ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນ ແຂວງຄໍາມ່ວນ ຊຸດທີ II ໄດ້ປິດລົງດ້ວຍຜົນສໍາເລັດຢ່າງຈົບງາມ ໃນຕອນສວາຍວັນທີ 26 ກໍລະກົດ 2024 ທີ່ສະໂມສອນແຂວງຄໍາມ່ວນ ໂດຍການເປັນປະທານຂອງ ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄຳມ່ວນ, ເປັນກຽດເຂົ້າຮ່ວມມີ ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແຂວງຄໍາມ່ວນ, ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີບັນດາຄະນະປະຈຳພັກແຂວງ, ສະມາຊິກສະພາປະຊາຊົນຂັ້ນແຂວງ, ຫົວໜ້າພະແນກການ, ເຈົ້າເມືອງ, ມີບັນດາທ່ານ ອາດີດການນໍາຂັ້ນສູງຂອງແຂວງ ແລະ ແຂກຖືກເຊີນເຂົ້າຮ່ວມ.
ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຄໍາມ່ວນ ຊຸດທີ II ໄດ້ດໍາເນີນມາເປັນເວລາ 2 ວັນເຄິ່ງ, ນັບແຕ່ວັນທີ 24-26 ກໍລະກົດ 2024 ກໍ່ໄດ້ບັນລຸຜົນສໍາເລັດຕາມຈຸດປະສົງລະດັບຄາດໝາຍທີ່ວາງໄວ້. ກອງປະຊຸມໄດ້ພິຈາລະນາ-ຮັບຮອງບົດລາຍງານຂອງເຈົ້າແຂວງກ່ຽວກັບການຈັດຕັ້ງປະຕິບັດແຜນພັດ ທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ຂອງແຂວງ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024; ພ້ອມທັງສະແດງຄວາມຊົມເຊີຍ ຕໍ່ອົງການປົກຄອງແຂວງ ຄໍາມ່ວນ ທີ່ໄດ້ຕັ້ງໜ້າໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ດ້ວຍການຜັນຂະຫຍາຍແນວທາງ ນະໂຍບາຍ ຂອງພັກ ແລະ ລະບຽບກົດໝາຍ ຂອງລັດ ໂດຍກໍານົດເປັນມາດຕະການ, ວິທີການແກ້ໄຂບັນຫາຕ່າງໆ, ກໍານົດບັນດາຄາດໝາຍສູ້ຊົນ ໃນການຈັດຕັ້ງປະຕິບັດຢ່າງລະອຽດຈະແຈ້ງ ເຮັດໃຫ້ເສດຖະກິດຂອງແຂວງສືບຕໍ່ຂະຫຍາຍຕົວ ແລະ ການເກັບລາຍຮັບງົບປະມານແຫ່ງລັດ ກໍ່ປະຕິບັດໄດ້ລື່ນແຜນການ. ກອງປະຊຸມສະເໜີໃຫ້ອົງການປົກຄອງ ເອົາໃຈໃສ່ແກ້ໄຂຂໍ້ຄົງຄ້າງ, ອຸປະສັກ ແລະ ຂອດອຸດຕັນໃນການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ໃຫ້ມີບາດກ້າວບຸກທະລຸ, ໂດຍມີສ່ວນຮ່ວມ ຂອງປະຊາຊົນ ແລະ ບັນດາການຈັດຕັ້ງທີ່ກ່ຽວຂ້ອງ ລະຫວ່າງແຂວງ ແລະ ເມືອງ ໃຫ້ເລິກເຊິ່ງ ແລະ ກວ້າງຂວາງ. ກອງປະຊຸມໄດ້ ພິຈາລະນາ-ຮັບຮອງ ບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດຄາດໝາຍວຽກພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງຄໍາມ່ວນໄລຍະແຕ່ປິ 2021 ຫາ 2023, ການຈັດຕັ້ງປະຕິບັດວຽກງານດັ່ງກ່າວ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ຕິດພັນກັບການຈັດຕັ້ງປະຕິບັດມະຕິກອງປະຊຸມສະພາປະຊາຊົນແຂວງຄໍາມ່ວນ ສະບັບເລກທີ 15/ຄປຈ.ສພຂ, ລົງວັນທີ 4 ເມສາ 2023 ແລະ ສະບັບເລກທີ14/ຄປຈ.ສພຂ, ລົງວັນທີ 27 ມີນາ 2024; ກອງປະຊຸມໄດ້ ພິຈາລະນາ-ຮັບຮອງ ບົດລາຍງານ ຂອງອົງການປົກຄອງແຂວງ ກ່ຽວກັບການປະເມີນຜົນການຈັດຕັ້ງປະຕິບັດ ຂໍ້ຕົກລົງ ຂອງເຈົ້າແຂວງ ວ່າດ້ວຍການຄຸ້ມຄອງນໍາໃຊ້ທີ່ດິນກະສິກໍາຢູ່ແຂວງຄໍາມ່ວນ ສະບັບເລກທີ 333/ຈຂ.ຄມ, ລົງວັນທີ 3 ມີນາ 2020; ພິຈາລະນາ-ຮັບຮອງ ບົດລາຍງານ ຂອງຄະນະປະຈໍາສະພາປະຊາຊົນຂັ້ນແຂວງ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ຂອງສະພາປະຊາຊົນຂັ້ນແຂວງ ໃນໄລຍະແຕ່ກອງປະຊຸມສະໄໝສາມັນເທື່ອທີ 6 ຫາ ກອງປະຊຸມສະໄໝສາມັນເທື່ອທີ 7 ແລະ ແຜນການເຄື່ອນໄຫວວຽກງານ ແຕ່ກອງປະຊຸມສະໄໝສາມັນເທື່ອທີ 7 ຫາ ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຄຳມ່ວນ ຊຸດທີ II; ພ້ອມດຽວກັນກອງປະຊຸມຍັງໄດ້ເນັ້ນໜັກຕໍ່ການສ້າງ ຂໍ້ຕົກລົງ ຂອງເຈົ້າແຂວງ ຈໍານວນ 5 ສະບັບທີ່ຈະນໍາເຂົ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 8 ໃຫ້ສອດຄ່ອງກັບກັບຂັ້ນຕອນຂອງການສ້າງນິຕິກໍາ ແລະ ສອດຄ່ອງກັບຄວາມຮຽກຮ້ອງຕ້ອງການໃນການຄຸ້ມຄອງລັດ -ຄຸ້ມຄອງສັງຄົມດ້ວຍກົດໝາຍ ໃນແຕ່ລະໄລຍະ, ຍົກສູງຄຸນນະພາບໃນການປະຕິບັດ 3 ພາລະບົດບາດ ຂອງສະພາປະຊາຊົນຂັ້ນແຂວງ, ຮ່ວມກັບອົງການປົກຄອງເພື່ອແກ້ໄຂບັນຫາຄວາມເຄັ່ງຮ້ອນ ຂອງສັງຄົມ ຢ່າງທັນການ. ນອກນັ້ນກອງປະຊຸມໄດ້ຮັບຟັງການຊີ້ແຈງຈາກພາກສ່ວນຕ່າງໆ ຂອງອົງການປົກຄອງແຂວງ ຕາມຫົວຂໍ້ສະເພາະ ຫຼື ຄໍາຊັກຖາມ ທີ່ຄະນະປະຈໍາສະພາປະຊາຊົນຂັ້ນແຂວງໄດ້ຕັ້ງຂຶ້ນ ແລະ ການປະກອບຄຳເຫັນ, ຊັກຖາມ ຂອງສະມາຊິກສະພາປະຊາຊົນຂັ້ນແຂວງ ທີ່ໄດ້ຍົກຂຶ້ນໃນວາລະດໍາເນີນກອງປະຊຸມ ຢາງໄປກົງມາ ແລະ ສ້າງສັນ ເພື່ອພ້ອມກັນຊອກຫາວິທີແກ້ໄຂບັນດາຂໍ້ຄົງຄ້າງ ສິ່ງທ້າທ້າຍ ທີ່ແຂວງເຮົາພວມປະເຊີນຢູ່ໃນປັດຈຸບັນ. ພ້ອມດຽວກັນຍັງໄດ້ຮັບຟັງ ລາຍງານຜົນການພິຈາລະນາ ແລະ ຮັບຮອງ ຈາກກອງປະຊຸມສະໄໝສາມັນ ແລະ ວິສາມັນ ຂອງຄະນະປະຈໍາສະພາປະຊາຊົນຂັ້ນແຂວງ ກ່ຽວກັບການພິຈາລະນາ ເອົາບັນຫາສໍາຄັນພື້ນຖານ ຂອງແຂວງ ຈໍານວນ 23 ມະຕິ, ໃນນັ້ນມີດ້ານເສດຖະກິດ-ສັງຄົມຈໍານວນ 10 ມະຕິ ແລະ ດ້ານບຸກຄະລາກອນ ຈໍານວນ 13 ມະຕິ.
ໃນນາມປະທານກອງປະຊຸມ ທ່ານ ບຸນມີ ພິມມະສອນ ໄດ້ມີຄໍາເຫັນວ່າ: ຜົນສໍາເລັດຂອງກອງປະຊຸມ ຄັ້ງນີ້ ເປັນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງຄໍາມ່ວນ, ແຜນພັດທະນາເສດຖະກິດ-ສັງຄົມ 5 ປີ ຂອງແຂວງ ເຂົ້າສູ່ຊີວິດຕົວຈິງ, ແມ່ນໝາກຜົນແຫ່ງສະຕິປັນຍາ, ສິດປະຊາທິປະໄຕ ກໍ່ຄືການຍົກສູງຄວາມຮັບຜິດຊອບການເມືອງ ຂອງບັນດາທ່ານສະມາຊິກສະພາປະຊາຊົນຂັ້ນແຂວງ, ຄວາມຕັດສິນໃຈສູງ ຂອງອົງການປົກຄອງແຂວງ ແລະ ອົງການທີ່ກ່ຽວຂ້ອງ ທີ່ຈະສືບຕໍ່ພ້ອມກັນແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃຫ້ຕົກໄປເທື່ອລະກ້າວ ເພື່ອພັດທະນາ ແຂວງຄໍາມ່ວນໃຫ້ມີຄວາມໜັກແໜ້ນ. ທີ່ສໍາຄັນຈົ່ງໄດ້ພ້ອມກັນ ນໍາເອົາຜົນສໍາເລັດ ຂອງກອງປະຊຸມຄັ້ງນີ້ໄປເຜີຍແຜ່ ໃຫ້ຜູ້ມີສິດເລືອກຕັ້ງໃນທົ່ວແຂວງຮັບຮູ້ ແລະ ເຂົ້າໃຈຢ່າງກວ້າງຂວາງ ເພື່ອເຂົ້າຮ່ວມໃນການຈັດຕັ້ງປະຕິບັດ ແລະ ສ້າງສະຕິເຄົາລົບລັດຖະທໍາມະນູນ ແລະ ກົດໝາຍໃຫ້ປະກົດຜົນເປັນຈິງ.
ໂດຍ: ເອື້ອ ມະໂນສິງ