ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄຳມ່ວນ ໄດ້ສະແດງຄວາມຮູ້ສຶກ ໃນໂອກາດເປີດກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຄຳມ່ວນ ຊຸດທີ II ຜ່ານສື່ມວນຊົນໃຫ້ຮູ້ວ່າ: ຂ້າພະເຈົ້າມີຄວາມຮູ້ສຶກເປັນກຽດ ແລະພາກພູມໃຈເປັນຢ່າງຍິ່ງ ໃນໂອກາດທີ່ບັນດາສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ກໍ່ຄືອົງການປົກຄອງແຂວງ ເປີດກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ ຊຸດທີ II ໃນລະຫວ່າງວັນທີ 24-26 ກໍລະກົດ 2024. ໃນກອງປະຊຸມຄັ້ງນີ້ ແມ່ນໄດ້ພິຈາລະນາ ແລະ ຮັບຮອງເອົາວຽກທີ່ສໍາຄັນຂອງອົງການປົກຄອງແຂວງ ແລະ ວຽກງານການເຄື່ອນໄຫວຂອງສະພາປະຊາຊົນແຂວງຈຳນວນໜຶ່ງ. ນອກຈາກນັ້ນ ຍັງໄດ້ມີການຊັກຖາມ ຂໍ້ຂ້ອງໃຈຂອງສະມາຊິກສະພາປະຊາຊົນ ແລະ ຮັບຟັງການຊີ້ແຈງບາງບັນຫາ ຈາກອົງການລັດຂັ້ນແຂວງ. ເຊິ່ງພາຍຫຼັງກອງປະຊຸມດັ່ງກ່າວໄດ້ສຳເລັດລົງ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງເຂດທີ 12 ແຂວງຄຳມ່ວນ ກໍ່ຄື ສະມາຊິກສະພາປະຊາຊົນຂັ້ນແຂວງ ຈະໄດ້ສືບຕໍ່ນໍາເອົາເນື້ອໃນຜົນສຳເລັດຂອງກອງປະຊຸມ ສະໄມສາມັນເທື່ອທີ 7 ຂອງສະພາແຫ່ງຊາດ ແລະ ສະໄໝສາມັນເທື່ອທີ 7 ຂອງສະພາປະຊາຊົນຂັ້ນແຂວງ ລົງຈັດຕັ້ງເຜີຍແຜ່ຢູ່ບັນດາເມືອງ ໂດຍປະສານສົມທົບກັບຄະນະສະມາຊິກສະພາປະຊາຊົນຂັ້ນແຂວງ ປະຈຳເຂດເລືອກຕັ້ງແຕ່ລະເມືອງ ກະກຽມເປົ້າໝາຍທີ່ຈະລົງເຜີຍແຜ່ໃນແຕ່ລະຈຸດ ພ້ອມທັງຮັບເອົາຄໍາຄິດເຫັນຄໍາສະເໜີຈາກພໍ່ແມ່ປະຊາຊົນ ແລ້ວຈະໄດ້ມີການປະຊຸມຮ່ວມກັບບັນດາອົງການປົກຄອງຂັ້ນເມືອງ ເພື່ອແບ່ງຄວາມຮັບຜິດຊອບວ່າມີບັນຫາໃດທີ່ຕິດພັນກັບອົງການປົກຄອງເມືອງ ແມ່ນຈະມອບໃຫ້ເມືອງແກ້ໄຂ ແລະ ບັນຫາໃດທີ່ຕິດພັນກັບອົງການປົກຄອງແຂວງ ແມ່ນຈະໄດ້ນຳສະເໜີຕໍ່ອົງການປົກຄອງແຂວງແກ້ໄຂ ຕາມຄຳສະເໜີຕ່າງໆ ເຊິ່ງນັ້ນແມ່ນໜ້າທີ່ຂອງສະພາປະຊາຊົນໃນນາມເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ.

ໂດຍ: ກອງຄໍາ ລໍອິນສານ, ນັກຂ່າວແຂວງຄໍາມ່ວນ.