(ສພຊ) – ຕອນບ່າຍຂອງວັນທີ 13 ພຶດສະພາ 2024 ທີ່ສະພາແຫ່ງຊາດ ໄດ້ຈັດກອງປະຊຸມປຶກສາຫາລື ແລະ ກະກຽມຄວາມພ້ອມດ້ານຕ່າງໆ ເພື່ອຮັບໃຊ້ໃຫ້ແກ່ການເປັນເຈົ້າພາບຈັດກອງປະ ຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (ASEAN Inter-Parliamentary Assembly – AIPA) ຄັ້ງທີ 45 ໂດຍການເປັນປະທານຂອງທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ, ຫົວໜ້າອະນຸກໍາມະການກອງເລຂາແຫ່ງຊາດໄອປາ-45; ເຊິ່ງຜູ້ເຂົ້າຮ່ວມໄດ້ຮັບຟັງການລາຍງານກ່ຽວກັບກົງຈັກການຈັດຕັ້ງ ແລະ ກົນໄກການດໍາເນີນກອງປະຊຸມຕ່າງໆຂອງໄອປາ, ປະກອບຄໍາຄິດຄໍາເຫັນ, ຖອດຖອນບົດຮຽນເຊິ່ງກັນ ແລະກັນ, ແລະ ແນະ ນຳການກະກຽມແຕ່ລະດ້ານ.

ເຂົ້າຮ່ວມກອງປະຊຸມຄັ້ງນີ້ ມີບັນດາທ່ານຫົວໜ້າ, ຮອງຫົວໜ້າອະນຸກໍາມະການ ພ້ອມດ້ວຍຄະ ນະ ແລະ ກອງເລຂາຊ່ວຍວຽກທີ່ຮັບຜິດຊອບຢູ່ໃນ 8 ອະນຸກໍາມະການຄື: ເນື້ອໃນ; ບໍລິຫານ, ພິທີ ການ, ສະຖານທີ່, ພາຫະນະ ແລະ ປະດັບປະດາ; ເຜີຍແຜ່ວັດທະນະທຳ, ສິລະປະ ແລະ ທ່ອງທ່ຽວ; ເຕັກໂນໂລຊີ-ຂໍ້ມູນຂ່າວສານ ແລະ ສື່ມວນຊົນ; ປ້ອງກັນຊາດ-ປ້ອງກັນຄວາມສະຫງົບ; ງົບປະມານ; ສຸຂະພາບ; ຂະບວນການ, ຂົນຂວາຍ ແລະ ຍ້ອງຍໍ.
(ຂ່າວ ແລະ ພາບ: ສອນສັກ ວັນວິໄຊ)