ໃນວັນທີ 28 ພຶດສະພາ 2024 ທີ່ຫ້ອງປະຊຸມສະພາປະຊາຊົນແຂວງຜົ້ງສາລີ ໄດ້ຈັດກອງປະຊຸມຄົ້ນຄວ້າ ແລະ ປະກອບຄໍາເຫັນໃສ່ກົດໝາຍ 5 ສະບັບຄື: ກົດໝາຍວ່າດ້ວຍອາກອນມູນຄ່າເພີ່ມ, ກົດໝາຍວ່າດ້ວຍການຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ, ກົດໝາຍວ່າດ້ວຍການທ່ອງທ່ຽວ, ກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພ ໂດຍການເປັນປະທານ ຂອງທ່ານ ຫຸມເພັງ ຈອມວິສານ ຮອງປະທານຄະນະປະຈໍາສະພາປະຊາຊົນແຂວງ, ເຂົ້າຮ່ວມມີ ບັນດາທ່ານ ສະມາຊິກສະພາປະຊາຊົນແຂວງ, ມີບັນດາຫົວໜ້າ-ຮອງຫົວໜ້າພະແນກການ, ອົງການຂັ້ນແຂວງ ທີ່ກ່ຽວຂ້ອງ, ບັນດາທະນາຄານ ສາຂາແຂວງຜົ້ງສາລີ ແລະ ພະນັກງານ-ວິຊາການ ທີ່ກ່ຽວຂ້ອງ ຂອງສະພາປະຊາຊົນແຂວງ ເຂົ້າຮ່ວມ.

ຈຸດປະສົງ ເພື່ອເປັນການທາບທາມ, ລະດົມສະຕິປັນຍາ, ຄໍາຄິດຄໍາເຫັນ ຂອງສະມາຊິກສະພາແຫ່ງຊາດ (ສສຊ), ສະມາຊິກສະພາປະຊາຊົນແຂວງ (ສສຂ) ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ກໍຄືບັນດາເປົ້າໝາຍພາກສ່ວນກ່ຽວຂ້ອງຕ່າງໆຂອງທ້ອງຖິ່ນ ເພື່ອເຮັດໃຫ້ກົດໝາຍ 5 ສະບັບ  ມີເນື້ອໃນຄົບຖ້ວນ, ຮັດກຸມ ແລະ ແທດເໝາະກັບສະພາບຕົວຈິງ ກ່ອນທີ່ຈະນໍາເຂົ້າພິຈາລະນາ, ຮັບຮອງເອົາໃນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX

ໃນກອງປະຊຸມໄດ້ຮັບຟັງການລາຍງານ ຜົນການຄົ້ນຄວ້າ ແລະ ປະກອບຄໍາຄິດເຫັນ ຈາກພະແນກການ, ອົງການທີ່ກ່ຽວຂ້ອງ ຄື: ພະແນກການເງິນແຂວງ, ພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວແຂວງ, ພະແນກແຜນການ ແລະ ການລົງທຶນແຂວງ, ກອງບັນຊາການປ້ອງກັນຄວາມສະຫງົບແຂວງ, ຈາກນັ້ນ, ບັນດາຜູ້ເຂົ້າຮ່ວມໄດ້ສຸມສະຕິປັນຍາ ເພື່ອຄົ້ນຄວ້າປະກອບຄໍາເຫັນຕໍ່ແຕ່ລະເນື້ອໃນຂອງແຕ່ລະກົດໝາຍ ຕາມຄໍາຖາມເຈາະຈີ້ມຂອງປະທານກອງປະຊຸມ ຢ່າງມີຈຸດສຸມ ແລະ ກົງໄປກົງມາ ເຊິ່ງຈະເປັນຂໍ້ມູນສໍາຄັນໃຫ້ແກ່ຄະນະຮັບຜິດຊອບ ນໍາໄປຄົ້ນຄວ້າ, ວິເຄາະວິໄຈ ປັບປຸງກົດໝາຍແຕ່ລະສະບັບ ໃຫ້ມີຄວາມຖືກຕ້ອງ, ສອດຄ່ອງ ກັບສະພາບຄວາມເປັນຈິງຂອງທ້ອງຖິ່ນ ເພື່ອຮັບປະກັນໃຫ້ແກ່ການເຄື່ອນໄຫວຕາມພາລະບົດບາດ ສິດ ແລະ ໜ້າທີ່ຂອງສະມາຊິກສະພາໃນໄລຍະໃໝ່ສາມາດຈັດຕັ້ງປະຕິບັດວຽກງານໃຫ້ມີປະສິດທິຜົນສູງກວ່າເກົ່າ ແນໃສ່ການຄຸ້ມຄອງລັດ-ຄຸ້ມຄອງສັງຄົມດວ້ຍກົດໝາຍ ມີຄວາມສັກສິດສູງຂຶ້ນ

ພາບ-ຂ່າວ: ສູນທອງ