(ສພຊ) – ວັນສຸກທີ 19 ກໍລະກົດຜ່ານມາ, ໜ່ວຍແມ່ຍິງຮາກຖານກົມການເງິນ ໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານໃນໄລຍະຜ່ານມາ (2018-2024) ໂດຍການເປັນປະທານຮ່ວມຂອງສະຫາຍ ນາງ ດາວເພັດ ສີຫາວົງ ຄະນະພັກຮາກຖານຄະນະເລຂາທິການສະພາແຫ່ງຊາດ, ຮອງເລຂາໜ່ວຍພັກກົມການເງິນ, ສະຫາຍ ນາງ ຄຳຫຼ້າ ສິດທະຈອນ ກຳມະການຄະນະບໍລິຫານງານສະຫະພັນແມ່ຍິງສະພາແຫ່ງຊາດ ແລະ ສະຫາຍ ນາງ ເຂັມພອນ ພຸດທະພັນ ກຳມະການໜ່ວຍພັກ, ຫົວໜ້າໜ່ວຍແມ່ຍິງກົມການເງິນ; ມີບັນດາສະຫະພັນ ແລະ ໜ່ວຍແມ່ຍິງພາຍໃນສະພາແຫ່ງຊາດ ພ້ອມດ້ວຍແຂກຖືກເຊີນ ເຂົ້າຮ່ວມທັງໝົດ 16 ສະຫາຍ, ຍິງ 14 ສະຫາຍ.
ຜູ້ແທນກອງປະຊຸມ 8 ສະຫາຍ ໄດ້ເປັນເອກະສັນຮັບຮອງເອົາບົດສະຫຼຸບຕີລາຄາການຈັດຕັ້ງປະຕິບັດວຽກງານ ແຕ່ປີ 2018 ຮອດປັດຈຸບັນ ແລະ ທິດທາງແຜນການເຄື່ອນໄຫວວຽກງານ 5 ປີຕໍ່ໜ້າ, ບົດສຳຫຼວດການນຳພາລວມຂອງຄະນະໜ່ວຍແມ່ຍິງກົມການເງິນ; ກອງປະຊຸມໄດ້ຜ່ານຂໍ້ຕົກລົງຮັບຮອງເອົາການແຕ່ງຕັ້ງຄະນະໜ່ວຍແມ່ຍິງຮາກຖານກົມການເງິນຊຸດໃໝ່ ສະບັບເລກທີ 35/ສຍ.ສພຊ, ລົງວັນທີ 15 ກໍລະກົດ 2024 ໂດຍແຕ່ງຕັ້ງສະຫາຍ ນາງ ເຂັມພອນ ພຸດທະພັນ ເປັນຫົວໜ້າ, ສະຫາຍ ນາງ ຄໍາກ້ຽງ ເພັດມີໄຊ ເປັນຮອງຫົວໜ້າ ແລະ ສະຫາຍ ນາງ ສຸດາລັດ ໄຊຍະສິດ ເປັນຄະນະ.
ສະຫາຍ ນາງ ດາວເພັດ ສີຫາວົງ ໄດ້ຮຽກຮ້ອງໃຫ້ຄະນະໜ່ວຍແມ່ຍິງຮາກຖານກົມການເງິນຊຸດໃໝ່ ເອົາໃຈໃສ່ຊີ້ນໍາ-ນໍາພາການເມືອງ-ແນວຄິດຂອງສະມາຊິກ ໃຫ້ມີຄຸນທາດການເມືອງໜັກແໜ້ນ, ເຕົ້າໂຮມຄວາມສາມັກຄີ, ຊຸກຍູ້ສະ ມາຊິກແມ່ຍິງເຂົ້າຮ່ວມຂະບວນການຂອງອົງການຈັດຕັ້ງຢ່າງເປັນເຈົ້າການ; ປັບປຸງແບບແຜນການນໍາພາ, ແບບແຜນວິທີເຮັດວຽກ ຢ່າງມີວິທະຍາສາດ ແລະ ມີຫົວຄິດປະດິດສ້າງ ບົນພື້ນຖານລະບຽບຫຼັກການ, ມີການແບ່ງງານ, ແບ່ງຄວາມຮັບ ຜິດຊອບໃຫ້ບຸກຄົນຢ່າງຈະແຈ້ງ ໄປຄຽງຄູ່ກັບການຕິດຕາມກວດກາ, ປະເມີນ, ຖອດຖອນບົດຮຽນເປັນແຕ່ລະໄລຍະ; ດໍາເນີນຊີວິດການເມືອງເປັນປົກກະຕິ ໂດຍຖືເອົາການຕໍານິຕິຊົມຕົນເອງ, ຕິຊົມເຊິ່ງກັນແລະກັນ ໃຫ້ເລິກເຊິ່ງ ແລະ ກວ້າງ ຂວາງກວ່າເກົ່າ; ຕັ້ງໜ້າປະຕິບັດຂໍ້ແຂ່ງຂັນ 3 ດີ ຂອງແມ່ຍິງລາວ ຕິດພັນກັບຂໍ້ແຂ່ງຂັນ ““ຮັກຊາດ ແລະ ພັດທະນາ”” ເຊິ່ງເປັນພື້ນຖານປັດໄຈສໍາຄັນເພື່ອເຮັດໃຫ້ໜ່ວຍເເມ່ຍິງກົມການເງິນ ສາມາດຍາດໄດ້ຜົນງານທີ່ດີເດັ່ນຂຶ້ນກວ່າເກົ່າ; ພ້ອມກັນນັ້ນ, ກໍຕ້ອງເອົາໃຈໃສ່ຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ ຂອງແມ່ຍິງ ໃຫ້ເປັນຂະບວນຟົດຟື້ນ, ຊີ້ນໍາ-ນໍາພາສະມາ ຊິກແມ່ຍິງ ເຮັດລ້ອນໜ້າທີ່ເປັນເສນາທິການໃຫ້ແກ່ການນໍາ ກໍຄືກົມການເງິນໃນຕໍ່ໜ້າ ໃຫ້ມີໝາກຜົນອັນຈົບງາມ.
(ນາງ ອາລິນ ສຸພິມມະປະດິດ)