(ສພຊ) – ວັນພຸດທີ 26 ມິຖຸນາ 2024 ທີ່ສະພາແຫ່ງຊາດ ໄດ້ມີພິທີມອບ-ຮັບເຄື່ອງນຸ່ງຫົ່ມຈາກສູນລວມ ຄຣິສຕະຈັກຂ່າວປະເສີດ ສປປລາວ (ຄຂລ) ໃຫ້ແກ່ສະພາແຫ່ງຊາດ ເຊິ່ງກ່າວມອບໂດຍທ່ານ ສຈ. ຄຳແດງ ກຸນທະປັນຍາ ປະທານບໍລິຫານສູນລວມ ຄຂລ ແລະ ກ່າວຮັບໂດຍທ່ານ ຄຳຈັນ ໂສຕາປະເສີດ ປະທານກຳມາທິການບັນດາ ເຜົ່າ, ມີພາກສ່ວນກ່ຽວຂ້ອງເຂົ້າຮ່ວມເປັນສັກຂີພະຍານ; ເຄື່ອງນຸ່ງຫົ່ມທີ່ນຳມາມອບໃນຄັ້ງນີ້ ມີຈຳນວນ 10,000 ຊຸດ ລວມມູນຄ່າ 1,152 ລ້ານກີບ ເຊິ່ງໄດ້ມາຈາກການປະກອບສ່ວນຂອງຊາວສາສະນິກະຊົນຄຣິສຕຽນຂອງສູນລວມ ຄຂລ ແລະ ສະມາຄົມນັກທຸລະກິດຊາວຈີນ.

ທ່ານ ຄຳຈັນ ໂສຕາປະເສີດ ໄດ້ສະແດງຄວາມຊົມເຊີຍ ແລະ ຂອບໃຈເປັນຢ່າງສູງຕໍ່ການຊ່ວຍເຫຼືອຂອງສູນ ລວມຄຣິສຕະຈັກຂ່າວປະເສີດ ສປປລາວ ພ້ອມທັງແຈ້ງໃຫ້ຊາບວ່າ ຈະນໍາເອົາເຄື່ອງນຸ່ງຫົ່ມເຫຼົ່ານີ້ ແບ່ງປັນໃຫ້ແກ່ 18 ເຂດເລືອກຕັ້ງທົ່ວປະເທດ ເພື່ອໄປແຈກຢາຍຊ່ວຍເຫຼືອບັນເທົາທຸກພໍ່ແມ່ປະຊາຊົນ, ເດັກນ້ອຍ ແລະ ຜູ້ດ້ອຍໂອກາດ ຢູ່ເຂດຫ່າງໄກສອກຫຼີກ ແລະ ອີກຈຳນວນໜຶ່ງ ຈະເກັບໄວ້ເປັນອັນລວມເພື່ອໃຫ້ບັນດາທ່ານການນຳສະພາແຫ່ງຊາດ ໄດ້ນຳໄປຊ່ວຍເຫຼືອປະຊາຊົນໃນເວລາລົງພົບປະຢູ່ທ້ອງຖິ່ນຕ່າງໆ.

ໃນໄລຍະຜ່ານມາ, ສູນລວມ ຄຂລ ໄດ້ມອບເຄື່ອງນຸ່ງຫົ່ມ, ເຂົ້າສານ, ອາຫານແຫ້ງ ແລະ ອື່ນໆ ໃຫ້ແກ່ກຳມາທິການບັນດາເຜົ່າ ເພື່ອໄປແຈກຢາຍຊ່ວຍເຫຼືອພໍ່ແມ່ປະຊາຊົນຜູ້ທຸກຍາກ, ຜູ້ຖືກກະທົບຈາກໄພທຳມະຊາດຕ່າງໆ ຢູ່ບັນດາເຂດເລືອກຕັ້ງ ເຊິ່ງລວມມູນຄ່າເປັນຈຳນວນເງິນຫຼາຍຮ້ອຍລ້ານກີບ.

(ພາບ – ຂ່າວ: ອານຸສອນ ພູມມີທອນ)