ກອງປະຊຸມທາບທາມຄໍາເຫັນໃສ່ຮ່າງກົດໝາຍ 10 ສະບັບທີ່ຈະນໍາເຂົ້າພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX  ໄດ້ຈັດຂຶ້ນໃນລະຫວ່າງວັນທີ 09-14 ພຶດສະພາ 2024  ຢູ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຂອງທ່ານ ເລື່ອນວິໄລ ຈັນທະລາພັນ ກຳມະການຄະນະປະຈຳພັກແຂວງ ຮອງປະທານສະພາປະຊາຊົນແຂວງ ບໍລິຄຳໄຊ ມີຄະນະປະຈຳສະພາປະຊາຊົນແຂວງ, ສະມາຊິກສະພາປະຊາຊົນແຂວງ, ພະແນກການທີ່ກ່ຽວຂ້ອງຮ່າງກົດໝາຍເຂົ້າຮ່ວມ.

  ຈຸດປະສົງຂອງການທາບທາມຄັ້ງນີ້, ເພື່ອໃຫ້ສອດຄ່ອງກັບກົດໝາຍວ່າດ້ວຍການສ້າງນິຕິກຳ ແລະ ເປັນການປະກອບຄຳຄິດຄຳເຫັນ ຂອງເປົ້າໝາຍຕ່າງໆໃນສັງຄົມເພື່ອນຳໄປຄົ້ນຄວ້າປັບປຸງກົດໝາຍ ເຮັດໃຫ້ກາຍເປັນກົດໝາຍ ຂອງປະຊາຊົນ, ມາຈາກປະຊາຊົນ ແລະ ຮັບໃຊ້ປະຊາຊົນຢ່າງແທ້ຈິງ  ໃນກອງປະຊຸມໄດ້ຮັບຟັງການສະເໜີ ເຫດຜົນ ແລະ ຄວາມຈຳເປັນໃນການ ສ້າງ ແລະ ປັບປຸງ ໂດຍຜູ້ຕາງໜ້າຈາກພະແນກການ ຂຶ້ນຜ່ານຮ່າງກົດໝາຍ ໂດຍຍົກໃຫ້ເຫັນບັນດາໝວດ, ມາດຕາຕ່າງໆ ຮ່າງກົດໝາຍທີ່ນຳມາສະເໜີຄັ້ງນີ້ມີຈໍານວນ 10 ສະບັບປະກອບມີ: ຮ່າງກົດໝາຍວ່າດ້ວຍສະຫະກອນ (ສະບັບສ້າງໃໝ່); ຮ່າງກົດໝາຍວ່າດ້ວຍການຕ້ານການສໍ້ລາດບັງຫຼວງ; ຮ່າງກົດໝາຍວ່າດ້ວຍການປົກປັກຮັກສາສິ່ງແວດລ້ອມ; ຮ່າງກົດໝາຍວ່າດ້ວຍການກັນ ແລະ ຄວບຄຸມພະຍາດເຮດໄອວີ/ພະຍາດເອດ (ສະບັບປັບປຸງ); ຮ່າງກົດໝາຍວ່າດ້ວຍຊັບພະຍາກອນທີ່ເປັນຢາ (ສະບັບສ້າງໃໝ່); ຮ່າງກົດໝາຍວ່າດ້ວຍການຕ້ານ ແລະ ສະກັດກັ້ນອັກຄີໄພ (ສະບັບປັບປຸງ); ຮ່າງກົດໝາຍວ່າດ້ວຍການທ່ອງທ່ຽວ (ສະບັບປັບປຸງ); ຮ່າງກົດໝາຍວ່າດ້ວຍການຕ້ານການຟອກເງິນ ແລະ ສະໜອງທືນໃຫ້ແກ່ການກໍ່ການຮ້າຍ (ສະບັບປັບປຸງ), ຮ່າງກົດໝາຍວ່າດ້ວຍອາກອນມູນຄ່າເພີ່ມ ແລະ ຮ່າງກົດໝາຍວ່າດ້ວຍການສົ່ງເສີມການລົງທຶນ (ສະບັບປັບປຸງ). 10 ຮ່າງກົດໝາຍລ້ວນແຕ່ມີຄວາມໝາຍ ແລະ ຄວາມສໍາຄັນ ໃນການຄຸ້ມຄອງລັດ, ຄຸ້ມຄອງສັງຄົມ,  ຜູ້ເຂົ້າຮ່ວມກອງປະຊຸມໄດ້ປະກອບຄໍາເຫັນ ຕໍ່​ແຕ່ລະ​ເນື້ອ​ໃນ ​ຂອງ​ແຕ່​ລະ​ຮ່າງກົດໝາຍຢ່າງ​ມີ​ຈຸດ​ສຸມ, ມີຄວາມເລິກເຊິ່ງ ສ້າງໃຫ້ໄດ້ຄວາມເປັນເອກະພາບ ​ໃຫ້​ແກ່​ຄະນະ​ຮັບຜິດຊອບ ນໍາ​ໄປ​ຄົ້ນ​ຄ້ວາ, ວິ​ເຄາະ​ວິ​ໃຈ ​ແລະ ປັບປຸງຮ່າງກົດໝາຍ​ແຕ່​ລະສະ​ບັບ ​ເພື່ອ​ເຮັດ​ໃຫ້​ແຕ່​ລະ​ກົດໝາຍ ມີ​ເນື້ອ​ໃນ​ຊັດ​ເຈນ, ຄົບ​ຖ້ວນ, ຮັດກຸມ ​ແລະ ສາມາດ​ຈັດ​ຕັ້ງ​ປະຕິບັດ​ໄດ້ ຢ່າງ​ມີ​ປະສິດທິພາບ​ສູງ ແລະ ເປັນບ່ອນອີງໃຫ້ສະມາຊິກສະພາແຫ່ງຊາດປະຈຳເຂດເລືອກຕັ້ງນຳປະກອບຄຳເຫັນໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ທີ່ຈະໄຂຂື້ນໃນມໍ່ໆນີ້, ກອງ​ປະຊຸມ​ທາບທາມຄໍາເຫັນໃສ່ຮ່າງກົດໝາຍ 10 ສະບັບໃນ​ຄັ້ງ​ນີ້ຈະໄດ້ດໍາເນີນເປັນເວລາ 4 ວັນເຕັມ.

ຂ່າວ ແລະ ພາບ : ໂສລະຢ໋າ