(ສພຊ) – ຕອນບ່າຍວັນທີ 11 ກໍລະກົດນີ້ ທີ່ສະພາແຫ່ງຊາດ, ສະຫາຍ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ພົບປະກັບສະຫາຍ ໂຕ ເລິມ (Tô Lâm) ກໍາມະການກົມການເມືອງສູນກາງພັກກອມມູນິດຫວຽດນາມ, ປະທານປະເທດ ພ້ອມດ້ວຍຄະນະຜູ້ແທນຂັ້ນສູງ ແຫ່ງ ສສ.ຫວຽດນາມ ໃນໂອກາດຢ້ຽມຢາມທາງລັດຖະກິດຢູ່ ສປປລາວ ລະຫວ່າງວັນທີ 11-12 ກໍລະກົດ 2024 ຕອບສະໜອງຕາມຄຳເຊີນຂອງສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ທັງເປັນການເພີ່ມທະວີ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ກໍຄືປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ໃຫ້ຈະເລີນງອກງາມ ແລະ ແຕກດອກອອກຜົນຍິ່ງໆຂຶ້ນ.
ໃນການພົບປະ, ສະຫາຍ ປອ. ໄຊສົມພອນ ພົມວິຫານ ໄດ້ສະແດງຄວາມຊົມເຊີຍຕໍ່ສະຫາຍ ໂຕ ເລິມ ທີ່ໄດ້ຮັບເລືອກຕັ້ງເປັນປະທານປະເທດ ໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ XV ເມື່ອທ້າຍເດືອນພຶດສະພາຜ່ານມາ ທັງສະແດງຄວາມຂອບໃຈເປັນຢ່າງສູງທີ່ໄດ້ເລືອກ ສປປລາວ ເປັນປະເທດທຳອິດໃນການຢ້ຽມຢາມຕ່າງປະເທດໃນນາມປະທານປະເທດ ແຫ່ງ ສສ.ຫວຽດນາມ ແລະ ຝາກຄວາມຢ້ຽມຢາມຖາມຂ່າວອັນອົບອຸ່ນ ແລະ ຄວາມສາມັກຄີຮັກແພງຖານສະຫາຍອ້າຍນ້ອງ ໄປຍັງສະຫາຍ ເຈິ່ນ ແທງ ເໝິນ (Trần Thanh Mẫn) ກໍາມະການກົມການເມືອງສູນກາງພັກກອມມູນິດຫວຽດນາມ, ປະທານສະພາແຫ່ງຊາດ ພ້ອມດ້ວຍບັນດາສະຫາຍການ ນໍາຂອງສະພາແຫ່ງຊາດ, ລັດຖະບານ ແລະ ປະຊາຊົນຫວຽດນາມອ້າຍນ້ອງ. ພ້ອມນັ້ນ, ຍັງໄດ້ຕີລາຄາສູງຕໍ່ບັນດາຜົນ ສຳເລັດອັນໃຫຍ່ຫຼວງ, ຮອບດ້ານ, ໜ້າສັນລະເສີນ ທີ່ພັກ, ລັດ ແລະ ປະຊາຊົນຫວຽດນາມອ້າຍນ້ອງ ຍາດມາໄດ້ໃນຕະຫຼອດໄລຍະຜ່ານມາ ໂດຍສະເພາະໃນຊຸມປີມໍ່ໆມານີ້ ເຖິງວ່າສະພາບການເສດຖະກິດໂລກ ແລະ ພາກພື້ນ ມີຫຼາຍສິ່ງທ້າທາຍ, ແຕ່ພາຍໃຕ້ການນໍາພາອັນຖືກຕ້ອງ, ສະຫຼາດສ່ອງໃສ, ເດັດດ່ຽວ ຂອງພັກກອມມູນິດຫວຽດນາມ ອັນມີສະຫາຍເລຂາທິການໃຫຍ່ ຫງວຽນ ຝູ ຈ໋ອງ (Nguyễn Phú Trọng) ເປັນຜູ້ນໍາໜ້າ, ການບັນຊາທີ່ເຂັ້ມແຂງຂອງລັດຖະບານ, ການຕິດຕາມກວດກາທີ່ເຂັ້ມງວດຂອງສະພາແຫ່ງຊາດ ເຮັດໃຫ້ຫວຽດນາມ ສາມາດຮັກສາຈັງຫວະການພັດທະນາເສດຖະກິດ-ສັງຄົມໃນລະດັບສູງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນເລື້ອຍໆ, ສະຖຽນລະພາບທາງດ້ານການເມືອງມີຄວາມໜັກແໜ້ນ, ວຽກງານປ້ອງກັນຊາດ-ປ້ອງກັນຄວາມສະຫງົບ ມີຄວາມເຂັ້ມແຂງ, ການຕ່າງປະເທດ ໄດ້ຮັບການເປີດກວ້າງ ເຮັດໃຫ້ບົດບາດອິດທິພົນຂອງຫວຽດນາມ ນັບມື້ສູງເດັ່ນຂຶ້ນໃນເວທີພາກພື້ນ ແລະ ສາກົນ. ຕີລາຄາສູງຕໍ່ການແລກປ່ຽນການຢ້ຽມຢາມຢ່າງປົກກະຕິຂອງບັນດາສະຫາຍການນໍາຂັ້ນສູງຂອງພັກ-ລັດ, ທ້ອງຖິ່ນຂອງສອງປະເທດ ໃນຕະຫຼອດໄລຍະຜ່ານມາ; ພິເສດແມ່ນການທີ່ສູນກາງພັກກອມມູນິດຫວຽດນາມ ໄດ້ຈັດຊຸດຄົ້ນຄວ້າ ແລະ ແລກປ່ຽນຫົວຂໍ້ສະເພາະ ໃຫ້ແກ່ການນໍາຍຸດທະສາດຂອງສູນກາງພັກປະຊາຊົນປະຕິວັດລາວສະໄໝທີ XI ຈໍານວນຫຼາຍຊຸດ ເປັນການສະແດງໃຫ້ເຫັນເຖິງຄວາມໄວ້ເນື້ອເຊື່ອໃຈເຊິ່ງກັນແລະກັນຂອງສອງພັກ, ສອງລັດ ແລະ ປະຊາຊົນສອງຊາດ ແບບເຂົ້າເມັດຫັກ, ຜັກເສັ້ນແບ່ງ, ສຸກທຸກຢູ່ຄຽງຂ້າງກັນສະເໝີມາ. ສະເພາະການພົວພັນຮ່ວມມືລະຫວ່າງສອງອົງການນິຕິບັນຍັດ ໄດ້ຮັບການເສີມຂະຫຍາຍທາງກວ້າງ ແລະ ທາງເລິກສະເໝີມາ, ໃນໄລຍະມໍ່ໆມານີ້ ສອງສະພາແຫ່ງຊາດໄດ້ມີການແລກປ່ຽນການຢ້ຽມຢາມການນໍາຂັ້ນສູງໃນລະດັບຕ່າງໆ ເປັນຕົ້ນຂັ້ນປະທານສະພາແຫ່ງຊາດ, ຮອງປະທານສະພາແຫ່ງຊາດ, ປະທານກໍາມາທິການ, ສະມາຊິກສະພາແຫ່ງຊາດ ຕະຫຼອດເຖິງສະມາຊິກສະພາຂັ້ນທ້ອງຖິ່ນນໍາກັນ, ຮ່ວມກັນຈັດກອງປະຊຸມສໍາມະນາແລກປ່ຽນບົດຮຽນຕ່າງໆ; ພິເສດ ເພື່ອນຫວຽດນາມໄດ້ສົ່ງຊ່ຽວຊານມາໃຫ້ບົດຮຽນແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ພະນັກງານສະພາແຫ່ງຊາດລາວ, ມີການພົວພັນຮ່ວມມື ແລະ ສະໜັບສະໜູນເຊິ່ງກັນແລະກັນຢ່າງແໜ້ນແຟ້ນໃນເວທີລັດຖະສະພາພາກພື້ນ ແລະ ສາກົນ.
ສະຫາຍ ປອ. ໄຊສົມພອນ ພົມວິຫານ ຍັງແຈ້ງໃຫ້ຊາບວ່າ: ລະຫວ່າງວັນທີ 03-05 ກໍລະກົດຜ່ານມາ, ສະຫາຍ ຫງວຽນ ຄັກ ດິ້ງ (Nguyễn Khắc Định) ກຳມະການສູນກາງພັກກອມມູນິດຫວຽດນາມ, ຮອງປະທານສະພາແຫ່ງຊາດ ໄດ້ມາຢ້ຽມຢາມ, ເຮັດວຽກ ແລະ ຮ່ວມກັບສະພາແຫ່ງຊາດລາວ ຈັດກອງປະຊຸມສຳມະນາວິທະຍາສາດກ່ຽວກັບການປັບປຸງລັດຖະທຳມະນູນ ແລະ ບົດຮຽນການຄົ້ນຄວ້ານິຕິບັນຍັດ ເປັນການນໍາເອົາບົດຮຽນທີ່ມີຄວາມສໍາຄັນ ແລະ ລໍ້າຄ່າຂອງຫວຽດນາມ ມາໃຫ້ແກ່ສະພາແຫ່ງຊາດລາວ; ໃນໂອກາດດັ່ງກ່າວ, ບັນດາກໍາມາທິການຂອງສະພາແຫ່ງຊາດ ກໍໄດ້ມີການພົບປະແລກປ່ຽນນໍາກັນຕື່ມອີກ ເພື່ອສະຫຼຸບ ແລະ ກໍານົດທິດທາງການຮ່ວມມືນໍາກັນ ເປັນຕົ້ນແມ່ນສືບຕໍ່ຮ່ວມກັນຕິດຕາມກວດກາໃນຫົວຂໍ້ທີ່ພົ້ນເດັ່ນ ແລະ ເປັນປະໂຫຍດໃຫ້ແກ່ການຮ່ວມມືຂອງສອງປະເທດ; ຊຸກຍູ້ລັດຖະບານສອງປະ ເທດ ຈັດຕັ້ງປະຕິບັດບັນດາສັນຍາ, ສົນທິສັນຍາ ແລະ ຂໍ້ຕົກລົງ, ບັນດາໂຄງການຮ່ວມມືທີ່ສອງຝ່າຍລົງນາມຮ່ວມກັນ ເພື່ອຊຸກຍູ້ ແລະ ສົ່ງເສີມການພົວພັນຮ່ວມມືທາງດ້ານເສດຖະກິດ, ການຄ້າ ແລະ ການລົງທຶນ ລະຫວ່າງສອງປະເທດ ໃຫ້ຂະ ຫຍາຍຕົວສູງຂຶ້ນ ສົມຄູ່ກັບການພົວພັນຮ່ວມມືດ້ານການເມືອງ; ສືບຕໍ່ຮ່ວມມືກັນສ້າງປຶ້ມ 50 ປີ ແຫ່ງສາຍພົວພັນລະ ຫວ່າງສະພາແຫ່ງຊາດ ລາວ ແລະ ຫວຽດນາມ ເຊິ່ງທັງສອງຝ່າຍຈະຂຽນໃຫ້ສໍາເລັດ ແລະ ພິມຈໍາໜ່າຍໃນເດືອນກັນຍາ 2025 ໃຫ້ທັນກັບການສະເຫຼີມສະຫຼອງການສ້າງຕັ້ງສະພາແຫ່ງຊາດຫວຽດນາມ ຄົບຮອບ 80 ປີ ເພື່ອເປັນມໍລະດົກໃຫ້ຄົນຮຸ່ນໜຸ່ມໄດ້ສຶກສາ, ຮຽນຮູ້, ສືບທອດ ແລະ ປົກປັກຮັກສາສາຍພົວພັນແບບພິເສດລາວ-ຫວຽດນາມ ມີໜຶ່ງດຽວໃນໂລກໃຫ້ໝັ້ນຄົງຕະຫຼອດໄປ; ສະພາແຫ່ງຊາດຫວຽດນາມ ໃຫ້ການສະໜັບສະໜູນ ແລະ ຊ່ວຍເຫຼືອດ້ານຊ່ຽວຊານ, ທຶນຮອນ ແລະ ອຸປະກອນຮັບໃຊ້ຫ້ອງການ ເພື່ອໃຫ້ສະພາແຫ່ງຊາດລາວ ເປັນເຈົ້າພາບກອງປະຊຸມໃຫຍ່ໄອປາ ຄັ້ງທີ 45 ແລະ ກອງປະຊຸມອື່ນທີ່ປິ່ນອ້ອມ.
ສະຫາຍ ໂຕ ເລິມ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ແລະ ຄໍາເວົ້າອັນຈົບງາມຂອງປະທານສະພາແຫ່ງຊາດລາວ ທີ່ເຕັມໄປດ້ວຍໄມຕີຈິດມິດຕະພາບຖານສະຫາຍອ້າຍນ້ອງ, ສະແດງຄວາມຊົມເຊີຍຕໍ່ໝາກຜົນຂອງການເຄື່ອນໄຫວ ແລະ ການຮ່ວມມື ລະຫວ່າງສອງສະພາແຫ່ງຊາດຫວຽດນາມ-ລາວ, ລາວ-ຫວຽດນາມ ໃນໄລຍະຜ່ານມາ; ສະຫາຍຍັງໄດ້ແຈ້ງສະພາບການພັດທະນາເສດຖະກິດ-ສັງຄົມຂອງຫວຽດນາມໂດຍສັງເຂບ, ຕີລາຄາສູງຕໍ່ການພົວພັນຮ່ວມມືລະຫວ່າງສອງປະເທດໃນໄລຍະຜ່ານມາ, ແລກປ່ຽນບາງສະພາບການທີ່ພົ້ນເດັ່ນຢູ່ພາກພື້ນ ແລະ ສາກົນ ພ້ອມທັງແຈ້ງຜົນການພົບປະສອງຝ່າຍຢ່າງເປັນທາງການລະຫວ່າງສອງປະທານປະເທດ ພ້ອມດ້ວຍຄະນະຂອງສອງຝ່າຍ.
(ນາງ ອາລິນ ສຸພິມມະປະດິດ)