ໃນການເຂົ້າຢ້ຽມຂ່ຳນັບ, ທ່ານ ວອນເກີ ເຕີກ ໄດ້ຕີລາຄາສູງຕໍ່ການຮ່ວມມືທີ່ດີລະຫວ່າງລັດຖະບານລາວ ແລະ ຫ້ອງການຂ້າຫຼວງໃຫຍ່ ສປຊ ເພື່ອສິດທິມະນຸດໃນໄລຍະຜ່ານມາ ແລະ ສະແດງຄວາມຊົມ ເຊີຍຕໍ່ຄວາມພະຍາຍາມ ແລະ ຜົນສໍາເລັດເປັນກ້າວໆມາຂອງວຽກງານການສົ່ງເສີມ ແລະ ປົກປ້ອງສິດ ທິມະນຸດຢູ່ ສປປລາວ ໂດຍສະເພາະການຈັດຕັ້ງປະຕິບັດພັນທະ ແລະ ຄໍາໝັ້ນສັນຍາສາກົນ ພາຍໃຕ້ສົນທິສັນຍາດ້ານສິດທິມະນຸດ ທີ່ ສປປລາວ ເປັນພາຄີ ກໍຄືພາຍໃຕ້ກົນໄກທົບທວນປະຈໍາໄລຍະ (UPR) ລວມທັງການສ້າງ ແລະ ປ້ອງກັນບົດລາຍງານແຫ່ງຊາດຂອງ ສປປລາວ ແລະ ຊົມເຊີຍຕໍ່ບົດ ບາດຂອງ ສປປລາວ ໃນການເປັນປະທານອາຊຽນ 2024 ພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”; ນອກນັ້ນ, ກໍໄດ້ແລກປ່ຽນຄໍາຄິດເຫັນກ່ຽວກັບການສົ່ງເສີມບົດ ບາດຍິງ-ຊາຍ, ການປະຕິບັດກົດໝາຍທີ່ກ່ຽວຂ້ອງກັບສິດທິມະນຸດ ແລະ ສິດທິທາງດ້ານເສດຖະກິດ, ສັງຄົມ ແລະ ວັດທະນະທໍາ.

ທ່ານຮອງປະທານສະພາແຫ່ງຊາດ ໄດ້ຍົກໃຫ້ເຫັນຜົນສໍາເລັດເປັນກ້າວໆມາໃນການຈັດຕັ້ງປະ ຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ການສຸມໃສ່ຈັດຕັ້ງປະຕິບັດ 2 ວາ ລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ, ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ລວມທັງເປົ້າໝາຍສະ ເພາະສໍາລັບ ສປປລາວ ກ່ຽວກັບການແກ້ໄຂຜົນກະທົບຂອງລະເບີດບໍ່ທັນແຕກ ເຊິ່ງເປັນສິ່ງກີດຂວາງອັນສໍາຄັນຕໍ່ການພັດທະນາເສດຖະກິດ-ສັງຄົມ, ຕໍ່ການລຶບລ້າງຄວາມທຸກຍາກ ກໍຄືຕໍ່ການຊົມໃຊ້ສິດທິມະນຸດຂອງປະຊາຊົນລາວບັນດາເຜົ່າ; ສປປລາວ ຍາມໃດກໍມີຄວາມພະຍາມຍາມໃນການຈັດຕັ້ງຜັນຂະຫຍາຍພັນທະສາກົນ ພາຍໃຕ້ສົນທິສັນຍາສາກົນດ້ານສິດທິມະນຸດ ທີ່ ສປປລາວ ເປັນພາຄີ ເຂົ້າໃນລະບົບກົດໝາຍຂອງຕົນ ດ້ວຍການບັນຍັດສິດທິພື້ນຖານ ແລະ ພັນທະຂອງປະຊາຊົນລາວ ໄວ້ໃນລັດ ຖະທໍາມະນູນ, ກົດໝາຍ ແລະ ນິຕິກໍາຫຼາຍໆສະບັບ ແລະ ເອົາໃຈໃສ່ສ້າງຄວາມຮັບຮູ້ ແລະ ຄວາມເຂົ້າ ໃຈຢ່າງຖືກຕ້ອງກ່ຽວກັບສິດທິມະນຸດໃຫ້ພະນັກງານ ແລະ ເຈົ້າໜ້າທີ່ຂັ້ນສູນກາງ, ຂັ້ນທ້ອງຖິ່ນ ກໍຄືອົງການຈັດຕັ້ງມະຫາຊົນ, ອົງການຈັດຕັ້ງທາງສັງຄົມ ແລະ ປະຊາຊົນລາວບັນດາເຜົ່າ.