ລະຫວ່າງວັນທີ 16-17  ພຶດສະພາ 2024 ທີ່ເມືອງຍົມມະລາດ ແຂວງຄໍາມ່ວນ ສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມຝຶກອົບຮົມກ່ຽວກັບ ການຕິດຕາມກວດກາການສ້າງ, ປັບປຸງ, ການປະເມີນຜົນການຈັດຕັ້ງປະຕິບັດນິຕິກຳໃຕ້ກົດໝາຍ; ໂດຍການເປັນປະທານຂອງ ທ່ານ ບຸນມີ ພິມມະສອນ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ  12 ແຂວງຄໍາມ່ວນ ປະທານສະພາປະຊາຊົນແຂວງຄໍາມ່ວນ, ເປັນກຽດເຂົ້າຮ່ວມ ແລະ ເປັນນັກວິທະຍາກອນຂອງ ທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ ສະພາແຫ່ງຊາດ, ມີຮອງປະທານສະພາປະຊາຊົນຂັ້ນແຂວງ, ຮອງເຈົ້າແຂວງ, ເຈົ້າເມືອງຍົມມະລາດ, ບັນດາທ່ານ ຄະນະປະຈໍາສະພາປະຊາຊົນຂັ້ນແຂວງ, ສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງ 10 ຕົວເມືອງ, ຕາງໜ້າຈາກພະແນກການ ແລະ ອົງການທຽບເທົ່າ, ຄະນະກອງບັນຊາການ ປກຊ-ປກສ, ນັກວິທະຍາກອນຈາກສູນກາງ ແລະ ພະນັກງານເສນາທິການຊ່ວຍວຽກ ຂອງສະພາປະຊາຊົນແຂວງຄໍາມ່ວນເຂົ້າຮ່ວມທັງໝົດ 100 ທ່ານ, ຍິງ 20 ທ່ານ.

ພາຍຫລັງທີປະທານກ່າວເປີດກອງປະຊຸມ, ຕະຫຼອດໄລຍະກອງປະຊຸມ ຜູ້ເຂົ້າຮ່ວມໄດ້​ເອົາໃຈໃສ່ຮັບຟັງ ແລະ ສຸມສະຕິປັນຍາເຂົ້າໃນການຄົ້ນຄວ້າແລກປ່ຽນຄໍາຄິດ-ຄໍາເຫັນບົດຮຽນທິດສະດີ ແລະ ສົມທຽບໃສ່ກັບການປະຕິບັດວຽກງານຕົວຈິງຜ່ານມາ ຢ່າງ​ກົງ​ໄປ​ກົງ​ມາ​ເປັນ​ຕົ້ນ​ກ່ຽວກັບ: ບົດສະເໜີ ການຕິດຕາມກວດກາການສ້າງ ແລະ ປັບປຸງນິຕິກຳໃຕ້ກົດໝາຍ; ການກວດກາ ຄວາມຖືກຕ້ອງຂອງຮ່າງນິຕິກຳໃຕ້ກົດໝາຍ; ການຕິດຕາມກວດກາການສ້າງ, ປັບປຸງກົນໄກຕິດຕາມກວດກາ, ໂຄສະນາເຜີຍແຜ່ສ້າງສະຕິເຄົາລົບນິຕິກຳໃຕ້ກົດໝາຍທີ່ປະກາດໃຊ້ແລ້ວ ແລະ ບົດສະເໜີ ການຕິດຕາມກວດກາການປະເມີນນິຕິກຳໃຕ້ກົດໝາຍ.

ຕອນທ້າຍກອງປະຊຸມ ທ່ານ ບຸນມີ ພິມມະສອນ ໄດ້ມີຄໍາເຫັນວ່າ: ກອງປະຊຸມຝຶກອົບຮົມ ຄັ້ງນີ້ມີຄວາມສຳຄັນຫຼາຍ ເປັນໂອກາດທີດີໃຫ້ຜູ້ເຂົ້າຮ່ວມຍົກສູງຂີດຄວາມສາມາດ ໃນການສ້າງ, ການປັບປຸງ ແລະ ການຕິດຕາມກວດກາການປະເມີນຜົນການຈັດຕັ້ງປະຕິບັດນິຕິກໍາໃຕ້ກົດໝາຍ, ເຂົ້າໃຈຂັ້ນຕອນຕ່າງໆຢ່າງລະອຽດ ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວ ມີຄວາມເປັນເອກະພາບກັນ, ມີຄວາມຖືກຕ້ອງ ສອດຄ່ອງກັບກົດໝາຍ.

ໃນໂອກາດດຽວກັນ ທ່ານ ຍັງໄດ້ສະແດງຄວາມຊົມເຊີຍ ແລະ ຂອບໃຈຕໍ່ຜູ້ໃຫ້ທຶນຈັດກອງປະຊຸມຝຶກອົບຮົມໃນເທື່ອນີ້ ເຊິ່ງໄດ້ຮັບການສະໜັບສະໜູນໂດຍ: ໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ສະເຕັບສ໌ (STEPs) ແລະ ໂຄງການຂອງມູນນິທິເວສມິນສະເຕີ (WFD).

ໂດຍ: ເອື້ອ ມະໂນສິງ