(ສພຊ) – ທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ປະທານກໍາມາທິການກົດໝາຍພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາການຈັດຕັ້ງປະຕິບັດວຽກງານໂຄສະນາເຜີຍແຜ່ລັດຖະທໍາມະນູນ ແລະ ກົດໝາຍ ທີ່ແຂວງອັດຕະປື ໂດຍໄດ້ຈັດກອງປະຊຸມຂຶ້ນໃນວັນທີ 23 ເມສາ 2024 ທີ່ຫ້ອງປະຊຸມສະພາປະຊາ ຊົນແຂວງ (ສພຂ) ໂດຍການເຂົ້າຮ່ວມຂອງທ່ານ ສຸກສໍາລານ ໄຊຍະແສງ ຮອງປະທານ ສພຂ, ບັນດາທ່ານຄະນະປະຈໍາ ສພຂ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 17, ຄະນະກໍາມະການ ແລະ ຄະນະເລຂາທິການ ສພຂ ພ້ອມດ້ວຍຕາງໜ້າຈາກພະແນກການ ແລະ ອົງການທຽບເທົ່າ, ກອງບັນຊາການ ປກສ ແລະ ພາກ ສ່ວນທີ່ກ່ຽວຂ້ອງ.
ໃນກອງປະຊຸມ, ທ່ານ ສຈ. ປອ. ຈະເລີນ ເຍຍປາວເຮີ ໄດ້ກ່າວວ່າ: ການໂຄສະນາເຜີຍແຜ່ລັດຖະທໍາມະນູນ ແລະ ກົດໝາຍ ແມ່ນວຽກທີ່ສໍາຄັນອັນໜຶ່ງໃນວຽກງານການສ້າງລັດທີ່ປົກຄອງດ້ວຍກົດໝາຍ ເຊິ່ງພັກເຮົາໄດ້ມີແນວ ທາງນະໂຍບາຍວ່າດ້ວຍການສ້າງລັດທີ່ປົກຄອງດ້ວຍກົດໝາຍ ມາແຕ່ກອງປະຊຸມໃຫຍ່ຄັ້ງທີ VIII ເປັນຕົ້ນມາ, ລັດກໍໄດ້ມີແຜນແມ່ບົດ ຫຼືແຜນຍຸດທະສາດວ່າດ້ວຍການສ້າງລັດທີ່ປົກຄອງດ້ວຍກົດໝາຍ ນັບແຕ່ປີ 2010 ແລະ ໄດ້ສ້າງໃຫ້ມີກົດໝາຍທີ່ເປັນລະບົບຄົບຊຸດ ຮັດກຸມ ສອດຄ່ອງແທດເໝາະກັບໜ້າທີ່ການເມືອງຂອງພັກ, ສະພາບການຕົວຈິງພາຍໃນປະເທດ ແລະ ສາກົນ ໃນແຕ່ລະໄລຍະ; ມາຮອດປັດຈຸບັນ, ລັດໄດ້ປະກາດໃຊ້ກົດໝາຍທັງໝົດ 167 ສະບັບ ສະນັ້ນ, ຕ້ອງໄດ້ໂຄສະນາເຜີຍລັດຖະທໍາມະນູນ ແລະ ກົດໝາຍ ເພື່ອສ້າງຄວາມຮັບຮູ້ ແລະ ສະຕິເຄົາລົບ ແລະ ປະຕິບັດກົດໝາຍໃນທົ່ວສັງຄົມໃຫ້ສູງຂຶ້ນ, ຈັດຕັ້ງປະຕິບັດກົດໝາຍ ຫຼື ບັງຄັບປະຕິບັດກົດໝາຍຂອງລັດ, ຂອງລະບອບການເມືອງ ໃຫ້ສັກສິດ ແລະ ເຂັ້ມງວດ.
ກອງປະຊຸມໄດ້ຮັບຟັງການລາຍງານຂອງພະແນກຍຸຕິທໍາ ກ່ຽວກັບການຈັດຕັ້ງປະຕິບັດວຽກງານການໂຄສະນາເຜີຍແຜ່ລັດຖະທໍາມະນູນ ແລະ ກົດໝາຍ ຢຸ່ແຂວງອັດຕະປື ແລະ ໄດ້ພ້ອມກັນຄົ້ນຄວ້າປະກອບຄວາມຄິດຄວາມເຫັນ ແລະ ແລກປ່ຽນບົດຮຽນເຊິ່ງກັນ ແລະກັນ ຢ່າງກົງໄປກົງມາ, ມີເຫດມີຜົນ, ພາວະວິໄສ ແລະ ແທດກັບສະພາບການຕົວຈິງໃນການຂະຫຍາຍຕົວຂອງສະພາບເສດຖະກິດ-ສັງຄົມໃນປັດຈຸບັນ ເພື່ອຈະໄດ້ພ້ອມກັນຕັ້ງໜ້າຈັດຕັ້ງປະຕິບັດວຽກງານດັ່ງກ່າວ ໃຫ້ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ ເພື່ອເປັນການຜັນຂະຫຍາຍແນວທາງນະໂຍບາຍຂອງພັກ ໃນການສ້າງລັດທີ່ປົກຄອງດ້ວຍກົດໝາຍ ໃຫ້ເປັນຮູບປະທໍາຂຶ້ນເທື່ອລະກ້າວ; ນອກຈາກນີ້, ຍັງໄດ້ຮັບຟັງການເຜີຍແຜ່ຄໍາແນະນໍາຂອງຄະນະປະຈໍາສະພາແຫ່ງຊາດ ວ່າດ້ວຍການສະຫຼຸບຕິລາຄາການໂຄສະນາເຜີຍແຜ່ກົດໝາຍໃນທົ່ວປະເທດ.
ທ່ານ ສຈ. ປອ. ຈະເລີນ ເຍຍປາວເຮີ ໄດ້ມີຄໍາເຫັນ ແລະ ສະເໜີເນັ້ນຕື່ມບາງບັນຫາ ເປັນຕົ້ນແມ່ນ ເອົາໃຈໃສ່ຊີ້ນໍາບັນດາຂະແໜງການ ເພີ່ມທະວີການໂຄສະນາເຜີຍແຜ່ລັດຖະທໍາມະນູນ ແລະ ບັນດາກົດໝາຍທີ່ໄດ້ປະກາດໃຊ້ແລ້ວ ໃຫ້ມີຄວາມວ່ອງໄວ, ຕໍ່ເນື່ອງ, ທັນກໍານົດເວລາ, ກວ້າງຂວາງ ແລະ ເຂົ້າເຖິງທຸກເປົ້າໝາຍ ທັງພາກລັດ, ເອກະຊົນ, ປະຊາຊົນລາວບັນດາເຜົ່າ ດ້ວຍຫຼາຍຮູບການ, ຫຼາຍວິທີການ; ພິຈາລະນາຈັດສັນງົບປະມານ, ພາຫະນະ ສະໜອງໃຫ້ແກ່ວຽກງານດັ່ງກ່າວຕາມຄວາມສາມາດ. ສືບຕໍ່ຊີ້ນໍາການຜັນຂະຫຍາຍຄໍາແນະນໍາຂອງຄະນະປະຈໍາສະພາແຫ່ງຊາດ ສະ ບັບເລກທີ 01/ຄປຈ, ລົງວັນທີ 03 ມັງກອນ 2024 ວ່າດ້ວຍການສະຫຼຸບຕີລາຄາການໂຄສະນາເຜີຍແຜ່ກົດໝາຍ; ສືບ ຕໍ່ຈັດຕັ້ງປະຕິບັດມະຕິຂອງຄະນະປະຈໍາສະພາແຫ່ງຊາດສະບັບເລກທີ 29/ຄປຈ, ລົງວັນທີ 07 ກຸມພາ 2022 ແລະ ນິ ຕິກໍາຂອງລັດຖະບານ ກ່ຽວກັບການໂຄສະນາເຜີຍແຜ່ລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍ. ຕິດຕາມກວດກາການຈັດຕັ້ງປະຕິບັດວຽກງານໂຄສະນາເຜີຍແຜ່ລັດຖະທໍາມະນູນ ແລະ ກົດໝາຍ ກໍຄືນິຕິກໍາໃຕ້ກົດໝາຍ ລວມທັງນິຕິກໍາໃຕ້ກົດໝາຍຂອງແຂວງ ໃຫ້ແທດເຖິງຕົວຈິງ ໂດຍສະເພາະນິຕິກໍາທີ່ຕິດພັນກັບການອະນຸຍາດບັນດາໂຄງການຕ່າງໆ.
ໂອກາດນີ້, ທ່ານ ສຈ. ປອ. ຈະເລີນ ເຍຍປາວເຮີ ຍັງໄດ້ມອບຄອມພິວເຕີ (ໂນດບຸກ) ຈໍານວນ 2 ໜ່ວຍ ມູນຄ່າ 20 ລ້ານກີບ ໃຫ້ແກ່ ສພຂ ເພື່ອນໍາໃຊ້ເຂົ້າໃນວຽກງານວິຊາສະເພາະ ໂດຍການກ່າວຮັບຂອງທ່ານ ສຸກສໍາລານ ໄຊຍະແສງ.
ໃນຕອນບ່າຍຂອງວັນດຽວກັນ, ທ່ານ ສຈ. ປອ. ຈະເລີນ ເຍຍປາວເຮີ, ທ່ານ ສຸກສໍາລານ ໄຊຍະແສງ ພ້ອມດ້ວຍຄະນະ ແລະ ພາກສ່ວນກ່ຽວຂ້ອງ ໄດ້ເຄື່ອນໄຫວຢ້ຽມຢາມບໍລິສັດ ທາໂກ ອາກຣີ ຕັ້ງຢູ່ບ້ານຫາດຊັນ ເມືອງໄຊເສດຖາ ເພື່ອຢ້ຽມຢາມ ແລະ ຮັບຟັງການລາຍງານການຈັດຕັ້ງປະຕິບັດຂອງໂຄງການ ເຊິ່ງເປັນບໍລິສັດໃຫຍ່ ມີການລົງ ທຶນຫຼາຍໃນຂະແໜງກະສິກໍາ ປູກຢາງພາລາ, ປູກກ້ວຍ ແລະ ລ້ຽງງົວພັນຊີ້ນ.
(ຂ່າວ-ພາບ: ວິນັດ ສີສຸລາດ)