ຕອນບ່າຍ ຂອງວັນທີ 17 ກໍລະກົດ 2024 ທີ່ຫ້ອງປະຊຸມສະພາປະຊາຊົນ ແຂວງຜົ້ງສາລີ ກໍາມະບານຮາກຖານ ສະພາປະຊາຊົນແຂວງ ໄດ້ຈັດກອງປະຊຸມໃຫຍ່ ຄັ້ງທີ III ຂອງຕົນ ຂື້ນຢ່າງເປັນທາງການ ໂດຍການເປັນປະທານຂອງ ສະຫາຍ ຄໍາມາ ສຸລິວົງ ປະທານກໍາມະບານຮາກຖານ ສພຂ; ເປັນກຽດເຂົ້າຮ່ວມ ແລະ ເປັນປະທານຮ່ວມໂດຍ ສະຫາຍ ນາງ ຕຸລາພອນ ອາລີຍະ ກໍາມະການພັກແຂວງ, ຄະນະບໍລິຫານງານສູນກາງສະຫະພັນກໍາມະບານລາວ, ປະທານສະຫະພັນກໍາມະບານແຂວງຜົ້ງສາລີ ແລະ ສະຫາຍ ນາງ ພອນສະຫວັນ ສັກຕິຄຸນ ເລຂາໜ່ວຍພັກ, ກໍາມະການຄະນະປະຈໍາສະພາປະຊາຊົນແຂວງ; ເຂົ້າຮ່ວມມີຕາງໜ້າຈາກ ສະຫະພັນກໍາມະບານແຂວງ, ກໍາມະບານຮາກຖານ ຈາກຫ້ອງວ່າການແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ ແລະ ພະແນກຍຸຕິທໍາແຂວງ ພ້ອມດ້ວຍສະມາຊີກກໍາມະບານຮາກຖານ ສພຂ ແຂວງຜົ້ງສາລີ ເຂົ້າຮ່ວມຢ່າງພ້ອມພຽງ.

ໃນກອງປະຊຸມ, ສະຫາຍ ຄໍາມາ ສຸລິວົງ ປະທານກໍາມະການຮາກຖານສະພາປະຊາຊົນແຂວງ ໄດ້ຂຶ້ນກ່າວເປີດກອງປະຊຸມຢ່າງເປັນທາງການ ພ້ອມທັງຜ່ານຮ່າງບົດລາຍງານການເມືອງທັງສອງພາກ ໃນໄລຍະ 5 ປີ ທີ່ຜ່ານມາ ເຊິ່ງສະຫາຍໄດ້ຍົກໃຫ້ເຫັນສະພາບລວມ, ດ້ານດີ ຜົນສໍາເລັດ, ດ້ານອ່ອນ ຂໍ້ຄົງຄ້າງ, ບົດຮຽນທີ່ຖອດຖອນໄດ້ ໃນໄລຍະທີ່ຜ່ານມາ ເຊິ່ງໃນໄລຍະທີ່ຜ່ານມາ ຄະນະກໍາມະບານຮາກຖານໄດ້ເອົາໃຈໃສ່ສຶກສາອົບຮົມການເມືອງແນວຄິດເປັນກົກ ໂດຍນໍາເອົາແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມູນເຊື້ອຂອງຊາດ-ຂອງພັກ, ມະຕິ, ຄໍາສັ່ງ, ກົດລະບຽບຂອງສະຫະພັນກໍາມະບານ ແລະ ນິຕິກໍາຕ່າງໆຂອງຂັ້ນເທິງ ທີ່ພົວພັນເຖິງວຽກງານກໍາມະບານ, ຈັດຕັ້ງການເຜີຍແຜ່ເຊື່ອມຊຶມ ເປັນປົກກະຕິ ຈໍານວນ 28 ຄັ້ງ ມີຜູ້ເຂົ້າຮ່ວມທັງໝົດ 465 ເທື່ອຄົນ, ຍິງ 180 ເທື່ອຄົນ. ຕະຫຼອດໄລຍະ 5 ປີ (2019-2024) ຄະນະກໍາມະບານຮາກຖານ ໄດ້ເອົາໃຈໃສ່ຈັດຕັ້ງປະຕິບັດຕາມພາລະບົດບາດ ສິດ ແລະ ໜ້າທີ່ ໃນການເຕົ້າໂຮມຄວາມສາມັກຄີ ອັນເປັນປຶກແຜ່ນ ສ້າງທຸກເງື່ອນໄຂໃຫ້ແກ່ການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ, ປົກປ້ອງສິດຜົນປະໂຫຍດອັນຊອບທໍາຂອງສະມາຊິກກໍາມະບານ, ເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະດ້ວຍຄວາມຮັບຜິດຊອບສູງ ແລະ ມີຜົນສໍາເລັດຕາມການມອບໝາຍຂອງຂັ້ນເທິງ. ມາຮອດປະຈຸບັນ ມີສະມາຊິກກໍາມະບານທັງໝົດ 50 ສະຫາຍ, ຍິງ 21 ສະຫາຍ ກວມ 88,68% ຂອງຈໍານວນພະນັກງານ-ລັດຖະກອນທັງໝົດໃນ 5 ປີທີ່ຜ່ານມາ, ໄດ້ປຸກລະດົມສະມາຊິກກໍາມະບານເຂົ້າເປັນສະມາຊິກກອງທຶນຊ່ວຍເຫຼືອເຊິ່ງກັນ ແລະ ກັນ, ປະຈຸບັນ ມີສະມາຊິກກອງທຶນທັງໝົດ 47 ສະຫາຍ, ຍິງ 21 ສະຫາຍ. ໃນກອງປະຊຸມ ຜູ້ເຂົ້າຮ່ວມ ໄດ້ພ້ອມກັນຄົ້ນຄວ້າ ປະກອບຄໍາຄິດເຫັນໃສ່ຮ່າງບົດລາຍງານການເມືອງທັງສອງພາກ ຢ່າງກົງໄປກົງມາ ພ້ອມທັງຮັບຮອງເອົາບົດລາຍງານດັ່ງກ່າວ. ຈາກນັ້ນ, ຄະນະກໍາມະບານຮາກຖານຊຸດເກົ່າ ໄດ້ຂຶ້ນຜ່ານບົດສໍາຫຼວດນໍາພາລວມ ຕະຫຼອດໄລຍະ 5 ປີ ຜ່ານມາ ພ້ອມທັງກ່າວລາໜ້າທີ່ ຈາກນັ້ນບັນດາຜູ້ແທນກອງປະຊຸມ ໄດ້ໃຊ້ສິດປະຊາທິປະໄຕຂອງຕົນ ປ່ອນບັດເອົາຄະນະກໍາມະບານຮາກຖານສະພາປະຊາຊົນແຂວງ ຊຸດໃໝ່ ເພື່ອນໍາພາ-ຊີ້ນໍາວຽກງານໃນຕໍ່ໜ້າ ເຊິ່ງມີຜູ້ສະໝັກ 5 ສະຫາຍ ເລືອກເອົາ 3 ສະຫາຍ. ຜ່ານການປ່ອນບັດ, ກອງປະຊຸມຄັ້ງປະຖົມມະລຶກ ເຫັນດີເລືອກເອົາ ສະຫາຍ ທອງຄໍາ ວິໄລຈິດ ເປັນປະທານ, ສະຫາຍ ຄໍາພັນ ຄຸນສົມບັດ ເປັນຮອງປະທານ ທັງເປັນປະທານກວດກາ ແລະ ສະຫາຍ ຄໍາຮຽງ ພົມມະສິດ ເປັນຄະນະ ພ້ອມກັນນີ້, ໄດ້ເລືອກເອົາສະຫາຍ ແສງສະຫວ່າງ ຈິດທະວົງ ເປັນຮອງປະທານກວດກາ

ໃນໂອກາດທີ່ຄວາມໝາຍຄວາມສໍາຄັນ, ກອງປະຊຸມຍັງໄດ້ຮັບການໂອ້ລົມ ຂອງສະຫາຍ ນາງ ຕຸລາພອນ ອາລິຍະ ປະທານສະຫະພັນກໍາມະບານແຂວງ ເຊິ່ງກ່ອນອື່ນສະຫາຍໄດ້ຍ້ອງຍໍຊົມເຊີຍມາຍັງຄະນະພັກ, ຄະນະປະຈໍາສະພາປະຊາຊົນແຂວງ ທີ່ໄດ້ເອົາໃຈໃສ່ໃກ້ຊິດຕິດແທດ ແລະ ສ້າງສິ່ງອໍານວຍຄວາມສະດວກ ໃຫ້ແກ່ຄະນະກໍາມະບານຮາກຖານ ໄດ້ຈັດຕັ້ງເຄື່ອນໄຫວຕາມພາລະບົດ ສິດ ແລະ ໜ້າທີ່, ຂອບເຂດຄວາມຮັບຜິດຊອບຂອງຕົນຢ່າງເຕັມສ່ວນ ຈຶ່ງສາມາດຍາດໄດ້ຜົນງານໃນຫຼາຍດ້ານ, ຊົມເຊີຍມາຍັງຄະນະຊຸດເກົ່າ ທີ່ໄດ້ເສຍສະຫຼະເຫື່ອແຮງ, ສຸມສະຕິປັນຍາ, ນໍາພາ-ຊິ້ນໍາສະມາຊິກກໍາມະບານ ປະກອບສ່ວນເຂົ້າທຸກຂະບວນການເຄື່ອນໄຫວຂອງກໍາມະບານ ແລະ ການກະກຽມບັນດາເອກະສານ, ການປະສານສົມທົບກັບສາຍຕັ້ງ-ສາຍຂວາງ ຈົນສາມາດເປີດກອງປະຊຸມຄັ້ງນີ້ຂຶ້ນ ແລະ ມີຜົນສໍາເລັດໄດ້ໂດຍພື້ນຖານ ພ້ອມກັນນີ້ ສະຫຍາຍ ຍັງໄດ້ຮຽກຮ້ອງມາຍັງຄະນະພັກ ໃຫ້ສືບຕໍ່ນໍາພາ-ຊີ້ນໍາ ແລະ ສ້າງຄວາມສະດວກໃຫ້ແກ່ຄະນະກໍາມະບານຮາກຖານຊຸດໃໝ່ ໄດ້ເຄື່ອນໄຫວວຽກງານ, ຂະບວນການຕ່າງໆ ຢ່າງຖືກຕ້ອງ ສອດຄ່ອງ, ເອົາໃຈໃສ່ຕໍ່ວຽກງານສຶກສາອົມຮົມການເມືອງ-ແນວຄິດ, ເຕົ້າໂຮມຄວາມສາມັກຄີ, ຍົກສູງຄວາມຮັບຜິດຊອບຕໍ່ວຽກງານວິຊາສະເພາະ ຕາມຂອບເຂດສິດ ແລະ ພາລະບົດບາດຂອງຕົນ, ຈົ່ງພ້ອມກັນຈັດຕັ້ງປະຕິບັດວຽກງານໃຫ້ມີຄວາມກ້າວໜ້າຂຶ້້ນໄປເທື່ອລະກ້າວ

ໃນໂອກາດນີ້ ຍັງໄດ້ປະກາດຮັບຮອງເອົາກໍາມະບານຮາກຖານສະພາປະຊາຊົນແຂວງ ເປັນກໍາມະບານ 5 ເປັນເຈົ້າ ແລະ ມອບທຸງໄຊ 5 ເປັນເຈົ້າຕື່ມອີກ

ພາບ-ຂ່າວ: ສູນທອງ