ເພື່ອເປັນການຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2024 ແລະ ຕິດຕາມກວດກາຕາມມະຕິ ທີ່ສະພາປະຊາຊົນ ນວ ໄດ້ຮັບຮອງໄປນັ້ນ, ໃນຕອນເຊົ້າ ວັນທີ 29 ພຶດສະພາ 2024, ທ່ານ ນາງ ພິດສະໄໝ ຕົ້ນສະຫວັນ, ຮອງປະທານຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນ ນວ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດວຽກງານ ຢູ່ກອງຄຸ້ມຄອງພາຫະນະ ແລະ ການຂັບຂີ່ ນວ ໂດຍການຕ້ອນຮັບຂອງ ທ່ານ ບຸນປອນ ບຸນສົມຫວັງ, ຫົວໜ້າ ກອງຄຸ້ມຄອງພາຫະນະ ແລະ ການຂັບຂີ່ ນວ, ມີບັນດາຫົວໜ້າ, ຮອງຫົວໜ້າຂະແໜງການ ເຂົ້າຮ່ວມໃນກອງປະຊຸມຄັ້ງນີ້.
ທ່ານ ບຸນປອນ ບຸນສົມຫວັງ, ຫົວໜ້າກອງຄຸ້ມຄອງພາຫະນະ ແລະ ການຂັບຂີ່ ນວ ໄດ້ລາຍງານໃຫ້ຊາບວ່າ: ໃນໄລຍະ 6 ເດືອນຕົ້ນປີ 2024 ການເກັບລາຍຮັບຄ່າບໍລິການວິຊາການ ສາມາດເກັບລາຍຮັບໄດ້ 18 ຕື້ 936 ລ້ານກວ່າກີບ, ເທົ່າກັບ 77% ຂອງແຜນປີ ເຊິ່ງການເກັບລາຍງານຄ່າບໍລິການແມ່ນ ເກັບຄ່າບໍລິການທະບຽນຍານພາຫະນະ, ການສອບເສັງການຂັບຂີ່ ແລະ ອື່ນໆ. ການປະຕິບັດແຜນລາຍຈ່າຍວິຊາການ ສາມາດປະກອບເອກະສາລາຍຈ່າຍງົບປະມານໄດ້ 14 ຕື້ 80 ລ້ານກວ່າກີບ ເທົ່າກັບ 57% ຂອງແຜນປີ, ການປະກອບເອກະສານລາຍຈ່າຍແມ່ນໄດ້ປະສານສົມທົບ ແລະ ຂໍຄຳແນະນຳຈາກພະແນກການເງິນ ນວ ເພື່ອເຮັດໃຫ້ການປະກອບເອກະສານຖືກຕ້ອງ ແລະ ຄົບຖ້ວນຕາມລະບຽບການ. ນອກຈາກນີ້, ການຈັດເກັບຄ່າທຳນຽມຄ່າທາງໃຫ້ກົມຊ່ວຍສາອາກອນ ກະຊວງການເງິນ ແມ່ນສາມາດປະຕິບັດໄດ້ 16 ຕື້ 347 ລ້ານກວ່າກີບ ຕິດພັນກັບຜົນສຳເລັດໃນດ້ານຕ່າງໆ ກໍຍັງມີຫຼາຍຂໍ້ຄົງຄ້າງ ທີ່ເຮັດໃຫ້ການປະຕິບັດວຽກງານມີຄວາມຫຍຸ້ງຍາກ ເປັນຕົ້ນ ການອະນຸມັດເອກະສານລາຍຈ່າຍຈາກຄັງເງິນເພື່ອໂອນຊຳລະສະສາງມີຄວາມຊັກຊ້າ, ການປະຕິບັດລາຍຈ່າຍທີ່ໄດ້ຮັບຜົນກະທົບຈາກສະພາບເສດຖະກິດ ລາຄາວັດຖຸ, ອຸປະກອນຕ່າງໆລາຄາສູງ ເຮັດໃຫ້ຕົວເລກແຜນງົບປະມານປະຈຳປີ ບໍ່ພຽງພໍກັບລາຍຈ່າຍ, ອັດຕາແລກປ່ຽນເງິນຕາເພີ່ມຂຶ້ນ ເຮັດໃຫ້ການຜະລິດໃບທະບຽນ ແລະ ໃໃບຂັບຂີ່ຖາວອນ ຕົ້ນທຶນເພີ່ມຂຶ້ນເນື່ອງຈາກນຳເຂົ້າວັດຖຸດິບຈາກຕ່າງປະເທດ. 
ໃນໂອກາດດັ່ງກ່າວ, ຄະນະລົງເຮັດວຽກ ກໍໄດ້ມີຄຳເຫັນແລກປ່ຽນຕໍ່ການລາຍງານ ແລະ ເຈາະຈິ້ມຕໍ່ບາງບັນຫາທີ່ເປັນຫາງສຽງສັງຄົມ, ເຊິ່ງກໍໄດ້ຮັບການຊີ້ແຈງຕໍ່ບັນຫາຕ່າງທີ່ທາງຄະນະຜູ້ແທນໄດ້ຊັກຖາມ ແລະ ໃນຕອນທ້າຍ ທ່ານ ນາງ ພິດສະໄໝ ຕົ້ນສະຫວັນ ກໍໄດ້ສະແດງຄວາມຊົມເຊີຍຕໍ່ຜົນສຳເລັດໃນການຈັດຕັງປະຕິບັດວຽກງານໃນໄລຍະຜ່ານມາ ແລະ ໃຫ້ສືບຕໍ່ປະຕິບັດວຽກງານທີ່ຍັງຄົງຄ້າງໃຫ້ສຳເລັດບັນລຸຄາດໝາຍທີ່ວາງໄວ້ ພ້ອມທາງຮັບຮອງເອົາບັນຫາທີ່ເປັນຂໍ້ຫຍຸ້ງຍາກຂອງກອງຄຸ້ມຄອງພາຫະນະ ແລະ ການຂັບຂີ່ ນວ ເພື່ອຈະນຳໄປສະເໜີຫາພາກສ່ວນກ່ຽວຂ້ອງ ເພື່ອມີທິດທາງແກ້ໄຂໃນຕໍ່ໜ້າ.