ໃນຕອນເຊົ້າວັນທີ 4 ກໍລະກົດ 2024, ທີ່ສຳນັກງານສະພາປະຊາຊົນແຂວງຄໍາມ່ວນ, ກຳມະບານຮາກຖານສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມໃຫຍ່ຄັ້ງທີ III ຕິດພັນກັບຂະບວນການແຂ່ງຂັນ 5 ເປັນເຈົ້າຂອງ ກຳມະບານຮາກຖານສະພາປະຊາຊົນແຂວງຄໍາມ່ວນ ໂດຍການເປັນປະທານຂອງສະຫາຍ ບຸນສະຫວ່າງ ສີສຸຂະລາດ ປະທານກຳມະບານຮາກຖານສະພາປະຊາຊົນແຂວງຄໍາມ່ວນ, ເປັນກຽດເຂົ້າຮ່ວມຂອງ ສະຫາຍ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ, ມີສະຫາຍ ນາງ ວຽງໄຊ ຍົດຕິແພງ ຮອງປະທານຄະນະບໍລິຫານງານສະຫະພັນກຳມະບານແຂວງ, ສະຫາຍ ຄໍາສຸກ ວັນທະວົງສາ ເລຂາໜ່ວຍພັກ ກຳມະການຄະນະປະຈໍາສະພາປະຊາຊົນແຂວງ, ມີ ຄະນະໜ່ວຍພັກ, ຄະນະກຳມະບານຮາກຖານ, ປະທານສະຫະພັນແມ່ຍິງຮາກຖານ, ເລຂາໜ່ວຍຊາວໜຸ່ມ ສະພາປະຊາຊົນແຂວງຄໍາມ່ວນ, ແຂກຖືກເຊີນ ແລະ ຕະຫຼອດຮອດສະມາຊິກກຳມະບານພາຍໃນສະພາປະຊາຊົນແຂວງຄໍາມ່ວນເຂົ້າຮ່ວມທັງໝົດ 56 ສະຫາຍ, ຍິງ 28 ສະຫາຍ.

    ກອງປະຊຸມຄັ້ງນີ້, ປະທານກຳມະບານຮາກຖານສະພາປະຊາຊົນແຂວງຄໍາມ່ວນ ໄດ້ຜ່ານຮ່າງບົດລາຍງານການເຄື່ອນໄຫວວຽກງານ ຂອງກຳມະບານຮາກຖານສະພາປະຊາຊົນແຂວງຄໍາມ່ວນ ໃນໄລຍະ 5 ປີ ຜ່ານມາຕິດພັນກັບເນື້ອໃນຂໍ້ແຂ່ງຂັນ 5 ເປັນເຈົ້າ, ເຊິ່ງຍົກໃຫ້ເຫັນດ້ານດີ ແລະ ຂໍ້ຄົງຄ້າງ, ໃນການຈັດຕັ້ງປະຕິບັດວຽກງານຜ່ານມາ. ບັນດາຜູ້ແທນກອງປະຊຸມ ໄດ້ຄົ້ນຄວ້າປະກອບຄຳຄິດຄຳເຫັນໃສ່ເນື້ອໃນຂອງຮ່າງບົດລາຍງານການເຄື່ອນໄຫວວຽກງານຂອງກຳມະບານຮາກຖານສະພາປະຊາຊົນແຂວງຄໍາມ່ວນ ຢ່າງມີເນື້ອໃນເລິກເຊິ່ງ ແລະ ເປັນເອກະພາບກັນຮັບຮອງເອົາບົດດັ່ງກ່າວທັງວາງທິດທາງແຜນການທີ່ຈະຕ້ອງຈັດຕັ້ງປະຕິບັດໃນ 5 ປີຕໍ່ໜ້າ.

    ພ້ອມດຽວກັນນີ້ກໍ່ໄດ້ຜ່ານຂໍ້ຕົກລົງຂອງປະທານຄະນະບໍລິຫານງານສະຫະພັນກໍາມະບານແຂວງວ່າດ້ວຍການຍ້ອງຍໍຜູ້ທີ່ໄດ້ມີຜົນງານດີເດັ່ນໃນການຈັດຕັ້ງປະຕິບັດ ວຽກງານກຳມະບານຕິດພັນກັບວຽກງານຂະບວນການແຂ່ງຂັນ 5 ເປັນເຈົ້າ, ບຸກຄົນໄດ້ຮັບການຍ້ອງຍໍມີຈຳນວນ 50 ສະຫາຍ, ຍິງ 25 ສະຫາຍ ແລະ ຍ້ອງຍໍກົມກອງກຳມະບານ 5 ເປັນເຈົ້າ 1 ກົມກອງ, ຕິດປ້າຍນາມມະຍົດກຳມະບານ 5 ເປັນເຈົ້າ 1 ກົມກອງ ແລະ ປະດັບທຸງໄຊກຳມະບານຮາກຖານ 5 ເປັນເຈົ້າ 1 ກົມກອງ, ຜັດປ່ຽນກັນມອບໂດຍ ສະຫາຍ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ ແລະ  ສະຫາຍ ນາງ ວຽງໄຊ ຍົດຕິແພງ ຮອງປະທານຄະນະບໍລິຫານງານສະຫະພັນກຳມະບານແຂວງ,

  ຈາກນັ້ນກໍ່ໄດ້ຜ່ານມາດຖານເງື່ອນໄຂຂອງຜູ້ລົງສະໝັກເລືອກຕັ້ງຄະນະກໍາມະບານຮາກຖານ ຊຸດໃໝ່ເຊີ່ງປະກອບມີ 5 ສະຫາຍ ໃນນັ້ນໄດ້ປ່ອນບັດຄັດເລືອກ ແລະ ເຫັນດີເປັນເອກະພາບໃນກອງຊຸມຄັ້ງປະຖົມມະລຶກແຕ່ງຕັ້ງເອົາ 3 ສະຫາຍ ຄື: ສະຫາຍ ວິໄລ ຈັນທະບັນດິດ ເປັນປະທານກຳມະບານຮາກຖານ, ສະຫາຍ ສຸກສົມພອນ ແສງອາລຸນ ເປັນຮອງປະທານທັງເປັນປະທານກວດກາ, ສະຫາຍ ນາງ ທິບພາພອນ ບຸບຜາສິລິ ເປັນຄະນະ.

ໃນຕອນທ້າຍກອງປະຊຸມ ສະຫາຍ ບົວພັນ ແສງຈັນ ຮອງປະທານສະພາປະຊາຊົນແຂວງຄໍາມ່ວນ ໄດ້ໂອ້ລົມຕໍ່ກອງປະຊຸມທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການນໍາພາ-ຊີ້ນໍາຂອງຄະນະຊຸດເກົ່າ. ທ່ານຍັງໄດ້ສະແດງຄວາມເປັນຫ່ວງເປັນໄຍຕໍ່ຂໍ້ຄົງຄ້າງ ແລະ ໄດ້ເນັ້ນມາຍັງຄະນະກຳມະບານ ຊຸດໃໝ່ ຕ້ອງໄດ້ສູ້ຊົນສ້າງຜົນງານປະກອບສ່ວນຢ່າງແຂງແຮງ, ເອົາໃຈໃສ່ຕໍ່ການປະຕິບັດກົດໝາຍຂອງພະນັກງານ-ລັດຖະກອນວາງອອກ. ກໍ່ຄືການປະຕິບັດກົດໝາຍວ່າດ້ວຍກຳມະບານລາວ; ພ້ອມນີ້ ທ່ານຍັງໄດ້ເນັ້ນໜັກໃຫ້ບັນດາສະມາຊິກພັກ ແລະ ພະນັກງານລັດຖະກອນຈົ່ງສືບຕໍ່ຮັກສາມູນເຊື້ອ ແລະ ເພີ່ມທະວີຄວາມສາມາດໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ເປັນເສນາທິການຮອບດ້ານໃຫ້ແກ່ສະພາປະຊາຊົນຂັ້ນແຂວງ, ຄະນະປະຈໍາສະພາປະຊາຊົນຂັ້ນແຂວງ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ແລະ ຄະນະສະມາຊິກສະພາປະຊາຊົນຂັ້ນແຂວງ ເພື່ອເຮັດໃຫ້ການຈັດຕັ້ງປະຕິບັດວຽກງານມີຜົນສໍາເລັດ ແລະ ມີປະສິດທິພາບສູງ.

    ຈາກນັ້ນ, ຕາງໜ້າຄະນະປະທານກຳມະບານຮາກຖານສະພາປະຊາຊົນແຂວງຄໍາມ່ວນ ຊຸດໃໝ່ກໍ່ໄດ້ຂຶ້ນຮັບຄຳໂອວາດເພື່ອນຳເອົາເນື້ອໃນຈິດໃຈທີ່ຄະນະພັກຂັ້ນເທິງໄດ້ສະແດງຄວາມເປັນຫວ່ງເປັນໄຍພ້ອມທັງທິດທາງດັ່ງກ່າວນຳໄປຜັນຂະຫຍາຍ ແລະ ຈັດຕັ້ງປະຕິບັດໃຫ້ປະກົດຜົນເປັນຈິງໃນຕໍ່ໜ້າ.

ໂດຍ: ເອື້ອ ມະໂນສິງ