ເພື່ອຮັບປະກັນທາງດ້ານເນື້ອໃນ, ມາດຕາ, ຂອງ ຮ່າງກົດໝາຍ ຈຳນວນ 05 ສະບັບ ໃຫ້ຄົບຖ້ວນສົມບູນ, ຮັດກຸມ ແລະ ສອດຄ່ອງກັບສະພາບການຈັດຕັ້ງປະຕິິບັດຕົວຈິງໃນປະຈຸບັນ ຢ່າງມີປະສິດທິພາບ ແລະ ປະສິດທິຜົນ; ໃນວັນທີ 23-24 ພຶດສະພາ 2024 ນີ້ ຢູ່ທີ່ຫ້ອງປະຊຸມສະພາປະຊາຊົນແຂວງຫຼວງພະບາງ ໄດ້ຈັດກອງປະຊຸມທາບທາມ ຮ່າງກົດໝາຍ ຂຶ້ນພາຍໃຕ້ການເປັນປະທານຂອງ ທ່ານ ວົງສະຫວັນ ເທບພະຈັນ ປະທານ ຄະນະສະມາຊິກສະພາແຫ່ງຊາດ ເຂດ 6, ມີບັນດາທ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ມີຫົວໜ້າ-ຮອງຫົວໜ້າພະແນກການ ພ້ອມດ້ວຍພະນັກງານທີ່ກ່ຽວຂ້ອງຂອງແຂວງເຂົ້າຮ່ວມ; ກອງປະຊຸມໄດ້ຮັບຟັງການນຳສະເໜີ ໂດຍຫຍໍ້ ຂອງ ຮ່າງກົດໝາຍ ທີ່ນຳມາຄົ້ນຄວ້າ ແລະ ປັບປຸງ ຈຳນວນ 05 ສະບັບຄື: ຮ່າງກົດໝາຍວ່າດ້ວຍການທ່ອງທ່ຽວ (ສະບັບປັບປຸງ);

ຮ່າງກົດໝາຍວ່າດ້ວຍການຕ້ານ ການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ (ສະບັບປັບປຸງ); ຮ່າງກົດໝາຍວ່າດ້ວຍອາກອນມູນຄ່າເພີ່ມ (ສະບັບປັບປຸງ); ຮ່າງກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພ (ສະບັບປັບປຸງ) ແລະ ກົດໝາຍຮ່າງກົດໝາຍວ່າດ້ວຍການສົ່ງເສີມການລົງທຶນ (ສະບັບປັບປຸງ) ຫຼັງຈາກນັ້ນ ປະທານກອງປະຊຸມກໍ່ໄດ້ມີຄຳເຫັນເຈາະຈີ້ມ ຕໍ່ຮ່າງກົດໝາຍ ທີ່ນຳມາທາບທາມ ເພື່ອໃຫ້ບັນດາທ່ານຜູ້ແທນກອງປະຊຸມໄດ້ປະກອບຄຳຄິດຄຳເຫັນຕໍ່ບັນດາ ຮ່າງກົດໝາຍ ທີ່ນຳມາທາບທາມ ພ້ອມດຽວກັນນັ້ນ ຜູ້ແທນກອງປະຊຸມກໍ່ໄດ້ຄົ້ນຄວ້າ ແລະ ປະກອບຄຳເຫັນຕໍ່ ຮ່າງກົດໝາຍ ຢ່າງມີຈຸດສຸມ ເພື່ອເຮັດໃຫ້ເນື້ອໃນຂອງຮ່າງກົດໝາຍ ມີເນື້ອໃນຄົບຖ້ວນ, ຮັດກຸມ, ສອດຄ່ອງກັບສະພາບເສດຖະກິດໃນປະຈຸບັນ ແລະ ນຳໄປຈັດຕັ້ງປະຕິບັດໄດ້ຢ່າງມີປະສິດທິພາບ ແລະ ປະສິດທິຜົນສູງສຸດ

ຂ່າວ ແລະ ພາບ ວິລະຍະ ວັນນະສີ