ວັນທີ 30 ເມສາ 2024 ນີ້ ສະພາປະຊາຊົນ ແຂວງຫົວພັນໄດ້ຈັດກອງປະຊຸມຝຶກອົບຮົມທັກການຕິດຕາມກວດກາ ແລະ ປະເມີນການຈັດຕັ້ງປະຕິບັດ ນິຕິກຳໃຕ້ກົດໝາຍ, ກົດໝາຍໃນຂົງເຂດວັດທະນາທຳສັງຄົມ ໃຫ້ແກ່ສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນ ແຂວງຫົວພັນ ຂຶ້ນຢູ່ທີ່ຫ້ອງປະຊຸມ ເມືອງຮ້ຽມ ແຂວງຫົວພັນ ໂດຍການເປັນປະທານ ຂອງ ທ່ານ ຄອນປະພັນ ເລືອງສີຈັນທອງ ຄະນະປະຈຳພັກແຂວງ, ຮອງປະທານ ສະພາປະຊາຊົນແຂວງ, ມີບັນດາທ່ານ, ນັກວິທະຍາກອນ, ສຳມະນາກອນທີ່ເປັນ ສສຊ ແລະ ສສຂ ປະຈຳເຂດເລືອກຕັ້ງເມືອງ 10 ເມືອງທົ່ວແຂວງ ຕະຫລອດຮອດວິຊາການ ສະພາປະຊາຊົນແຂວງ ທີ່ກ່ຽວຂ້ອງເຂົ້າຮ່ວມ.

ຈຸດປະສົງກອງປະຊຸມຄັ້ງນີ້ເພື່ອຍົກສູງຂີດຄວາມສາມາດ ແລະ ທັກສະສ້າງຄວາມເຂັ້ມແຂງ ແລະ ຍົກລະດັບໃຫ້ແກ່ສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນ ແຂວງໃນການຈັດຕັ້ງປະຕິບັດວຽກງານຕາມພາລະບົດບາດຂອງຕົນ, ທັງເປັນການແລກປ່ຽນປະສົບການ ແລະ ບົດຮຽນເຊິ່ງກັນ ແລະ ກັນໃນການປະຕິບັດໜ້າທີ່ວຽກງານຕົວຈິງ, ເພື່ອເຮັດໃຫ້ ສສຊ ແລະ ສສຂ ມີທັກສະ ແລະ ສາມາດເຄື່ອນໄຫວວຽກງານມີປະສິດພາບ ແລະ ປະສິດທິຜົນດີຂຶ້ນ ກອງປະຊຸມຝຶກອົບຮົມຄັ້ງນີ້ເຊິ່ງໄດ້ຮັບການສະໜັບສະໜູນຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນ ສະເຕັບ (STEPs).

             ໃນກອງປະຊຸມຮັບຟັງການສະເໜີເອກະສານໃນຈໍານວນ 2 ຫົວຂໍ້ຄື: ທັກສະໃນການຕິດຕາມກວດການິຕິກຳໃຕ້ກົດໝາຍ, ບາງບົດຮຽນ ແລະ ພຶດຕິກຳຕົວຈິງໃນການຕິດຕາມ ການສ້າງນິຕິກຳໃຕ້ກົດໝາຍ ຂອງສະພາປະຊາຊົນແຂວງ ແລະ ບົດຮຽນ ການປະເມີນນິຕິກຳ ໃຕ້ກົດໝາຍ ທີ່ສະພາປະຊາຊົນແຂວງ ພິຈາລະນາ ແລະ ຮັບຮອງເອົາ; ພ້ອມດຽວກັນນັ້ນ, ຜູ້ເຂົ້າຮ່ວມກອງປະຊຸມຝຶກອົບຮົມຄັ້ງນີ້ຍັງໄດ້ພ້ອມກັນສົນທະນາປະກອບຄຳຄິດຄຳເຫັນຢ່າງກົງໄປກົງມາ, ແລກປ່ຽນບົດຮຽນເຊິ່ງກັນ ແລະ ກັນຕໍ່ກັບບັນດາເນື້ອໃນກອງປະຊຸມຝຶກອົບຮົມໃຫ້ມີຄວາມຮັບຮູ້, ເຂົ້າໃຈເລິກເຊິ່ງເພື່ອຄວາມເປັນເອກະພາບສູງກ້າວໄປເຖິງໃຫ້ສາມາດນໍາໄປຈັດຕັ້ງປະຕິບັດໃນການໂຄສະນາເຜີຍແຜ່ພົບປະຜູ້ມີສິດເລືອກຕັ້ງໃຫ້ມີຜົນສຳເລັດຕາມຈຸດປະສົງລະດັບຄາດໝາຍທີ່ວາງໄວ້.

             ຕອນທ້າຍກອງປະຊຸມ, ປະທານກອງປະຊຸມໄດ້ມີຄຳຄິດຄຳເຫັນ ພ້ອມທັງເນັ້ນໜັກໃຫ້ ສສຊ ແລະ ສສຂ ປະຈຳເຂດເລືອກຕັ້ງ10 ເມືອງພ້ອມດ້ວຍວິຊາການທີ່ກ່ຽວຂ້ອງຈົ່ງພ້ອມກັນນໍາເອົາທັກສະ, ຄວາມຮູ້, ຄວາມສາມາດ, ຄວາມເຂົ້າໃຈ ແລະ ວິທີການດັ່ງກ່າວຕາມເນື້ອໃນຈິດໃຈ ຂອງກອງປະຊຸມຝຶກອົບຮົມຄັ້ງນີ້ນຳໄປຈັດຕັ້ງປະຕິບັດໃຫ້ປະກົດຜົນເປັນຈິງ; ຕ້ອງໄດ້ຍົກສູງຄວາມຮັບຜິດຊອບ, ຄວາມເປັນເຈົ້າການເພື່ອນຳເອົາບົດຮຽນການຝຶກອົບຮົມໃນຄັ້ງນີ້ໄປຈັດຕັ້ງປະຕິບັດຕາມພາລະບົດບາດສິດ ແລະ ໜ້າທີ່ຂອງຕົນໃຫ້ຖືກຕ້ອງ, ສ່ອດຄ່ອງຕາມລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍທີ່ໄດ້ກຳນົດໄວ້, ໂດຍສະເພາະວຽກງານຕິດຕາມກວດກາຖືວ່າເປັນວຽກງານໜຶ່ງທີ່ສຳຄັນຢ່າງຍິ່ງໃນການຄຸ້ມຄອງເສດຖະກິດ-ສັງຄົມໃຫ້ມີຄວາມເປັນລະບຽບຮຽບຮ້ອຍ; ເອົາໃຈໃສ່ໃນການຄົ້ນຄ້ວາເກັບກຳຂໍ້ມູນ, ວິເຄາະ, ວິໄຈບັນຫາໃຫ້ລະອຽດຈະແຈ້ງ, ຊັດເຈນເພື່ອເປັນຂໍ້ມູນພື້ນຖານ, ເປັນບ່ອນອີງໃຫ້ແກ່ການປະກອບຄຳເຫັນ ແລະ ການຊັກຖາມຢູ່ໃນກອງປະຊຸມສະພາ, ເຮັດໃຫ້ການປະກອບຄຳເຫັນ, ຂໍ້ຊັກຖາມດັງກ່າວຖືກຕ້ອງຕົງປະເດັນ ແລະ ຮັບປະກັນດ້ານຄຸນນະພາບໃນການຕັ້ງບັນຫາຂໍ້ຊັກຖາມຕ່າງໆທີ່ຈະໃຫ້ຂະແໜງການກ່ຽວຂ້ອງອະທິບາຍຊີ້ແຈ້ງບັນຫາທີ່ປະຊາຊົນ ແລະ ສັງຄົມໃຫ້ຄວາມສົນໃຈຫຼາຍ, ເພື່ອຈະນຳເອົາຄຳອະທິບາຍຂອງຂະແໜງການກ່ຽວຂ້ອງໄປເຜີຍແຜ່ອະທິບາຍຊີ້ແຈ້ງຕໍ່ປະຊາຊົນໄດ້ຮັບຮູ້, ເຂົ້າໃຈ ແລະ ມີຄວາມເປັນເອກະພາບ; ຕ້ອງໄດ້ເອົາໃຈໃສ່ ແລະໃຫ້ຄວາມສຳຄັນໃນເວລາລົງພົບປະຜູ້ມີສິດເລືອກຕັ້ງຢູ່ແຕ່ລະຂົງເຂດຕ່າງໆແມ່ນໃຫ້ຖືເອົາວຽກງານນີ້ຕິດພັນໄປນຳເນື້ອໃນບັນດາມະຕິກອງປະຊຸມສະພາປະຊາຊົນແຂວງ ເພື່ອລົງໂຄສະນາເຜີຍແຜ່ອະທິບາຍ, ຊີ້ແຈງໃຫ້ປະຊາຊົນໄດ້ຮັບຮູ້ເຂົ້າໃຈໃນນາມເປັນຕົວແທນໃຫ້ແກ່ປະຊາຊົນ.

            ກອງປະຊຸມເຝິກອົບຮົມທັກສະເພື່ອສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງຫົວພັນ ໄດ້ດຳເນີນເປັນເວລາ 1 ວັນເຕັມດ້ວຍຜົນສໍາເລັດອັນຈົບງາມ.

ພາບ ແລະ ຂ່າວ: ສພຂ ຫົວພັນ