ເພື່ອເປັນການຕິດຕາມ ກວດກາການຈັດຕັ້ງປະຕິບັດນິຕິກຳໃຕ້ກົດໝາຍທີ່ພິຈາລະນາຮັບຮອງແລ້ວ ໃຫ້ແທດເໝາະກັບສະພາບຄວາມເປັນຈິງຂອງທ້ອງຖິ່ນໃນແຕ່ລະໄລຍະ, ມີຄວາມເຂັ້ມງວດ, ສັກສິດ, ສອດຄ່ອງກັບກົດໝາຍ, ຮັບປະກັນປະສິດທິພາບ ແລະ  ເປັນການລະດົມຄໍາຄິດຄໍາເຫັນຂອງສະມາຊິກສະພາປະຊາຊົນຂັ້ນແຂວງ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ໃນລະຫວ່າງວັນທີ 25-26 ມິຖຸນາ 2024 , ຢູ່ທີ່ຫ້ອງປະຊຸມຫ້ອງວ່າການເມືອງປາກກະດິງ, ສະພາປະຊາຊົນແຂວງບໍລິຄໍາໄຊ ໄດ້ເປີດກອງປະຊຸມຕິດຕາມ ກວດກາ ປະເມີນຜົນການຈັດຕັ້ງປະຕິບັດນິຕິກຳຂອງແຂວງ ຈໍານວນ 2 ສະບັບ; ໂດຍການເປັນປະທານຂອງທ່ານ ໃສຄໍາ ທອງລັດ ກຳມະການພັກແຂວງ, ຮອງປະທານສະພາປະຊາຊົນແຂວງ ; ເຂົ້າຮ່ວມມີບັນດາທ່ານສະມາຊິກສະພາປະຊາຊົນແຂວງ, ຄະນະເລຂາທິການ, ຫົວໜ້າ-ຮອງຫົວໜ້າພະແນກ, ທ່ານເຈົ້າເມືອງ, ຫ້ອງການທີ່ກ່ຽວຂ້ອງ, ພ້ອມດ້ວຍພະນັກງານ-ລັດຖະກອນ ຈາກສະພາປະຊາຊົນແຂວງ ເຂົ້າຮ່ວມ.

ກອງປະຊຸມໄດ້ຮັບຟັງການລາຍງານຜົນຂອງການປະເມີນການຈັດຕັ້ງປະຕິບັດຂໍ້ຕົກລົງຂອງທ່ານເຈົ້າແຂວງ ສະບັບເລກທີ 150/ຂບຊ, ລົງວັນທີ 17 ມີນາ 2022 ວ່າດ້ວຍການມີສ່ວນຮ່ວມຂອງສັງຄົມໃນວຽກງານສຶກສາ ແລະ ຂໍ້ຕົກລົງຂອງທ່ານເຈົ້າແຂວງ ສະບັບເລກທີ 237/ຂບຊ, ລົງວັນທີ 28 ມີນາ 2018 ວ່າດ້ວຍການຄຸ້ມຄອງ ແລະ ພັດທະນາດິນກະສິກໍາ ໃນຂົງເຂດຊົນລະປະທານ ຕໍ່ກອງປະຊຸມ, ພ້ອມດຽວກັນ ຜູ້ແທນກອງປະຊຸມໄດ້ສຸ່ມໃສ່ປະກອບຄຳຄິດເຫັນຕໍ່ນິຕິກຳ 2 ສະບັບ ແຕ່ລະມາດຕາ ຕາມຄຳຖາມເຈາະຈິ້ມຂອງທ່ານປະທານ ຢ່າງມີຈຸດສຸມ ເພື່ອນຳໄປປັບປຸງໃຫ້ມີຄວາມຮັດກຸມ, ສອດຄ່ອງກັບສະພາບຄວາມເປັນຈິງໃນການປະຕິບັດ ເຮັດໃຫ້ນິຕິກຳດັ່ງກ່າວສາມາດຈັດຕັ້ງປະຕິບັດໄດ້ຢ່າງມີປະສິດທິພາບ ແລະ ປະສິດທິຜົນ, ເໝາະສົມກັບສະພາບຕົວຈິງ.

ກອງປະຊຸມຄັ້ງນີ້, ໄດ້ຮັບການສະໜັບສະໜູນດ້ານງົບປະມານຈາກ ໂຄງການສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS);

ພາບ-ຂ່າວ: ໂສລະຢ໋າ