ໃນລະຫວ່າງວັນທີ 30-31 ພຶດສະພາ 2024 ທ່ານ ນາງ ສົມພອນ ໂສພິລາວັນ ຮອງປະທານສະພາປະຊາຊົນແຂວງພ້ອມດ້ວຍພະນັກງານສະພາປະຊາຊົນແຂວງ ໄດ້ລົງຕິດຕາມກວດກາວຽກງານຂົງເຂດຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຢູ່ເມືອງຜາໄຊ ໂດຍການໃຫ້ກຽດເຂົ້າຮ່ວມຂອງທ່ານ ບຸນມາ ສຸຍະວົງ ເຈົ້າເມືອງໆຜາໄຊ, ມີບັນທ່ານຫົວໜ້າ-ຮອງຫົວໜ້າ ແລະ ພະນັກງານທີ່ທີ່ຢູ່ໃນຂົງເຂດຍຸຕິທໍາ ແລະ ປກຊ-ປກສ ເຂົ້າຮ່ວມ.
ເພື່ອເປັນການລົງຕິດຕາມກວດກາຕາມພາລະບົດບາດ, ຂອບເຂດສິດ ແລະ ໜ້າທີ່ ຂອງຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງ ທີ່ໄດ້ກໍານົດໄວ້ໃນກົດໝາຍ ວ່າດ້ວຍ ການຕິດຕາມກວດກາ ແລະ ເປັນການເກັບກໍາຂໍ້ມູນໃຫ້ແກ່ຄະນະກໍາມະການຍຸຕິທໍາ ແລະ ປກຊ-ປກສ ສະພາປະຊາຊົນແຂວງ ໃນຂົງເຂດຂົງເຂດຍຸຕິທໍາ ແລະ ປກຊ-ປກສ ເພື່ອລາຍງານໃນກອງປະຊຸມສະໄໝສາມັນ ເທື່ອທີ 7 ຂອງ ສະພາປະຊາຊົນແຂວງ ຊຸດທີ II ແລະ ຊຸກຍູ້ວຽກງານວາລະແຫ່ງຊາດ ວ່າດ້ວຍ ການແກ້ໄຂບັນຫາຢາຕິດ. ໃນໂອກາດທີ່ໄດ້ລົງຕິດຕາມກວດກາໃນຄັ້ງນີ້, ທ່ານ ຄໍາຫຼ້າ ແກ້ວດາວັນ ຮອງເລຂາພັກເມືອງ, ສະມາຊິກສະພາປະຊາຊົນແຂວງປະນຈໍາເຂດເລືອກຕັ້ງເມືອງຜາໄຊ ໄດ້ລາຍງານໂດຍຫຍໍ້ ໃນການຈັດຕັ້ງປະຕິບັດວຽກງານຂົງເຂດຍຸຕິທໍາ ແລະ ປກຊ-ປກສ ຂອງອົງການປົກຄອງເມືອງ, ຮັບຟັງບົດລາຍງານໂດຍຫຍໍ້ ການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ຂອງກອງບັນຊາການປກສເມືອງ, ຮັບຟັງລາຍງານໂດຍຫຍໍ້ການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດໄລຍະຜ່ານມາຢູ່ເມືອງ, ລາຍງານໂດຍຫຍໍ້ບັນຫາການຈັດຕັ້ງປະຕິບັດຄໍາຕັດສິນຂອງສານ ຢູ່ຫ້ອງການຍຸຕິທໍາເມືອງ, ບົດລາຍງານໂດຍຫຍໍ້ກ່ຽວກັບວຽກງານປ້ອງກັນຊາຍແດນ ແລະ ແກ້ໄຂບັນຫາຢາເສບຕິດ ທີ່ແລບຕາມຊາຍແດນ, ບົດລາຍງານໂດຍຫຍໍ້ ຂອງຫ້ອງການສະຫະພັນນັກຮົບເກົ່າເມືອງເຊິ່ງຍົກໃຫ້ເຫັນເຖິ່ງ ຂໍ້ສະດວກ, ຂໍ້ຫຍຸ້ງຍາກ ແລະ ສະພາບຄວາມເປັນຈິງຂອງການເຄື່ອນໄຫວວຽກງານຂອງແຕ່ລະຂົງເຂດ, ພ້ອມນັ້ນຄະນະສະມາຊິກສະພາປະຊາຊົນແຂວງ ຍັງໄດ້ມີເຈາະຈິ້ມຄໍາຖາມເຈາະຈິ້ມທີ່ກ່ຽວພັນກັບບັນດາຫ້ອງການຂອງເມືອງເປັນຕົ້ນແມ່ນ: ການຄຸ້ມຄອງອ້າຍນ້ອງໃນເຂດຫ່າງໄກສອກຫຼີກ, ການຄຸ້ມຄອງອາວຸດລາເນື້ອ, ການແກ້ໄຂບັນຫາຢາເສບຕິດ, ການດໍາເນີນຄະດີຂອງເຈົ້າໜ້າທີ ແລະ ບັນຫາອື່ນໆອີກ. ໃນນັ້ນທີມງານທີ່ມາຈາກ ສະພາປະຊາຊົນແຂວງ ພ້ອມດ້ວຍການນໍາເມືອງ ໄດ້ເດີນທາງໄປບ້ານຫໍໄຊ ເມືອງຜາໄຊ ແຂວງຊຽງຂວາງ ເພື່ອເກັບກໍາຄໍາຄິດຄໍາເຫັນຂອງປະຊາຊົນຢູ່ກບ້ານດັ່ງກ່າວໃນການເຄື່ອນໄຫວວຽກງານປກຊ-ປກສ ແລະ ການແກ້ໄຂບັນຫາຢາເສບຕິດຂອງບ້ານ ເພື່ອນໍາສະເໜີຂັ້ນເທິງແກ້ໄຂໃຫ້ຖືກຕ້ອງ ແລະ ທັນເວລາ.
ໃນຕອນທ້າຍຄະນະປະທານຍັງໄດ້ມີຄໍາເຫັນໂອລົມ ສະຫຼຸບຕີລາຄາ ການປະເມີນຜົນການຈັດ ຕັ້ງປະຕິບັດ ວຽກງານໃນຂົງເຂດຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ເຫັນວ່າມີຫຼາຍດ້ານໄດ້ຮັບຜົນສຳເລັດ ແລະ ຍັງມີບາງດ້ານທີ່ຕ້ອງປັບປຸງແກ້ໄຂ ໃຫ້ທຸກສະຫາຍຈົ່ງເອົາໃຈໃສ່ຈັດຕັ້ງປະຕິບັດໜ້າທີອັນສຳຄັນ ທີ່ພັກລັດມອບໝາຍໃຫ້ໄດຮັບຜົນສຳເລັດ ແລະ ຖືກຕ້ອງສອດຄອງກັບລະບຽບ ກົດໝາຍທີ່ວາງໄວ້; ເຮັດໃຫ້ປະເທດຊາດ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ.ການລົງຕິດຕາມກວດກາໃນຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ
ສະພາປະຊາຊົນແຂວງຊຽງຂວາງ
ຂ່າວໂດຍ: ນາງ ສຸກສະຫວັນ ອິນທະແສງ
.