(ສພຊ) – ຄະນະເລຂາທິການສະພາແຫ່ງຊາດ (ຄລສ) ໄດ້ຈັດກອງປະຊຸມເຝິກອົບຮົມວຽກງານເນື້ອໃນ ແລະ ຂັ້ນຕອນການກະກຽມຮອບດ້ານໃຫ້ແກ່ກອງປະຊຸມສະໄໝສາມັນຂອງສະພາປະຊາຊົນຂັ້ນແຂວງ (ສພຂ) ໃນລະຫວ່າງວັນທີ 12-14 ກໍລະກົດນີ້ ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ສິງຄຳ ວົງພະຈັນ ຮອງເລຂາທິການສະພາແຫ່ງຊາດ; ເຂົ້າຮ່ວມມີບັນດາທ່ານເລຂາທິການ, ຮອງເລຂາທິການ ຜູ້ຊີ້ນຳຂະແໜງ ຄົ້ນຄວ້າ-ສັງລວມ ແລະ ພະນັກງານຂະແໜງຄົ້ນຄວ້າ-ສັງລວມ ຂອງ ສພຂ 6 ແຂວງ (ນະຄອນຫຼວງວຽງຈັນ, ຫົວ ພັນ, ຊຽງຂວາງ, ວຽງຈັນ, ບໍລິຄຳໄຊ, ໄຊສົມບູນ) ພ້ອມດ້ວຍຄະນະກົມ, ຄະນະພະແນກ ແລະ ພະນັກງານຈາກພາກສ່ວນທີ່ກ່ຽວຂ້ອງຂອງ ຄລສ.

ຈຸດປະສົງຂອງການເຝິກອົບຮົມ ກໍເພື່ອຍົກສູງຄຸນນະພາບໃນການເປັນເສນາທິການທາງດ້ານເນື້ອໃນ ແລະ ຮັບປະກັນຄວາມພ້ອມໃນການກະກຽມ ແລະ ຮັບໃຊ້ກອງປະຊຸມສະໄໝສາມັນຂອງສະພາປະຊາຊົນຂັ້ນແຂວງ ໃຫ້ມີປະສິດທິພາບ ແລະ ປະສິດທິຜົນສູງ; ຍົກສູງຂີດຄວາມສາມາດທາງດ້ານເນື້ອໃນ ໂດຍສະເພາະບັນດາເອກະ ສານທີ່ຕິດພັນກັບກອງປະຊຸມ ສພຂ ໃຫ້ມີຄຸນນະພາບ ທັງເປັນການຖ່າຍທອດ ແລະ ແລກປ່ຽນບົດຮຽນທາງດ້ານທິດສະດີ, ພຶດຕິກຳຕົວຈິງ, ການສ້າງຄວາມເຂັ້ມແຂງທາງດ້ານການຂີດຂຽນເອກະສານປິ່ນອ້ອມ ໃຫ້ແກ່ກອງປະຊຸມສະໄໝສາມັນຂອງ ສພຂ ເປັນຕົ້ນບົດສັງລວມຄວາມເຫັນ, ຮ່າງຄຳຖາມເຈາະຈີ້ມ, ບົດສະຫຼຸບ, ການເປັນເລຂາ ນຸການກອງປະຊຸມຮອບດ້ານ ແລະ ເອກະສານອື່ນໆ.

ຜູ້ເຂົ້າຮ່ວມເຝິກອົບຮົມ ໄດ້ຮັບຟັງການສະເໜີບົດຮຽນຕົ້ນຕໍຄື: ການຮ່າງບົດໂອ້ລົມໃຫ້ການນຳ ແລະ ບົດສັງ ລວມຄຳເຫັນໃຫ້ປະທານກອງປະຊຸມ, ການສ້າງຄຳຖາມເຈາະຈີ້ມ ແລະ ບົດປະກອບຄຳເຫັນຕໍ່ກອງປະຊຸມ, ຂັ້ນຕອນການກະກຽມວຽກງານຮອບດ້ານໃຫ້ແກ່ກອງປະຊຸມສະໄໝສາມັນຂອງສະພາແຫ່ງຊາດ; ຈາກນັ້ນ. ກໍສົນທະນາແລກປ່ຽນຄຳເຫັນເຊິ່ງກັນແລະກັນ, ແລະ ແບ່ງກຸ່ມເພື່ອເຝິກຫັດຕົວຈິງແຕ່ລະເນື້ອໃນ.

ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກມູນນິທິອາຊີ (The Asia Foundation – TAF) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ.

                 (ຂ່າວ-ພາບ: ອານຸສອນ ພູມມີທອນ)