ໃນວັນທີ 3-5 ກໍລະກົດ 2024 ທີ່ຜ່ານມາ ຮອງປະທານສພາປະຊາຊົນແຂວງ, ສະມາຊິກສະພາປະຊາຊົນແຂວງບໍລິຄຳໄຊ ໄດ້ລົງຕິດຕາມ ກວດກາ ແລະ ຊຸກຍູ້ການປະຕິດບັດພາລະບົດບາດ ສິດ-ໜ້າທີ່ ຂອງອົງການສຶບສວນ-ສອບສວນ ການປະຕິດບັດກົດໝາຍໃນການດຳເນີນຄະດີຢູ່ເມືອງບໍລິຄັນ, ເມືອງວຽງທອງ ແລະ ເມືອງຄຳເກີດ ໂດຍການເປັນປະທານຂອງທ່ານ ເລື່ອນວິໄລ  ຈັນທະລາພັນ ຄະນະປະຈຳພັກແຂວງ, ຮອງປະທານສະພາປະຊາຊົນແຂວງ ພ້ອມດ້ວຍຄະນະ, ມີທ່ານ ເພັດສະໃໝ ໄຊຍະທິຈັກ ກຳມະການພັກແຂວງ, ເລຂາພັກເມືອງ, ເຈົ້າເມືອງຄຳເກີດ, ມີບັນດາເຈົ້າໜ້າທີ່ສຶບສວນ-ສອບສວນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ກອງປະຊຸມໄດ້ຮັບຟັງການລາຍງານຂອງ ບັນດາອົງການສຶບສວນ-ສອບສວນກໍ່ຄື: ເຈົ້າໜ້າທີ່ຕຳຫຼວດ, ຫ້ອງການກະສິກຳ ແລະ ປ່າໄມ້, ຫ້ອງການສວຍສາອາກອນ ແລະ ເຈົ້າໜ້າທີ່ຕ້ານການສໍ້ລາດບັງຫຼວງເມືອງ ໂດຍຫຍໍ້ກ່ຽວກັບວຽກງານການປະຕິບັດພາລະບົດບາດສິດ ແລະ ໜ້າທີ່ຂອງອົງການສຶບສວນ-ສອບສວນ, ການປະຕິບັດກົດໝາຍໃນການດຳເນີນຄະດີ, ການນຳໃຊ້ 7 ມາດຕະການສະກັດກັ້ນ ແລະ ການປະຕິບັດກົດໝາຍໃນສະຖານທີ່ກັກຕົວ, ກັກຂັງ, ສູນດັດສ້າງ ແລະ ຄ້າຍດັດສ້າງ ເພື່ອແນ່ໃສ່ການເກັບກຳຂໍ້ມູນ, ບັນຫາຫາງຂອງສຽງສັງຄົມ.     ຈາກນັ້ນ ບັນດາເຈົ້າໜ້າທີ່ຂັ້ນແຂວງ-ຂັ້ນເມືອງກໍ່ໄດ້ປະກອບຄຳຄິດຄຳເຫັນຢ່າງກົງໄປມາ ເພື່ອເຮັດໃຫ້ການປະຕິບັດໜ້າທີ່, ພາລະບົດບາດຂອງແຕ່ລະອົງການສຶບສວນ-ສອບສວນໄດ້ຮັບໝາກຜົນ. ຕອນທ້າຍປະທານກອງປະຊຸມໄດ້ມີຄຳເຫັນໂອ້ລົມ ແລະ ຊີ້ນຳຕື່ມ ກ່ອນອື່ນທ່ານໄດ້ສະແດງຄວາມຍ້ອງຍໍຕໍ່ກັບ ຮັບຜົນສຳເລັດທີ່ແຕ່ລະອົງການຍາດມາໄດ້ໃນໄລຍະຜ່ານມາ ແລະ ເນັ້ນໜັກໃຫ້ແຕ່ລະພາກສ່ວນສຶບຕໍ່ຊຸກຍູ້ ແລະ ປັບປຸງແກ້ໄຂ ບັນຫາຫາງສຽງສັງຄົມ, ເອົາໃຈໃສ່ປະຕິບັດສິດ, ພາລະບົດບາດຂອງເຈົ້າໜ້າທີ່ອົງການສຶບສວນ-ສອບສວນຢ່າງເຂັ້ມງວດ, ສຶບຕໍ່ສາອົບຮົມການເມືອງແນວຄິດໃຫ້ພໍ່ແມ່ປະຊາຊົນບັນດາເຜົ່າ, ຕໍ່ຜູ້ທີ່ກະທຳຜິດໃຫ້ມີຄວາມເຂົ້າໃຈຢ່າງກ້ວາງຂວາງ, ເອກະພາບກັບການນຳໃຊ້ 7 ມາດຕະການ ໃນໝວດ 135, 136  ແລະ ການຈັດຕັ້ງປະຕິບັດຄໍາຕັດສິນຂອງສານ ເພື່ອຫັນປ່ຽນຢ່າງຮອບດ້ານ ແລະ ນັບມື້ນັບດີຂຶ້ນ.

ໃນໂອກາດເຄື່ອນໄຫວໃນຄັ້ງນີ້, ສະພາປະຊາຊົນແຂວງ ຕາງໜ້າໃຫ້ກອງທຶນຊ່ວຍເຫຼືອສັງຄົມສະພາແຫ່ງຊາດມອບເງິນ ຈຳນວນ 100.000.000 ກີບ ເພື່ອໄປຊ່ວຍປະຊາຊົນເມືອງຄໍາເກີດ ທີ່ໄດ້ຮັບຜົນກະທົບຈາກລົມພາຍຸພັດເຂົ້າເມືອງ ຕາງໜ້າສະພາປະຊາຊົນແຂວງ ມອບໂດຍທ່ານ ເລື່ອນວິໄລ  ຈັນທະລາພັນ ຄະນະປະຈຳພັກແຂວງ, ຮອງປະທານສະພາປະຊາຊົນແຂວງ ຮັບໂດຍທ່ານ ເພັດສະໃໝ ໄຊຍະທິຈັກ ກຳມະການພັກແຂວງ, ເລຂາພັກເມືອງ, ເຈົ້າເມືອງຄຳເກີດ.