(ສພຊ) – ວັນທີ 15 ກໍລະກົດ 2024 ທີ່ຫ້ອງຮັບແຂກສະພາແຫ່ງຊາດ (ສພຊ), ທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ (ກຕທ) ໄດ້ຕ້ອນຮັບການເຂົ້າຢ້ຽມຂ່ຳນັບຂອງບັນດາທ່ານທູດ ໃນນາມຕົວແທນຂອງ ສປປ ລາວ ທີ່ຖືກແຕ່ງຕັ້ງໄປປະຈຳການຢູ່ຕ່າງປະເທດ ນຳໂດຍທ່ານ ສີພັນດອນ ອ້ອຍບົວບຸດດີ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປລາວ ປະຈຳລັດເຊຍ, ທ່ານ ບຸນທະວີ ວິລະວົງ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປລາວ ປະຈຳຊູແອດ, ທ່ານ ຫົງແກ້ວ ສຸກສະຫວັດ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປລາວ ປະຈຳມົງໂກລີ ແລະ ທ່ານ ເທບຖາວອນ ແສງມະນີ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປລາວ ປະຈຳມາເລເຊຍ.

ທ່ານ ສັນຍາ ປຣະເສີດ ສະແດງຄວາມຊົມເຊີຍເປັນຢ່າງສູງຕໍ່ບັນດາທ່ານເອກອັກຄະລັດຖະທູດ ໃນນາມຕົວແທນຂອງ ສປປລາວ ທີ່ຖືກແຕ່ງຕັ້ງໄປປະຈຳການຢູ່ລັດເຊຍ, ຊູແອດ, ມົງໂກລີ ແລະ ມາເລເຊຍ ທັງສະແດງຄວາມເຊື່ອໝັ້ນວ່າ ດ້ວຍບົດຮຽນ ແລະ ປະສົບການທາງດ້ານການທູດຂອງບັນດາທ່ານ ຈະເຮັດໃຫ້ການປະຕິບັດໜ້າທີ່ທາງການທູດ ກໍຄືການເປັນຂົວຕໍ່ອັນສຳຄັນໃນການຊຸກຍູ້ ແລະ ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປລາວ ກັບ ຕ່າງປະເທດ ເວົ້າລວມ, ເວົ້າສະເພາະລະຫວ່າງອົງການນິຕິບັນຍັດ ຂອງ ສປປລາວ ກັບ ຕ່າງປະເທດ ໄດ້ຮັບການເສີມຂະຫຍາຍຍິ່ງໆຂຶ້ນ; ພ້ອມນັ້ນ, ກໍໃຫ້ຂໍ້ມູນກ່ຽວກັບການພົວພັນຮ່ວມມືລະຫວ່າງສະພາແຫ່ງຊາດລາວ ກັບລັດຖະສະພາຂອງລັດເຊຍ, ຊູແອດ, ມົງໂກລີ ແລະ ມາເລເຊຍ.

ທ່ານປະທານ ກຕທ ຍັງໄດ້ແຈ້ງໃຫ້ຊາບທິດທາງແຜນການ​ການ​ພົວພັນ​ຮ່ວມ​ມືໃນ​ຕໍ່ໜ້າ ລະຫວ່າງສະພາແຫ່ງຊາດລາວ ກັບ ລັດຖະສະພາຕ່າງປະເທດ ເຊິ່ງຈະສືບຕໍ່ຄົ້ນຄວ້າ ແລະ ເຊັນບົດບັນທຶກວ່າດ້ວຍການຮ່ວມມື ໂດຍສະ ເພາະແມ່ນກັບລັດຖະສະພາປະເທດເພື່ອນມິດຍຸດທະສາດ ເພື່ອຊຸກຍູ້ສົ່ງເສີມ ແລະ ເປີດກວ້າງການພົວພັນຮ່ວມມືບົນພື້ນຖານແນວທາງການຕ່າງປະເທດຂອງພັກ-ລັດເຮົາ; ແລກປ່ຽນຄະນະຜູ້ແທນຂັ້ນສູງ ແລະ ຂັ້ນຕ່າງໆຂອງ ສພຊ, ຄະ ນະມິດຕະພາບລັດຖະສະພາລາວ ກັບ ຕ່າງປະເທດ ແລະ ສະພາປະຊາຊົນຂັ້ນແຂວງ (ສພຂ) ກັບ ລັດຖະສະພາຕ່າງ ປະເທດ ເພື່່ອຢ້ຽມຢາມ, ເຮັດວຽກ ແລະ ຖອດຖອນບົດຮຽນເຊິ່ງກັນແລະກັນ; ເຂົ້າຮ່ວມເຄື່ອນໄຫວ ແລະ ປະຕິບັດພັນທະຕໍ່ບັນດາອົງການຈັດ ຕັ້ງພາກພື້ນ ແລະ ສາກົນ ທີ່ສະພາແຫ່ງຊາດລາວເປັນພາຄີ ເປັນຕົ້ນແມ່ນ IPU, ASEP, APF, APPF ແລະອື່ນໆ; ເພີ່ມທະວີການຕິດຕາມກວດກາ ແລະ ຊຸກຍູ້ການປະຕິບັດສັນຍາ ແລະ ສົນທິສັນຍາທີ່ ສປປລາວ ເປັນພາຄີ; ສືບຕໍ່ແລກ ປ່ຽນສານອວຍພອນ, ສານຊົມເຊີຍ, ສານຕອບຂອບໃຈ, ສານເສົ້າສະຫຼົດໃຈ ແລະອື່ນໆ ກັບບັນດາລັດຖະສະພາຕ່າງປະເທດ; ຕ້ອນຮັບການເຂົ້າພົບປະເຮັດວຽກ ແລະ ຢ້ຽມຂໍ່ານັບຂອງບັນດາທູຕານຸທູດ, ຜູ້ຕາງໜ້າອົງການຈັດຕັ້ງສາກົນປະຈຳລາວ ແລະ ແຂກຕ່າງປະເທດ ທີ່ມາຢ້ຽມຢາມ ສປປລາວ.

ໂອກາດດຽວກັນ, ທ່ານ ສັນຍາ ປຣະເສີດ ຍັງໄດ້ສະເໜີບັນດາທ່ານເອກອັກຄະລັດຖະທູດ ສືບຕໍ່ຊຸກຍູ້ ແລະ ສົ່ງເສີມການພົວພັນຮ່ວມມືດ້ານເສດຖະກິດ, ການຄ້າ ແລະ ການລົງທຶນ ລະຫວ່າງ ສປປລາວ ກັບ ຕ່າງປະເທດ ໃຫ້ຂະ ຫຍາຍຕົວຂຶ້ນກວ່າເກົ່າ; ຊ່ວຍຊຸກຍູ້ການພົວພັນຮ່ວມມືລະຫວ່າງອົງການນິຕິບັນຍັດ ໃຫ້ເປັນປົກກະຕິ ແລະ ຕໍ່ເນື່ອງ ໂດຍມີການແລກປ່ຽນຄະນະຜູ້ແທນນຳກັນໃນລະດັບຕ່າງໆຢ່າງປົກກະຕິ; ຊຸກຍູ້ການຮ່ວມມືທາງດ້ານວິຊາການ ໂດຍຮູບການຈັດສຳມະນາ, ເຝິກອົບຮົມ, ທັດສະນະສຶກສາ ແລະ ແລກປ່ຽນບົດຮຽນ ເພື່ອຍົກສູງຂີດຄວາມສາມາດໃຫ້ແກ່ ສພຊ ແລະ ສພຂ ຂອງ ສປປລາວ; ສືບຕໍ່ສະໜັບສະໜູນການພົວພັນຮ່ວມມືນຳກັນ ໃນເວທີລັດຖະສະພາພາກພື້ນ ແລະ ສາກົນ ຕາມຄວາມເໝາະສົມ.

ບັນດາທ່ານເອກອັກຄະລັດຖະທູດ ໄດ້ສະແດງຄວາມຂອບໃຈຢ່າງສູງຕໍ່ການຕ້ອນຮັບ ແລະ ໃຫ້ຂໍ້ມູນ, ຄຳເຫັນແນະນຳ, ແນວທາງນະໂຍບາຍ, ລະບຽບຫຼັກການ, ຄວາມຄາດຫວັງ ແລະ ຂໍ້ສະເໜີຕ່າງໆ ໃນຂົງເຂດວຽກງານທີ່ກ່ຽວຂ້ອງກັບການພົວພັນຮ່ວມມືກັບຕ່າງປະເທດ ແລະ ຈະນຳໄປຈັດຕັ້ງປະຕິບັດ, ໂຄສະນາເຜີຍແຜ່ ແລະ ເປັນບ່ອນອີງໃນການ ຈັດຕັ້ງປະຕິບັດວຽກງານໃນໄລຍະປະຈຳການຢູ່ຕ່າງປະເທດຂອງຕົນ.
(ນາງ ອາລິນ ສຸພິມມະປະດິດ)