ກອງປະຊຸມໃຫຍ່ຄັ້ງທີ III ຂອງສະຫະພັນແມ່ຍິງຮາກຖານ ສະພາປະຊາຊົນແຂວງຜົ້ງສາລີ ໄດ້ໄຂຂຶ້ນ ໃນຕອນເຊົ້າວັນທີ 17 ກໍລະກົດ 2024 ທີ່ຫ້ອງປະຊຸມຂອງສະພາປະຊາຊົນແຂວງ ໂດຍການປະທານຮ່ວມ ຂອງສະຫາຍ ນາງ ພອນສະຫວັນ ສັກຕິຄຸນ ຄະນະປະຈໍາສະພາປະຊາຊົນແຂວງ, ເລຂາໜ່ວຍພັກ ສພຂ; ສະຫາຍນາງ ພອນແກ້ວ ຄຸນສົມເຮືອງ ຮອງປະທານສະຫະພັນແມ່ຍິງແຂວງ ແລະ ສະຫາຍ ນາງ ບົວແສງ ສຸລິວົງ ຮອງປະທານສະຫະພັນແມ່ຍິງຮາກຖານ ສພຂ; ເຂົ້າຮ່ວມມີຕາງໜ້າຈາກ ສະຫະພັນແມ່ຍິງແຂວງ, ສານປະຊາຊົນແຂວງ, ໄອຍະການປະຊາຊົນແຂວງ, ພະແນກຍຸຕິທໍາແຂວງ ແລະ ສະມາຊີກແມ່ຍິງພາຍໃນ ສພຂ ເຂົ້າຮ່ວມຢ່າງພ້ອມພຽງ.

ພາຍຫຼັງ ຄະນະຈັດຕັ້ງພິທີ ຜ່ານຂໍ້ຕົກລົງ ຂອງສະຫະພັນແມ່ຍິງແຂວງ ວ່າດ້ວຍການອະນຸມັດເປີດກອງປະຊຸມໃຫຍ່ ຄັ້ງທີ III ຂອງສະຫະພັນແມ່ຍິງຮາກຖານ ສພຂ, ຂໍ້ຕົກລົງວ່າດ້ວຍການແຕ່ງຕັ້ງກອງເລຂາກອງປະຊຸມ ແລະ ປະທານກອງປະຊຸມກ່າວເປິດຢ່າງເປັນທາງການ; ໃນພິທີໄດ້ຮັບຟັງ ບົດລາຍງານການເມືອງທັງສອງພາກ ຈາກ ສະຫາຍ ນາງ ບົວແສງ ສຸລິວົງ ຈາກນັ້ນ, ຕາງໜ້າຈາກແຕ່ພາກສ່ວນ ແລະ ສະມາຊີກສະຫະພັນແມ່ຍິງຮາກຖານ ສພຂ ກໍ່ໄດ້ປະກອບຄໍາເຫັນແລກປ່ຽນບົດຮຽນ ແລະ ປະກອບຄໍາເຫັນໃສ່ບົດລາຍງານການເມືອງດັ່ງກ່າວ ດ້ວຍຂະບວນຟົດຟື້ນ, ສ້າງສັນ ແລະ ຍັງໄດ້ຮັບຟັງ ຄະນະສະຫະພັນແມ່ຍິງຮາກຖານ ສພຂ ຊຸດເກົ່າ ຜ່ານບົດສໍາຫຼວດການນໍາພາຂອງສະຫະພັນແມ່ຍິງຮາກຖານ ສພຂ ພ້ອມທາງກ່າວລາໜ້າທີ່. ຫຼັງຈາກນັ້ນ, ຕາງໜ້າສະຫະພັນແມ່ຍິງແຂວງ ຂຶ້ນຜ່ານຂໍ້ຕົກລົງ ວ່າດ້ວຍການຮັບຮອງບຸກຄະລາກອນ ຂອງຜູ້ອອກສະໝັກເລືອກຕັ້ງຄະນະຊຸດໃໝ່, ຜ່ານມາດຖານເງື່ອນໄຂຂອງຜູ້ສະໝັກເລືອກຕັ້ງ ແລະ ດໍາເນີນການປ່ອນບັດຄັດເລືອກເອົາຄະນະສະຫະພັນແມ່ຍິງຮາກຖານ ສພຂ ຊຸດໃໝ່, ໂດຍມີຜູ້ສະໝັກ 5 ທ່ານ ເລືອກເອົາ 3 ທ່ານ; ຜ່ານການປ່ອນບັດ ແລະ ຜົນຂອງກອງປະຊຸມຄັ້ງປະຖົມມະລຶກ ເຫັນວ່າ: ກອງປະຊຸມເຫັນດີເລືອກເອົາ ສະຫາຍ ນາງ ພິມພາ ມະຫາວົງທັດ ເປັນປະທານ ສະຫະພັນແມ່ຍິງຮາກຖານ ສພຂ, ສະຫາຍ ນາງ ພອນມະລີ ແສງພະຈັນ ເປັນຮອງປະທານ ແລະ ສະຫາຍ ນາງ ຂັນທະລີ ບຸນມາແສງ ເປັນຄະນະ, ພ້ອມດຽວກັນນີ້, ໄດ້ເລືອກເອົາ ສະຫາຍ ນາງ ພອນມະລີ ແສງພະຈັນ ເປັນປະທານກວດກາສະຫະພັນແມ່ຍິງຮາກຖານ ສພຂ ຊຸດໃໝ່ ແລະ ສະຫາຍ ນາງ ບົວຄໍາ ວົງສາ ເປັນຮອງປະທານກວດກາ ຈາກນັ້ນ, ກອງເລຂາກອງປະຊຸມ ໄດ້ຂຶ້ນຜ່ານມະຕິຂອງກອງປະຊຸມ ເພື່ອຮັບຮອງເອົາຢ່າງເປັນທາງການ.

ມາໃນຕອນທ້າຍຂອງກອງປະຊຸມໄດ້ຮັບຟັງ ສະຫາຍ ນາງ ພອນແກ້ວ ຄຸນສົມເຮືອງ ໄດ້ໃຫ້ກຽດໂອ້ລົມຕໍ່ກອງປະຊຸມຄັ້ງນີ້ ເຊິ່ງກ່ອນອື່ນທ່ານກໍ່ໄດ້ກ່າວ ຍ້ອງຍໍຊົມເຊີຍ ຕໍ່ຜົນງານທີ່ທາງໜ່ວຍສະຫະພັນແມ່ຍິງ ສພຂ ຍາດມາໄດ້ໃນໄລຍະຜ່ານມາ ພ້ອມທັງ ຮຽກຮ້ອງ ແລະ ເນັ້ນໃຫ້ຄະນະຊຸດໃໝ່ ແລະ ສະມາຊີກສະຫະພັນແມ່ຍິງຮາກຖານ ສພຂ ແຂວງຜົ້ງສາລີ ມີບາງຕອນທ່ານໄດ້ກ່າວວ່າ: ໃຫ້ທາງຄະນະຮາກຖານສະຫະພັນແມ່ຍິງ ຕ້ອງເອົາໃສ່ສືກສາອົບຮົມການເມືອງແນວຄິດ ເຮັດໃຫ້ສະມາຊີກເຊື່ອມຊືມແນວແນວທາງ, ນະໂຍບາຍຂອງພັກ, ມີສະຕິເຄົາລົບ ລັດຖະທໍາມະນູນ, ກົດໝາຍ ແລະ ລະບຽບການ ພ້ອມທັງເອົາໃຈໃສ່ຍົກສູງນໍ້າໃຈຮັກຊາດ ແລະ ສຶບທອດມຸນເຊື້ອອັນດີງາມຊາດ ໂດຍສະເພາະ ການອະນຸລັກຮັກສາ ເອກະລັກສະເພາະຂອງແມ່ຍິງລາວ, ມຸນເຊື້ອວັດທະນະທໍາອັນງາມຂອງຊາດ, ຂອງເຜົ່າຕ່າງໆໃຫ້ດີຂຶ້ນກວ່າເກົ່າ; ຕ້ອງເອົາໃຈໃສ່ຕໍ່ ຊາວໜຸ່ມ, ໄວໝຸ່ມ ແລະ ແມ່ຍິງ ໃນການພັດທະນາສະຖາບັ້ນຄອບຄົວໃຫ້ມີຄວາມເຂັ້ມແຂງ ແລະ ມີຄວາມກ້າວໜ້າ ໂດຍຕິດພັນກັບຂະບວນການສ້າງ ແລະ ຂະຫຍາຍຄອບຄົວວັດທະນະທໍາ ພ້ອມທັ້ງສະກັດກັ້ນກົດການຫຍໍ້ທໍ້ຂອງແມ່ຍິງທີ່ເກີດໃນປະຈຸບັນຢ່າງໜັກໜ່ວງ ເປັນຕົ້ນ: ການຕົກເປັນເຍື້ອຂອງການຄ້າມະນຸດ, ການໃຊ້ຄວາມຮຸກແຮງຕໍ່ແມ່ຍິງ ແລະ ເດັກນ້ອຍ ໃຫ້ນັບມື້ລຸດນ້ອຍຖ້ອຍລົງເທື່ອລະກ້າວ ໂດຍການຍຶດຖືຕາມຄໍາຂ້ວນ 3 ດີຂອງແມ່ຍິງ;  ເອົາໃຈໃສ່ຈັດຕັ້ງປະຕິບັດວຽກງານຕາມພະລະບົດບາດຂອງຕົນ ໃຫ້ສອດຄອງກັບມະຕິກອງປະຊຸມໃຫຍ່ ຄັ້ງທີ III ເປັນເປົ້າໝາຍ ແລະ ໜ້າທີອັນສໍາຄັນ ຂອງການສ້າງສາສະຫະພັນແມ່ຍິງພາຍໃນຮາກຖານ ໃຫ້ມີຄວາມໜັກແໜ້ນເຂັ້ມແຂງ, ເຕິບໃຫຍ່ ທາງດ້ານປະລິມານ ແລະ ຄຸນນະພາບ ຈົນສາມາດເຮັດໃຫ້ຂະບວກການຂອງແມ່ຍິງກ້າວຂຶ້ນຢ່າງບໍ່ຢຸດຢັ້ງ; ເພື່ອເຮັດໃຫ້ຄະນະພັກ, ອໍານາດການປົກຄອງ ແລະ ທຸກພາກສ່ວນໃນສັງຄົມ ມີຄວາມເຊື້ອໝັ້ນ ແລະ ໃຫ້ການສະໜັບສະໜຸນຕໍ່ອົງການຈັດຕັ້ງ ກໍ່ຄືແມ່ຍິງ ໃຫ້ໄດ້ໃນລະດັບສູງ.

ພາບ ໂດຍ: ນາງ ຈັນສະໄໝ ສຸລິໄຊ

ຂ່າວ ໂດຍ: ສູນທອງ