(ສພຊ) ໃນຕອນເຊົ້າຂອງວັນທີ 10 ທັນວາ 2021, ທ່ານ ຄໍາສິງ ໄຊສົມແພງ ຮອງປະທານກໍາມາທິການວຽກງານສະມາຊິກສະພາແຫ່ງຊາດ (ກວສຊ) ພ້ອມດ້ວຍຄະນະ ໄດ້ເຄື່ອນໄຫວຊຸກຍູ້ ແລະ ຕິດຕາມກວດກາ ການເຄື່ອນໄຫວວຽກງານ ຂອງສະມາຊິກສະພາແຫ່ງຊາດ ຢູ່ແຂວງວຽງຈັນ ໂດຍການຕ້ອນຮັບຂອງທ່ານ ບຸນສອນ ເພັດລາວັນ ຮອງເລຂາພັກແຂວງ, ປະທານສະພາປະຊາຊົນແຂວງວຽງຈັນ , ມີບັນດາທ່ານ ຄະນະປະຈໍາສະພາປະຊາຊົນແຂວງ, ຮອງເລຂາທິການ, ຫົວໜ້າຂະແໜງ ແລະ ພະນັກງານວິຊາການຂະແໜງສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ເຂົ້າຮ່ວມຢ່າງພ້ອມພຽງ.

ຈຸດປະສົງຂອງການເຄື່ອນໄຫວຄັ້ງນີ້ ແມ່ນເພື່ອຊຸກຍູ້ ແລະ ຕິດຕາມການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 10 ແຂວງວຽງຈັນ ພ້ອມທັງເຮັດໃຫ້ການປະສານສົມທົບໃນທຸກວຽກງານຂອງສະພາແຫ່ງຊາດ ແລະ ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ມີຄວາມລະອຽດ ແລະ ກົມກຽວກັນຍິ່ງຂຶ້ນ ທັງເປັນການຊຸກຍູ້ໃຫ້ສະມາຊິກສະພາແຫ່ງຊາດ ໄດ້ເຄື່ອນໄຫວວຽກງານຕາມທີ່ໄດ້ກໍານົດໄວ້ໃນກົດໝາຍ.