ໃນຕອນເຊົ້າວັນທີ 07 ມິຖຸນາ 2024 ທີ່ຫ້ອງປະຊຸມສະພາປະຊາຊົນແຂວງ, ໜ່ວຍພັກສະພາປະຊາຊົນແຂວງ ໄດ້ຈັດກອງປະຊຸມເຜີຍແຜ່ເຊື່ອມຊຶມ ແລະ ສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານຫຼັກແຫຼ່ງ ຂອງສະພາປະຊາຊົນແຂວງ ເພື່ອດໍາເນີນກອງປະຊຸມໃຫຍ່ 3 ຂັ້ນຂອງພັກ ໂດຍການເປັນປະທານຂອງ ສະຫາຍ ນາງ ພອນສະຫວັນ ສັກຕິຄຸນ ເລຂາໜ່ວຍພັກ, ເລຂາທິການສະພາປະຊາຊົນແຂວງ, ມີຄະນະໜ່ວຍພັກ ແລະ ສະມາຊິກພັກ ພາຍໃນສະພາປະຊາຊົນແຂວງ ເຂົ້າຮ່ວມ

ໃນກອງປະຊຸມໄດ້ຮັບຟັງ ສະຫາຍ ນາງ ພອນສະຫວັນ ສັກຕິຄຸນ ເຜີຍແຜ່ເອກະສານ ແລະ ສຶກສາອົບຮົມການເມືອງ-ແນວຄິດ ປະກອບມີ 2 ບົດຄື: ບົດທີ 1: ຄວາມເຂົ້າໃຈກ່ຽວກັບການດໍາເນີນກອງປະຊຸມໃຫຍ່ 3 ຂັ້ນຂອງພັກ, ບົດທີ 2: ຍົກສູງຄວາມສາມາດນໍາພາ ແລະ ຄວາມເປັນແບບຢ່າງນໍາໜ້າ ຂອງສະມາຊິກພັກ; ຮັບຟັງ ສະຫາຍ ພັທ ຄໍາດາ ໂສລະພົມ ຮອງເລຂາໜ່ວຍພັກ ເຜີຍແຜ່ ປະກອບມີ 2 ບົດຄື: ບົດທີ 3: ຕັ້ງໜ້າຝຶກຝົນ    ຫຼໍ່ຫຼອມຄຸນທາດການເມືອງ ແລະ ຄຸນສົມບັດສິນທໍາປະຕິວັດ, ບົດທີ 4: ເດັດດ່ຽວແກ້ໄຂປະກົດການຫຍໍ້ທໍ້ ໃນຖັນແຖວພະນັກງານ, ສະມາຊິກພັກ

ພາບ-ຂ່າວ: ສູນທອງ