ກອງປະຊຸມຕິດຕາມກວດກາຂອງຄະນະປະຈຳສະພາແຫ່ງຊາດ ກ່ຽວກັບການປະຕິບັດຄຳຕັດ ສິນຂອງສານຢູ່ຂັ້ນສູນກາງຄັ້ງນີ້ ໄດ້ຈັດຂຶ້ນໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານຄະນະປະຈຳສະພາແຫ່ງຊາດ; ມີບັນດາທ່ານປະທານ, ຮອງປະທານກຳມາທິການຍຸຕິທຳ, ກຳມາທິການປ້ອງກັນຊາດ-ປ້ອງກັນຄວາມສະຫງົບ; ບັນດາທ່ານການນຳຂອງກະຊວງຍຸຕິທໍາ, ຮອງລັດຖະມົນຕີ ຮອງຫົວໜ້າຫ້ອງວ່າການສໍານັກງານນາຍົກລັດຖະມົນຕີ, ຮອງປະທານສານປະຊາ ຊົນສູງສຸດ, ຮອງຫົວໜ້າອົງການໄອຍະການປະຊາຊົນສູງສຸດ, ຮອງປະທານອົງການກວດກາແຫ່ງລັດ, ຫົວໜ້າອົງການໄອຍະການປະຊາຊົນພາກກາງ, ຮອງປະທານສານທະຫານຂັ້ນສູງ, ຮອງຫົວໜ້າອົງການໄອຍະການທະຫານຂັ້ນສູງ, ຮອງປະທານສານປະຊາຊົນພາກກາງ; ບັນດາທ່ານຫົວໜ້າ ແລະ ຮອງຫົວໜ້າກົມ, ຜູ້ຕາງໜ້າຈາກກະຊວງ ແລະ ອົງການທີ່ກ່ຽວຂ້ອງ ເຂົ້າຮ່ວມຈຳນວນຫຼາຍ.

ທ່ານ ປອ. ນາງ ສູນທອນ ໄຊຍະຈັກ ໄດ້ມີຄໍາເຫັນກ່າວເປີດ ໂດຍໄດ້ເນັ້ນໜັກເຖິງຈຸດປະສົງຂອງກອງປະຊຸມ ແມ່ນເພື່ອປຶກສາຫາລື, ແລກປ່ຽນຄວາມເຫັນກ່ຽວກັບວຽກງານການຕິດຕາມກວດກາການຈັດຕັ້ງປະຕິບັດຄໍາຕັດສິນຂອງສານໃນໄລຍະຜ່ານມາ ເພື່ອຊອກໃຫ້ເຫັນໄດ້ເຖິງຂໍ້ສະດວກ ແລະ ດ້ານດີ ທີ່ຄວນເສີມຂະຫຍາຍ, ຂໍ້ຫຍຸ້ງຍາກ ແລະ ຂໍ້ຄົງຄ້າງ ທີ່ຄວນໄດ້ເອົາໃຈໃສ່ປັບປຸງແກ້ໄຂ, ສາເຫດທີ່ພາໃຫ້ການຕັດສິນຄະດີຈຳນວນໜຶ່ງແກ່ຍາວ, ບໍ່ສາມາດຈັດຕັ້ງປະຕິບັດໄດ້, ສິ່ງທ້າທາຍຕ່າງໆ ແລະ ບາງບົດຮຽນທີ່ຖອດຖອນໄດ້ ແນໃສ່ສ້າງຄວາມເປັນເອກະພາບສູງໃນການຈັດຕັ້ງປະຕິບັດ, ເພື່ອເຮັດໃຫ້ທົ່ວສັງຄົມມີສະຕິເຄົາລົບ, ປະຕິບັດລັດຖະທຳມະນູນ ແລະ ກົດໝາຍໃຫ້ສູງຂຶ້ນ, ມີປະສິດທິພາບ ແລະ ປະສິດທິຜົນ.

ກອງປະຊຸມໄດ້ຮັບຟັງການລາຍງານຂອງຜູ້ຕາງໜ້າກະຊວງຍຸຕິທຳ ກ່ຽວກັບການຈັດຕັ້ງຜັນຂະ ຫຍາຍກົດໝາຍວ່າດ້ວຍການປະຕິບັດຄຳຕັດສິນຂອງສານ ສະບັບປັບປຸງປີ 2021 ແລະ ສະພາບການ ຈັດຕັ້ງປະຕິບັດວຽກງານປະຕິບັດຄຳຕັດສິນຂອງສານແຕ່ລະຂັ້ນ; ການລາຍງານຂອງຜູ້ຕາງໜ້າຈາກກະ ຊວງປ້ອງການຄວາມສະຫງົບ ແລະ ກະຊວງການເງິນ ກ່ຽວກັບສະພາບການຈັດຕັ້ງປະຕິບັດຄຳຕັດສິນຂອງສານ ແລະ ການປະຕິບັດດຳລັດຂອງລັດຖະບານ ວ່າດ້ວຍຊັບສິນທີ່ຖືກຍຶດ, ອາຍັດ ແລະ ຮິບເປັນຂອງລັດ ສະບັບເລກທີ 280/ນຍ, ລົງວັນທີ 09/8/2022 ໃນໄລຍະຜ່ານມາ; ບັນດາທ່ານຜູ້ຕາງໜ້າຈາກສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ອົງການກວດກາແຫ່ງລັດ ແລະ ຫ້ອງວ່າ ການສຳນັກງານນາຍົກລັດຖະມົນຕີ ແລະ ຜູ້ແທນທີ່ເຂົ້າຮ່ວມກອງປະຊຸມ ໄດ້ພ້ອມກັນປະກອບຄຳຄິດເຫັນຢ່າງຫຼາກຫຼາຍ ເຊິ່ງເປັນຂໍ້ມູນເພີ່ມຕື່ມທີ່ສຳຄັນໃຫ້ແກ່ການດຳເນີນການປະຕິບັດຄຳຕັດສິນຂອງສານໃຫ້ມີປະສິດທິຜົນດີຂຶ້ນເລື້ອຍໆ.

(ຂ່າວ: ນາງ ກຸກກິກ ບຸດດາໄຊ ແລະ ພາບ: ສອນສັກ ວັນວິໄຊ)