ນໍາມາພິຈາລະນາ, ຮັບຮອງຄັ້ງນີ້ ມີຄຸນນະພາບ ແລະ ສາມາດນໍາໄປຈັດຕັ້ງປະຕິບັດຢ່າງເປັນຮູບປະທໍາຢ່າງແທ້ຈິງ.
ໃນໂອກາດອັນສະຫງ່າລາສີນີ້, ໃນນາມປະທານກອງປະຊຸມ, ຂ້າພະເຈົ້າ ຂໍປະກາດໄຂກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງສາລະວັນ ຊຸດທີ II ຢ່າງເປັນທາງການ ນັບແຕ່ເວລານີ້ເປັນຕົ້ນໄປ.
ພາບ-ຂ່າວ: ດີລໍາພົນ ພົມມະຈັນ