(ສພຊ) – ກອງປະຊຸມໃຫຍ່ຄັ້ງທີ II ຂອງໜ່ວຍຊາວໜຸ່ມຮາກຖານກົມການເງິນ ໄດ້ຈັດຂຶ້ນເມື່ອວັນພຸດທີ 12 ມິຖຸນາຜ່ານມາ ພາຍໃຕ້ການເປັນປະທານຮ່ວມຂອງສະຫາຍ ນາງ ດາວເພັດ ສີຫາວົງ ຄະນະພັກຮາກຖານຄະ ນະເລຂາທິການສະພາແຫ່ງຊາດ, ຮອງເລຂາໜ່ວຍພັກກົມການເງິນ, ສະຫາຍ ພອນແກ້ວ ຕົ້ນວໍລະຈິດ ກຳມະການຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມສະພາແຫ່ງຊາດ, ສະຫາຍ ນັດທີ ເພັດມີໄຊ ເລຂາໜ່ວຍຊາວໜຸ່ມຮາກຖານກົມການເງິນ; ມີຜູ້ແທນສົມບູນ ແລະ ແຂກຖືກເຊີນ ເຂົ້າຮ່ວມຫຼາຍກວ່າ 20 ສະຫາຍ.
ກອງປະຊຸມໄດ້ເປັນເອກະສັນຮັບຮອງເອົາລາຍງານການເມືອງ ແລະ ສະແດງຄວາມເຫັນດີເຫັນພ້ອມຕໍ່ບົດສະຫຼຸບຕີລາຄາຜົນງານຂອງໜ່ວຍຊາວໜຸ່ມຮາກຖານກົມການເງິນ ທີ່ຍາດມາໄດ້ໃນໄລຍະຜ່ານມາ ເຊິ່ງແມ່ນຜົນງານໃນການນໍາພາ-ຊີ້ນໍາຂອງຄະນະໜ່ວຍຊາວໜຸ່ມຮາກຖານ ຕໍ່ຂົງເຂດວຽກງານຕ່າງໆຕາມຄວາມຮັບຜິດຊອບ; ພ້ອມກັນນີ້, ກໍເປັນເອກະພາບຕາມທິດທາງລວມ, ຄາດໝາຍສູ້ຊົນ ແລະ ທິດທາງວຽກງານລະອຽດແຕ່ລະດ້ານ ໃນ 5 ປີຕໍ່ໜ້າ; ຮັບຟັງການລາຍງານ ແລະ ຮັບຮອງເອົາບົດສໍາຫຼວດການນໍາພາຂອງຄະນະໜ່ວຍຊາວໜຸ່ມຮາກຖານໃນໄລ ຍະຜ່ານມາ ເຊິ່ງໄດ້ຕີລາຄາດ້ານດີ, ດ້ານອ່ອນ ຂໍ້ຄົງຄ້າງ ແລະ ບົດຮຽນຖອດຖອນໄດ້ຈໍານວນໜຶ່ງ ທີ່ຄະນະໜ່ວຍຊາວໜຸ່ມຮາກຖານຊຸດໃໝ່ ຈະໄດ້ປັບປຸງແກ້ໄຂຂໍ້ບົກຜ່ອງ ແລະ ເສີມຂະຫຍາຍດ້ານຕັ້ງໜ້າຢ່າງແຂງແຮງ.
ຜູ້ແທນສົມບູນ ໄດ້ໃຊ້ສິດປະຊາທິປະໄຕປ່ອນບັດເລືອກເອົາຄະນະໜ່ວຍຊາວໜຸ່ມຮາກຖານກົມການເງິນ ຊຸດໃໝ່ ບົນພື້ນຖານຕາມຫຼັກການລວມສູນປະຊາທິປະໄຕ, ຖືກຕ້ອງຕາມມາດຕະຖານເງື່ອນໄຂທີ່ໄດ້ກໍານົດໄວ້ ເຊິ່ງມີຜູ້ສະໝັກທັງໝົດ 5 ສະຫາຍ ຍິງ 2 ສະຫາຍ, ເລືອກເອົາ 3 ສະຫາຍ; ກອງປະຊຸມຄັ້ງປະຖົມມະລືກຂອງຄະ ນະໜ່ວຍຊາວໜຸ່ມຮາກຖານຊຸດໃໝ່ ໄດ້ເປັນເອກະພາບເລືອກເອົາສະຫາຍ ສຸກສະໄຫວ ພົມມີສຸກ ເປັນເລຂາ, ສະ ຫາຍ ນາງ ນຸດທິລາ ວິໄລພອນ ເປັນຮອງເລຂາ ແລະ ປະທານກວດກາ, ສະຫາຍ ວັນໄຊ ຄູນສະໄໝ ເປັນກຳມະ ການ.
ສະຫາຍ ນາງ ດາວເພັດ ສີຫາວົງ ໄດ້ມີຄຳເຫັນໂອ້ລົມຕໍ່ທີ່ປະຊຸມ ເຊິ່ງໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານທີ່ໜ່ວຍຊາວໜຸ່ມຮາກຖານກົມການເງິນຍາດມາໄດ້ໃນໄລຍະຜ່ານມາ. ພ້ອມນັ້ນ, ກໍໄດ້ຮຽກຮ້ອງມາຍັງບັນດາສະຫາຍໃນຄະນະໜ່ວຍຊາວໜຸ່ມຊຸດໃໝ່ ເພີ່ມທະວີການຊີ້ນຳ-ນຳພາຈັດຕັ້ງປະຕິບັດວຽກງານຕາມທິດທາງແຜນການທີ່ກຳນົດໄວ້, ຫັນມະຕິກອງປະຊຸມໃຫຍ່ຄັ້ງທີ II ຂອງໜ່ວຍຊາວໜຸ່ມຮາກຖານກົມການເງິນ ມາເປັນແຜນການ ແລະ ຈັດຕັ້ງປະຕິບັດໃຫ້ມີຜົນສຳເລັດ; ເອົາໃຈໃສ່ສຶກສາອົບຮົມຄຸນທາດການເມືອງ, ຄຸນສົມບັດສິນທຳປະຕິວັດສະມາຊິກຊາວໜຸ່ມໃຫ້ມີຄວາມໜັກແໜ້ນ ເຂັ້ມແຂງ, ມີຄວາມຮັບຜິດຊອບສູງຕໍ່ໜ້າທີ່ການເມືອງທີ່ໄດ້ຮັບມອບໝາຍ; ຕັ້ງໜ້າຄົ້ນຄວ້າຮໍ່າຮຽນເພື່ອຍົກສູງຄວາມຮູ້, ຄວາມສາມາດ; ປັບປຸງແຜນການນໍາພາ ແລະ ວິທີເຮັດວຽກໃຫ້ດີຂຶ້ນຕື່ມ ແລະ ຕ້ອງເປັນແບບຢ່າງໃນການດໍາລົງຊີວິດໃຫ້ສົມກັບຄວາມເຊື່ອໝັ້ນ ແລະ ຄວາມໄວ້ວາງໃຈຂອງສະມາຊິກຊາວໜຸ່ມທີ່ໄດ້ເລືອກເອົາບັນດາສະຫາຍ. ເອົາໃຈໃສ່ເຕົ້າໂຮມຄວາມສາມັກຄີ, ຊຸກ ຍູ້ສະມາຊິກຊາວໜຸ່ມເຂົ້າຮ່ວມຂະບວນການຂອງອົງການຈັດຕັ້ງຢ່າງເປັນເຈົ້າການ; ສືບຕໍ່ປັບປຸງສະມາຊິກຊາວໜຸ່ມໃຫ້ມີຄວາມເຂັ້ມແຂງທາງດ້ານການເມືອງ-ແນວຄິດ, ການຈັດຕັ້ງ, ແບບແຜນວິທີເຮັດວຽກ ຢ່າງມີວິທະຍາສາດ ແລະ ມີຫົວຄິດປະດິດສ້າງ ບົນພື້ນຖານລະບຽບຫຼັກການ, ດໍາເນີນຊີວິດການເມືອງເປັນປົກກະຕິ ໂດຍຖືເອົາການຕໍານິຕິຊົມຕົນເອງ, ການຕິຊົມເຊິ່ງກັນ ແລະກັນ ເປັນປັດໄຈສໍາຄັນ; ປະຕິບັດຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ມີການແບ່ງງານ, ແບ່ງຄວາມຮັບຜິດຊອບໃຫ້ບຸກຄົນຢ່າງຈະແຈ້ງ; ຕັ້ງໜ້າເຄື່ອນໄຫວປະຕິບັດຂໍ້ແຂ່ງຂັນ “4 ບຸກທະລຸ” ຂອງຊາວໜຸ່ມ ໂດຍຕິດພັນກັບຂໍ້ແຂ່ງຂັນ “ຮັກຊາດ ແລະ ພັດທະນາ” ເພື່ອເຮັດໃຫ້ໜ່ວຍຊາວໜຸ່ມຮາກຖານກົມການເງິນ ສາມາດຍາດໄດ້ຜົນງານທີ່ດີຂຶ້ນກວ່າເກົ່າ.
(ຂ່າວ-ພາບ: ອານຸສອນ ພູມມີທອນ)