(ສພຊ) – ໃນວັນທີ 25 ກໍລະກົດນີ້ ສະຫາຍ ສຈ. ປອ. ຈະເລີນ ເຍຍປາວເຮີ ກຳມະການສູນກາງພັກ, ຮອງປະທານສະພາແຫ່ງຊາດ ໄດ້ນຳພາຄະນະການນຳຂັ້ນສູງຂອງສະພາແຫ່ງຊາດ ເຂົ້າຮ່ວມພິທີວາງພວງມາລາ ແລະ ຂຽນປຶ້ມໄວ້ອາໄລ ໃຫ້ແກ່ການຈາກໄປຂອງສະຫາຍ ຫງວຽນ ຝູ ຈ້ອງ ອະດີດເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ທີ່ສະຖານເອກອັກຄະລັດຖະທູດ ແຫ່ງ ສສ.ຫວຽດນາມ ປະຈໍາ ສປປລາວ ເຊິ່ງມີເນື້ອໃນວ່າ: ໃນນາມສະພາແຫ່ງຊາດ ແຫ່ງ ສປປລາວ ແລະ ປະຊາຊົນລາວບັນດາເຜົ່າ, ພວກຂ້າພະເຈົ້າ ມີຄວາມເສົ້າສະຫຼົດໃຈ ແລະ ອາໄລອາວອນຢ່າງສຸດຊຶ້ງ ຕໍ່ການຈາກໄປຢ່າງບໍ່ມີວັນກັບຄືນຂອງສະຫາຍ ຫງວຽນ ຝູ ຈ້ອງ ເລຂາທິການໃຫຍ່ຄະ ນະບໍລິຫານງານສູນກາງພັກກອມມູນິດຫວຽດນາມ ທັງເປັນອະດີດປະທານສະພາແຫ່ງຊາດຫວຽດນາມ ຊຸດທີ XI ແລະ XII.

ການຈາກໄປຂອງ ສະຫາຍ ຫງວຽນ ຝູ ຈ້ອງ ເປັນການສູນເສຍອັນໃຫຍ່ຫຼວງຂອງພັກ, ລັດ ແລະ ປະຊາຊົນຫວຽດນາມ ກໍຄືຂອງພັກ, ລັດ ແລະ ປະຊາຊົນລາວບັນດາເຜົ່າ; ເປັນການສູນເສຍຜູ້ນໍາປະຕິວັດທີ່ໂດດເດັ່ນ, ອົງອາດກ້າ ແກ່ນ, ຜູ້ສືບທອດທີ່ຈົງຮັກພັກດີຢ່າງເລິກເຊິ່ງຕໍ່ລັດທິມາກ-ເລນິນ ແລະ ແນວຄິດ ໂຮ່ ຈີ ມິງ, ນັກທິດສະດີທີ່ມີວິໄສທັດວິທະຍາສາດກວ້າງໄກ ເຊິ່ງຕະຫຼອດຊີວິດແຫ່ງການເຄື່ອນໄຫວປະຕິວັດຂອງສະຫາຍ ໄດ້ມີຄຸນງາມຄວາມດີອັນດີເລີດຕໍ່ປະເທດຊາດ ແລະ ປະຊາຊົນຫວຽດນາມອ້າຍນ້ອງ.

ສະຫາຍ ຫງວຽນ ຝູ ຈ້ອງ ແມ່ນເພື່ອນມິດທີ່ບໍລິສຸດຜຸດຜ່ອງ ແລະ ສະໜິດສະໜົມທີ່ສຸດຂອງພັກ, ລັດ ແລະ ປະຊາຊົນລາວບັນດາເຜົ່າ ໂດຍສະເພາະສະພາແຫ່ງຊາດລາວ; ສະຫາຍເປັນແວ່ນແຍງອັນແຈ້ງໃສໃຫ້ແກ່ການສ້າງລັດແຫ່ງອໍານາດກົດໝາຍສັງຄົມນິຍົມຫວຽດນາມ, ການເພີ່ມທະວີການຕິດຕາມກວດກາ ແລະ ຕ້ານການສໍ້ລາດບັງຫຼວງ ເພື່ອຄວາມຜ່ອງໃສຂອງພັກກຳອຳນາດ, ຄວາມຍຸຕິທໍາໃນສັງຄົມ ແລະ ຄວາມສົມບູນພູນສຸກຂອງປະຊາຊົນຫວຽດນາມ . ສະພາແຫ່ງຊາດ ສປປລາວ ພວກຂ້າພະເຈົ້າ ຂໍຈົດຈໍາຄຸນງາມຄວາມດີອັນໃຫຍ່ຫຼວງ, ຄວາມກ້າແກ່ນພິລະອາດຫານ ແລະ ຄວາມເປັນແບບຢ່າງທີ່ດີເລີດຂອງສະຫາຍ ຫງວຽນ ຝູ ຈ້ອງ ໄປຕະຫຼອດກາລະນານ.

ພວກຂ້າພະເຈົ້າ ເຊື່ອໝັ້ນຢ່າງໜັກແໜ້ນວ່າ ພັກ, ລັດ ແລະ ປະຊາຊົນຫວຽດນາມອ້າຍນ້ອງ ຈະຫັນເອົາຄວາມໂສກເສົ້າເສຍດາຍນີ້ ໃຫ້ກາຍເປັນເຫງົ້າພະລັງແຫ່ງຄວາມສາມັກຄີທົ່ວປວງຊົນທັງຊາດ ພາກັນສ້າງສາ ແລະ ພັດທະນາປະເທດຊາດຫວຽດນາມ ໃຫ້ບັນລຸເປົ້າໝາຍ “ເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ປະຊາທິປະ ໄຕ, ຍຸຕິທຳ ແລະ ສີວິໄລ”.

ໃນເວລາແຫ່ງຄວາມໂສກເສົ້າເສຍດາຍນີ້, ພວກຂ້າພະເຈົ້າ ຂໍແບ່ງເບົາຄວາມທຸກໂສກເສຍໃຈ, ຄວາມອາໄລອາວອນຢ່າງສຸດຊຶ້ງ ຮ່ວມກັບພັກ, ສະພາແຫ່ງຊາດ, ລັດຖະບານ, ແນວໂຮມປະເທດຊາດ, ຄອບຄົວ, ລູກຫຼານຍາດພີ່ນ້ອງ ແລະ ເພື່ອນມິດສະຫາຍ ກໍຄືປະຊາຊົນຫວຽດນາມ ດ້ວຍຄວາມຈິງໃຈມານະທີ່ນີ້ດ້ວຍ.

ຂໍໃຫ້ດວງວິນຍານຂອງສະຫາຍ ຫງວຽນ ຝູ ຈ້ອງ ຈົ່ງໄປສູ່ສຸຂະຕິດ້ວຍເຖີ້ນ!

(ນາງ ໄຊໂສພາພອນ ມິ່ງມຸງຄຸນ)