(ສພຊ) – ກອງປະຊຸມສໍາມະນາລະດົມຄຳເຫັນເປີດກວ້າງໃສ່ປຶ້ມຄູ່ມືໃນຂົງເຂດກຳມາທິການແຜນການ, ການເງິນ ແລະ ການກວດສອບ (ກຜງສ) ໄດ້ຈັດຂຶ້ນໃນລະຫວ່າງວັນທີ 05-07 ມິຖຸນາ 2024 ໂດຍການເປັນປະທານຂອງທ່ານ ປອ. ລີເບີ ລີບົວປາວ ປະທານ ກຜງສ; ມີບັນດາທ່ານຮອງປະ ທານກຳມາທິການ ແລະ ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ, ກຳມະການຂອງກຳມາທິການປະຈຳເຂດເລືອກຕັ້ງນະຄອນຫຼວງວຽງຈັນ, ແຂວງວຽງຈັນ ແລະ ແຂວງບໍລິຄໍາໄຊ, ຕາງໜ້າຈາກກະຊວງແຜນການ ແລະ ການລົງທຶນ, ກະຊວງການເງິນ, ທະນາຄານ ແຫ່ງ ສປປລາວ, ອົງການກວດສອບແຫ່ງລັດ, ອົງການກວດກາແຫ່ງລັດ, ຊ່ຽວຊານ, ຜູ້ຂຽນ ແລະ ຄະນະກວດແກ້.
ທັງນີ້, ເພື່ອປຶກສາຫາລືລະດົມຄໍາເຫັນເປີດກວ້າງຈາກກຳມະການຂອງກຳມາທິການ ແລະ ພາກ ສ່ວນທີ່ກ່ຽວຂ້ອງຂອງລັດຖະບານ ເຮັດໃຫ້ປຶ້ມຄູ່ມືໃນຂົງເຂດກຳມາທິການແຜນການ, ການເງິນ ແລະ ການກວດສອບ ມີເນື້ອໃນທີ່ຄົບຖ້ວນສົມບູນ ແລະ ສອດຄ່ອງກັບຕົວຈິງ; ທົບທວນຄືນເນື້ອໃນຜົນການສ້າງປຶ້ມຄູ່ມືຂອງກຳມາທິການທີ່ກ່ຽວຂ້ອງກັບການພິຈາລະນາຮັບຮອງ, ການຕິດຕາມ, ຕົວຊີ້ວັດມະຕິສະ ພາແຫ່ງຊາດ ແລະ ຄວາມຮູ້ພື້ນຖານຂອງກຳມາທິການ ໃຫ້ມີເນື້ອໃນຮັດກຸມ, ຈະແຈ້ງ ເພື່ອສາມາດນໍາໄປເປັນເອກະສານຄູ່ມືໃຫ້ແກ່ກຳມະການ ແລະ ພະນັກງານວິຊາການຂອງກຳມາທິການ ກຜງສ; ປັບປຸງບັນດາປຶ້ມຄູ່ມື ແລະ ປຶ້ມຄວາມຮູ້ພື້ນຖານໃນຂົງເຂດກຳມາທິການດັ່ງກ່າວ ໃຫ້ສຳເລັດສົມບູນ ເພື່ອນໍາໄປສືບຕໍ່ຈັດພິມ ແລະ ນຳໄປຈັດຕັ້ງປະຕິບັດ.
ໃນກອງປະຊຸມ, ຜູ້ເຂົ້າຮ່ວມໄດ້ປຶກສາຫາລືປະກອບຄໍາເຫັນໃສ່ປຶ້ມຄູ່ມືການພິຈາລະນາຮັບຮອງແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ; ປຶ້ມຄູ່ມືການຕິດຕາມກວດກາແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນ ຕາ; ປຶ້ມຄູ່ມືຕົວຊີ້ວັດມະຕິກອງປະຊຸມສະພາແຫ່ງຊາດ ກ່ຽວກັບແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ; ປຶ້ມຄວາມຮູ້ພື້ນຖານເສດຖະສາດ, ການວາງແຜນ ການ ແລະ ການລົງທຶນ ເພື່ອການພິຈາລະນາຮັບຮອງແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ; ປຶ້ມຄວາມຮູ້ພື້ນຖານການເງິນ ແລະ ງົບປະມານ ເພື່ອການພິຈາ ລະນາຮັບຮອງແຜນງົບປະມານແຫ່ງລັດ; ປຶ້ມຄວາມຮູ້ພື້ນຖານເງິນຕາ ແລະ ທະນາຄານ ເພື່ອການພິຈາລະ ນາຮັບຮອງແຜນເງິນຕາ; ປຶ້ມຄວາມຮູ້ພື້ນຖານສະຖິຕິ ແລະ ການວິໄຈປະລິມານ ເພື່ອການພິຈາລະນາຮັບ ຮອງ ແລະ ການຕິດຕາມກວດກາແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ.
ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກມູນນິທິອາຊີ (TAF) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະ ມານຂອງຄະນະເລຂາທິການສະພາແຫ່ງຊາດ.
(ຂ່າວ-ພາບ: ນາງ ອາລິນ ສຸພິມມະປະດິດ)