(ສພຊ) – ວັນທີ 03 ພຶດສະພາ 2024 ທີ່ຫ້ອງປະຊຸມກະຊວງພະລັງງານ ແລະ ບໍ່ແຮ່ ໄດ້ມີກອງປະຊຸມສຳມະນາວິທະຍາສາດ “ການຈັດຕັ້ງປະຕິບັດວິໄສທັດ ແລະ ຍຸດທະສາດການພັດທະນາແຮ່ທາດ” ໂດຍການເປັນປະທານຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ; ເຂົ້າຮ່ວມມີທ່ານ ນາງ ປິ່ງຄຳ ລາຊະສິມມາ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ບັນດາທ່ານຮອງປະທານກຳມາທິການຂອງສະພາແຫ່ງຊາດ, ບັນດາທ່ານປະທານ ແລະ ຮອງປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ພາກສ່ວນທີ່ກ່ຽວຂອງ.
ທັງນີ້, ເພື່ອເປັນການທົບທວນ, ຖອດຖອນບົດຮຽນກ່ຽວກັບດ້ານດີ, ດ້ານອ່ອນ, ຂໍ້ຄົງຄ້າງ ແລະ ຊອກວິທີແກ້ໄຂຮ່ວມກັນຢ່າງມີປະສິດທິຜົນ, ສອດຄ່ອງກັບແຜນພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະ, ຮັບປະ ກັນການນຳໃຊ້ຊັບພະຍາກອນແຮ່ທາດທີ່ມີຢູ່ ຢ່າງຍາວນານ ແລະ ສ້າງຜົນປະໂຫຍດສູງສຸດແກ່ປະເທດຊາດ ແລະ ເພື່ອເປັນການກະກຽມຂໍ້ມູນລາຍງານຕໍ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX ທີ່ຈະໄຂຂຶ້ນໃນເດືອນມິຖຸນາທີ່ຈະມາເຖິງນີ້.
ທ່ານ ສົມມາດ ພົລເສນາ ໄດ້ຮຽກຮ້ອງໃຫ້ບັນດາຜູ້ເຂົ້າຮ່ວມ ປະກອບຄຳຄິດຄຳເຫັນຢ່າງກົງໄປກົງມາ, ຍົກໃຫ້ເຫັນບັນຫາຕົວຈິງຢູ່ແຕ່ລະທ້ອງຖິ່ນ ພ້ອມທັງເຫດຜົນທາງດ້ານວິຊາການ ບົນພື້ນຖານຄວາມສອດຄ່ອງກັບກົດໝາຍ ແລະ ນິຕິກຳໃຕ້ກົດໝາຍທີ່ກ່ຽວຂ້ອງ ແນໃສ່ເຮັດໃຫ້ການພັດທະນາວຽກງານແຮ່ທາດຂອງປະເທດເຮົາ ປະຕິບັດຖືກ ຕ້ອງຕາມທິດມີຈຸດສຸມ, ຫັນເປັນອຸດສາຫະກຳ, ທັນສະໄໝ, ສີຂຽວ ແລະ ຍືນຍົງ, ສ້າງລາຍຮັບສູງສຸດໃຫ້ແກ່ລັດ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ ຕາມແນວທາງນະໂຍບາຍຂອງພັກ.
ກອງປະຊຸມໄດ້ຮັບຟັງບັນດາບົດລາຍງານ: ສະພາບການຈັດຕັ້ງປະຕິບັດວຽກງານທໍລະນີສາດ ແລະ ແຮ່ທາດ ແລະ ການຜັນຂະຫຍາຍວິໄສທັດ ແລະ ຍຸດທະສາດການພັດທະນາແຮ່ທາດ, ສະພາບການຈັດຕັ້ງປະຕິບັດວຽກງານບໍ່ແຮ່ ແລະ ການຜັນຂະຫຍາຍວິໄສທັດ ແລະ ຍຸດທະສາດການພັດທະນາແຮ່ທາດ, ການຄຸ້ມຄອງໂຄງການຂຸດຄົ້ນ ແລະ ປຸງແຕ່ງແຮ່ຫາຍາກ (ຮູບແບບທົດລອງ), ສະພາບການຄົ້ນຄວ້າວຽກງານທໍລະນີສາດ ແລະ ບໍ່ແຮ່ ທີ່ຕິດພັນກັບການຜັນຂະຫຍາຍວິໄສທັດ ແລະ ຍຸດທະສາດການພັດທະນາແຮ່ທາດ, ການຈັດຕັ້ງປະຕິບັດການສ້າງຄວາມເຂັ້ມແຂງຮອບດ້ານໃຫ້ແກ່ລັດວິສາຫະກິດພັດທະນາແຮ່ທາດລາວ ທີ່ຕິດພັນກັບການຜັນຂະຫຍາຍວິໄສທັດ ແລະ ຍຸດທະສາດການພັດທະນາແຮ່ທາດ, ຄວາມຄືບໜ້າການກໍ່ສ້າງໂຮງງານຫຼອມເຫຼັກ ແລະ ບົດປະກອບຄຳເຫັນຂອງສະພາປະຊາຊົນແຂວງຫົວພັນ, ຊຽງຂວາງ, ຄຳມ່ວນ, ວຽງຈັນ ແລະ ເຊກອງ.
(ພາບ: ນາງ ກຸກກິກ ບຸດດາໄຊ ແລະ ຂ່າວ: ນາງ ອາລິນ ສຸພິມມະປະດິດ)